1. He oiaio, penei wahi a ka Haku ia oukou, ka poe Aʻu i aloha ai, a o ka poe Aʻu i aloha ai, Kaʻu no hoi ia e ao ikaika ai, i kala ia ai ko lakou mau hewa, no ka mea, me ke ao ikaika ana e hoomakaukau ai Au i ala no ko lakou hoopakele ia ana ma na mea a pau, mai ka hoowalewale ae, a ua aloha Au ia oukou.

2. Nolaila, he pono ke ao ikaika ia oukou a e ku me ka hoopololei ia imua o Koʻu alo;

3. No ka mea, ua hana hewa oukou Iaʻu, i kekahi hewa koikoi loa, ma ko oukou noonoo ole ana i ke kauoha nui ma na mea a pau Aʻu i haawi aku ai ia oukou e pili ana i ke kukulu ana i Kuu hale.

4. No ka hoomakaukau ana Aʻu i makemake ai e hoomakaukau i Kuu mau Aposetolo e paipai i Kuu malawaina no ka wa hope loa, i hiki ai Iaʻu ke hooko i Kaʻu hana kamahao, a i hiki Iaʻu ke ninini aku i Kuu Uhane maluna o na io a pau.

5. Aka, aia hoi, he oiaio Kaʻu e olelo aku nei ia oukou, Aia he nui wale ka poe i hoolilo ia mawaena o oukou, ka poe Aʻu i kahea ai, aka, he kakaikahi o lakou i wae ia;

6. O ka poe i wae ole ia ua hana hewa lakou i kekahi hewa koikoi, ma ko lakou hele ana iloko o ka pouli ma ke awakea;

7. A no keia kumu i haawi aku ai Au ia oukou he kauoha e kahea aku i ko oukou anaina hoano, i pii aku ai ka oukou hookeai ana a me ka oukou kanikau ana i na pepeiao o ka Haku Sabaota, oia hoi, ma ka unuhi ana, ka Mea Nana i hana ma ka la mua, ka hoomaka ana a me ka hopena.

8. Ae, he oiaio Kaʻu e olelo aku nei ia oukou, ua haawi aku Au ia oukou he kauoha, e kukulu oukou i hale, iloko hoi o ia hale Au i makemake ai e kau i ka mana mailuna mai maluna o ka poe Aʻu i wae ai;

9. No ka mea, o keia ka olelo hoopomaikai a ka Makua ia oukou, nolaila ke kauoha aku nei Au ia oukou e kali, he oiaio, e like me Kaʻu mau Aposetolo ma Ierusalema;

10. Aka nae, ua hana hewa Kuu mau kauwa i kekahi hewa koikoi loa, a ala ae na paio ana iloko o ke kula o na Kaula, he mea hoehaeha loa ia Iaʻu, wahi a ko oukou Haku; nolaila, hoouna aku la Au ia lakou e ao ikaika ia.

11. He oiaio, ke olelo aku nei Au ia oukou, o Koʻu makemake ia e kukulu oukou i hale. Ina e malama oukou i Kuu mau kauoha, e loaa no ia oukou ka mana e kukulu ia mea;

12. Ina e malama ole oukou i Kuu mau kauoha, aole a mau ke aloha o ka Haku me oukou, nolaila, e hele auanei oukou iloko o ka pouli.

13. Ano, eia ka naauao a me ka makemake o ka Haku; e kukulu ia ka hale, aole mamuli o ke ano o ko ke ao nei, no ka mea, aole Au i haawi aku ia oukou e noho oukou mamuli o ke ano o ko ke ao nei;

14. Nolaila, e kukulu ia ia mamuli o ke ano Aʻu e hoike aku ai i ekolu o oukou, a oukou e koho a hoolilo ai no keia mana.

15. A o kona nui he kanalima-kumamalima kapuai ka laula, a he kanaono-kumamalima kapuai ka loa, ma ke keena oloko:

16. A o ka hapa malalo o ke keena oloko e hoolaa ia Noʻu no ka oukou malama ana i ka Ahaaina a ka Haku, a me ka oukou haiolelo ana, a me ka oukou hookeai ana, a me ka oukou pule ana, a me ka haawi ana mai i ka oukou mau makemake hemolele loa Iaʻu, wahi a ko oukou Haku.

17. A o ka hapa maluna o ke keena oloko e hoolaa ia ia Noʻu, no ke kula o Kuu mau Aposetolo, wahi a ke Keiki a Amana]; a, ma kekahi olelo ana, Alepa; a ma kekahi olelo ana, Omega; he oiaio, o Iesu Kristo ko oukou Haku. Amene.