1. E nana a e hoolohe mai, e na kanaka o Ziona, a me oukou na kanaka a pau o Kuu Ekalesia, ka poe ma kahi mamao, a e lohe i ka olelo a ka Haku Aʻu i haawi aku ai i Kuu kauwa ia Iosepa Kamika, opio, a me Kuu kauwa o Makini Hailaki no hoi, a i Kuu kauwa ia Oliva Kaudare no hoi, a i Kuu kauwa ia Ioane Witima no hoi, a i Kuu kauwa ia Sidane Rigedona no hoi, a i Kuu kauwa ia Wiliama W. Pelepa no hoi, ma ke ano he kauoha ia lakou.

2. No ka mea, ke haawi aku nei Au ia lakou he kauoha; no ia mea, e haliu a hoolohe mai, no ka mea, penei wahi a ka Haku ia lakou—

3. Naʻu, na ka Haku, i koho ia lakou, a hoolilo ia lakou i mau kahu malama waiwai maluna o na hoikeana a me na kauoha Aʻu i haawi aku ai ia lakou, a me na mea Aʻu e haawi aku ana ia lakou ma keia hope aku;

4. A e koi no Au mai o lakou mai i kekahi palapala hoike o ko lakou oihana kahu malama waiwai ma ka la o ka hookolokolo ana.

5. No ia mea, ua koho Au na lakou, a o keia ka lakou hana iloko o ka Ekalesia o ke Akua, e malama ia mau mea a me na mea e pili ana ia mau mea; he oiaio, a me na pomaikai o ia mau mea.

6. No ia mea, he kauoha Kaʻu e haawi aku nei ia lakou, aole e haawi lakou i keia mau mea i ka Ekalesia, aole hoi i ko ke ao nei:

7. Eia no nae, ina e loaa ana ia lakou a oi aku mamua o ka lawa pono no ko lakou mau mea i nele ai a me ko lakou mau hemahema, e haawi ia aku ia i Kuu hale-hoahu,

8. A o na pomaikai e hoolaa ia no ia no na kanaka o Ziona, a i ko lakou mau hanauna, ina e lilo lakou i mau hooilina mamuli o na kanawai o ke aupuni.

9. Aia hoi, o keia ka ka Haku e makemake nei mai kela a me keia kanaka ma kana oihana kahu malama waiwai, he oiaio, e like me Aʻu, ka Haku, i koho ai, a i ole, e koho aku ai i kekahi kanaka ma keia hope aku.

10. A aia hoi, aole kekahi poe no ka Ekalesia o ke Akua ola, e kaa mawaho ae o ka mana o keia kanawai.

11. He oiaio, aole o ka Bihopa, aole hoi ka agena ka mea e malama ana i ko ka Haku hale-hoahu, aole no hoi ka mea i koho ia no kekahi oihana kahu malama waiwai maluna o na mea o ko ke kino;

12. O ka mea i koho ia e lawelawe i na mea i pili i ko ka uhane, ua kupono no ia no kona uku, he oiaio, e like me ka poe i koho ia i kekahi oihana kahu malama waiwai e lawelawe ma na mea pili i ko ke kino;

13. Ae, he oiaio, e oi loa ana, a o ua oi loa ana nei ua hoomahuahua ia no lakou ma o na hoike ana la o ka Uhane;

14. Eia no nae, ma ka oukou mau mea pili i ko ke kino e likealike oukou, a o keia aole ma ke ano minamina, i ole ia e kaohi ia ua oi loa ana nei o na hoike ana a ka Uhane.

15. Ano ke haawi aku nei Au i keia kauoha i Kuu mau kauwa no ko lakou pomaikai, oiai lakou e ola ana, i hoike no Koʻu mau hoopomaikai maluna o ko lakou mau poo, a i uku no ko lakou hooikaika a no ko lakou palekana;

16. No na mea ai a me ka aahu; no kekahi hooilina; no na hale, a no na aina, a ma kela a me keia kulana Aʻu, a ka Haku, e hoonoho ai ia lakou, a ma kela a me keia wahi Aʻu, ka Haku, e hoouna aku ai ia lakou;

17. No ka mea, ua kupaa lakou maluna o na mea he nui, a ua maikai ka lakou i hana ai, ke ole lakou i hana hewa.

18. Aia hoi, he aloha Au, ka Haku, a e hoopomaikai no ia lakou, a e komo no lakou iloko o ka olioli o keia mau mea. Pela io no. Amene.