1. Owai ke kumu o Iese i olelo ia ma na pauku 1, 2, 3, 4 a me 5 o ka mokuna 11 o Isaia?

2. He oiaio, penei wahi a ka Haku, o Kristo no ia.

3. Owai ka lala i olelo ia ma ka pauku mua o ka mokuna 11 o Isaia e kupu ae ana mai ke kumu mai o Iese?

4. Aia hoi, penei wahi a ka Haku, He kauwa ia iloko o na lima o Kristo, he mamo na Iese ma kekahi ano, a na Eperaima no hoi, a i ole no ka hale o Iosepa, maluna ona i hooili ia ai he mana nui.

5. Heaha ka mole [lala] o Iese i olelo ia ma ka pauku 10 o ka mokuna 11?

6. Aia hoi, penei wahi a ka Haku, he mamo ia na Iese, a me Iosepa no hoi, nona ke kuleana pololei i ka Oihanakahuna a me na ki o ke aupuni, i hae, a no ka houluulu ana i Kuu poe kanaka ma na la hope.

7. He mau ninau na Elia Higebi mai, penei: “Heaha ka manao o ke kauoha ma Isaia, mokuna 52, pauku 1, e olelo ana, e aahu i kou ikaika, e Ziona? A owai la na kanaka a Isaia i olelo ai?”

8. Olelo mai la oia no ka poe a ke Akua e kahea ai ma na la hope, ka poe e paa ana i ka mana o ka Oihanakahuna e lawe hou mai ia Ziona, a me ka hoola ana i ka Iseraela; a o ka aahu ana i kona ikaika, oia ka aahu ana i ka mana o ka Oihanakahuna, ka mea nona (no Ziona) ke kuleana ma o na mamo pololei; a pela no hoi e hoi hou aku ai i kela mana i lilo ai mai ia ia aku.

9. “Heaha ka kakou e hoomaopopo ai ma ko Ziona wehe ana ia ia iho mai na apo paa o kona ai, pauku 2?”

10. E hoomaopopo kakou, ua kauleo ia na koena i hoopuehu ia e hoi hou i ka Haku kahi a lakou i haule mai ai, a ina lakou e hooko ia mea, alaila, o ka olelo-paa a ka Haku, oia keia, e olelo ana Oia ia lakou, a i ole, e haawi mai ana i hoikeana ia lakou. E nana i na pauku 6, 7, a me 8. O na apo paa o kona ai, oia na hoino a ke Akua maluna iho ona, a i ole, maluna o ke koena o ka Iseraela ma ko lakou noho kauliilii ana mawaena o ka poe Genetile.