1. E hoolohe mai i ka leo o ka Haku ko olua Akua, oia hoi, ka Alepa a me ka Omega, ka hoomaka ana a me ka hopena, o Kona alahele he hookahi mau loa no ia, ka Mea hookahi i keia la e like me nehinei, a no ka wa mau loa.

2. Owau no o Iesu Kristo, ke Keiki a ke Akua, ka Mea i kaulia ia no na hewa o ko ke ao nei, no ka poe a pau e manaoio mai ana ma Koʻu inoa, i lilo ai lakou i mau keiki na ke Akua, oia hoi, he hookahi iloko Oʻu e like me Aʻu iloko o ka Makua, e like me ka hookahi o ka Makua iloko Oʻu, i hookahi ai kakou.

3. Aia hoi, he oiaio, he oiaio, ke olelo aku nei Au i Kuu kauwa, ia Sidane, ua nana aku Au maluna ou a me kau mau hana. Ua lohe Au i kau mau pule, a ua hoomakaukau ia oe no kekahi hana i oi ae.

4. Pomaikai oe, no ka mea, e hana ana oe i kekahi mau mea nui. Aia hoi, ua hoouna ia aku oe, e like la me Ioane, e hoomakaukau i ke alanui mamua Oʻu, a mamua o Elaika, ka mea e hele mai ana, a aole nae oe i ike.

5. Bapetizo iho la oe me ka wai no ka mihi, aka, aole i loaa ia lakou ka Uhane Hemolele;

6. Aka, ano, ke haawi aku nei Au ia oe he kauoha, e bapetizo oe me ka wai, a e loaa ia lakou ka Uhane Hemolele ma o ke kau ana la o na lima, e like me na Aposetolo o ka wa kahiko.

7. A eia kekahi, e hoea mai auanei he hana nui ma ka aina, oia hoi mawaena o ka poe Genetile, no ka mea, o ka lakou mau hana lapuwale a me ka lakou mau hana hoopailua e hoike ia auanei ia imua o na maka o na kanaka a pau;

8. No ka mea, Owau ke Akua, a aole i hoopokole ia Koʻu lima; a e hoike aku no Au i na hana mana, na hoailona, a me na mea kupaianaha, i ka poe a pau e manaoio ana ma Kuu inoa.

9. A o ka mea e noi mai ana ma Koʻu inoa me ka manaoio, o lakou ke mahiki aku i na daimonio; e hoola lakou i ka poe mai, a e haawi i ka ike i na makapo, a me ka lohe i na kuli, a i na aa e olelo aku, a i na oopa e hele;

10. A ke hele awiwi mai nei ka manawa e hoike ia ai na mea nui i na keiki a kanaka;

11. Aka, ke ole ka manaoio aole kekahi mea e hoike ia aku koe wale no na hooneoneo ana maluna o Babulona, ka mea hookahi nana i hoohainu i na lahuikanaka a pau i ka waina o ka inaina o kona moekolohe ana.

12. A aole kekahi mea e hana maikai nei koe wale no ka poe i makaukau e apo aku i ka piha o Kuu Euanelio, ka mea Aʻu i hoouna aku ai i keia hanauna.

13. No ia mea, ke kahea aku nei Au i na mea nawaliwali o ke ao nei, ka poe i ao ole ia a i hoowahawaha ia, e hahau i na lahuikanaka ma o ka mana la o Kuu Uhane:

14. A o ko lakou lima Koʻu lima auanei ia, a e lilo auanei Au i palekaua a i kaeikaua no lakou; a e kaei no Au i ko lakou mau puhaka, a e kaua wiwo ole lakou Noʻu; a e kaa ko lakou mau enemi malalo iho o ko lakou mau wawae; a e hoohaule no Au i ka pahikaua no ko lakou pono, a ma o ke ahi la o Kuu inaina e hoopakele ai Au ia lakou.

15. A o ka poe hune a me ka poe haahaa, e hai ia ka Euanelio ia lakou, a e nana ana lakou imua no ka manawa o Koʻu hiki ana aku, no ka mea, ua kokoke mai no ia:

16. A e hoomaopopo no lakou i ka olelo nane o ka laau piku, no ka mea, ano ua aneane mai ke kau mehana,

17. A ua hoouna aku Au i ka piha o Kuu Euanelio ma o ka lima la o Kuu kauwa, o Iosepa; a iloko o ka nawaliwali i hoopomaikai aku ai Au ia ia,

18. A ua haawi aku Au ia ia i na ki o na mea pohihihi o na mea i sila ia, oia hoi, na mea mai ka hookumu ia ana o ke ao nei, a me na mea e hiki mai ana mai keia manawa a hiki i ka manawa o Koʻu hiki ana aku, ina e kupaa oia iloko Oʻu, a ina aole, he mea okoa Kaʻu e hoonoho ai ma kona wahi.

19. No ia mea, e kiai maluna ona i kuemi ole ai kona manaoio, a e haawi ia ia mea ma o ka Uhane Kokua la, ka Uhane Hemolele, ka Mea i ike i na mea a pau:

20. A he kauoha Kaʻu e haawi aku nei ia oe, e kakau oe nona; a e haawi ia ka Palapala Hemolele, e like me ia iloko o Koʻu naau, i ka hoola ia ana o Koʻu poe ponoi i wae ia;

21. No ka mea, e lohe ana lakou i Koʻu leo, a e ike ana Iaʻu, a aole lakou e hiamoe ana, a e hoomanawanui ana i ka la o Koʻu hiki ana aku, no ka mea, e hoomaemae ia lakou e like me Koʻu maemae.

22. A ano, ke olelo aku nei Au ia oe, e kali oe me ia, a e hele pu oia me oe; mai haalele ia ia, a he mea oiaio e hooko ia keia mau mea.

23. A ina e kakau ole oe, aia hoi, e haawi ia ia ia ia e wanana: a e hai oe i Kuu Euanelio a e kahea i na Kaula hemolele e hooiaio i kana mau olelo, e like me ia e haawi ia ai ia ia.

24. E malama i na kauoha a pau a me na berita o olua i hoopaa ia ai; a e hoonaueue no Au i na lani no ko olua pono, a e haalulu no o Satana a e hauoli o Ziona maluna o na puu a ulu mahiehie,

25. A e hoola ia o Iseraela iloko o Koʻu manawa kupono; a ma o na ki la Aʻu i haawi aku ai e alakai ia ai lakou, a aole loa e hoopilihua hou ia.

26. E hapai i ko olua mau naau a e olioli, ke hookokoke mai nei ko olua hoolapanai ia ana.

27. Mai makau, e ka pu-a hipa uuku, no oukou ke aupuni a hiki aku Au. Aia hoi, e hiki koke aku ana Au. Pela io no. Amene.