1. E haliu mai a hoolohe i ka leo o ka Haku, e ka poe i hoakoakoa pu ia oukou iho, na Kahuna Kiekie o Kuu Ekalesia, ka poe i haawi ia aku ai ke aupuni a me ka mana.

2. No ka mea, he oiaio, penei wahi a ka Haku, he mea kupono iloko Oʻu e koho ia kekahi Bihopa no oukou, a i ole, maiwaena mai o oukou, no ka Ekalesia ma keia hapa o ko ka Haku malawaina;

3. A he oiaio, ma keia mea ua ku i ka naauao ka oukou i hana ai, no ka mea, ua makemake ia e ka Haku, mai ka lima o kela a me keia kahu malama waiwai, e waiho aku i kekahi palapala hoike o kana oihana kahu malama waiwai, no keia wa a no ka wa mau loa.

4. No ka mea, o ka poe kupaa a naauao i keia wa, ua manao ia he kupono e noho ma na wahi i hoomakaukau ia no lakou e Koʻu Makua.

5. He oiaio, ke olelo nei Au ia oukou, na Lunakahiko o ka Ekalesia ma keia hapa o Koʻu malawaina, e waiho aku i palapala hoike no ka lakou oihana kahu malama waiwai i ka Bihopa e koho ia aku ana e Aʻu, ma keia hapa o Koʻu malawaina.

6. A e hoopaa ia keia mau mea iloko o ka mooolelo, e haawi ia ae i ka Bihopa o Ziona;

7. A e hoike ia ka hana a ka Bihopa ma o na kauoha la i haawi ia aku ai, a me ka leo o ka huikuka.

8. A ano, he oiaio, ke olelo aku nei Au ia oukou, o Kuu kauwa, o Nuela K. Witine, ke kanaka e koho ia aku ana a e hoolilo ia i keia mana. O keia ka makemake o ka Haku ko oukou Akua, ko oukou Hoolapanai. Pela io no. Amene.

9. Ka olelo a ka Haku, e pakui ana i ke kanawai i haawi ia aku, e hoike ana i ka hana a ka Bihopa i hoolilo ia no ka Ekalesia ma keia hapa o ka malawaina, a he oiaio, oia keia:

10. E malama i ko ka Haku hale-hoahu; e ohi mai i na waiwai o ka Ekalesia ma keia hapa o ka malawaina;

11. E malama i ka hoike a na Lunakahiko me ia i kauoha ia ai mamua; a e kokua i ko lakou mau mea i hemahema ai, a e uku mai nae lakou no na mea a lakou e loaa aku ai, ina ua loaa ia lakou na mea e uku aku ai;

12. I hoolaa ia ai no hoi keia no ka pono o ka Ekalesia, no ka poe ilihune a me ka poe nele;

13. A o ka mea i loaa ole ka mea e uku aku ai, e hoopaa ia he hoike o kona aie a e haawi ia ae ia i ka Bihopa o Ziona, a nana e uku i ka aie mailoko mai o ka mea a ka Haku e waiho aku ai iloko o kona mau lima;

14. A na na hana o ka poe kupaa e hana ana ma na mea pili uhane, ma ka lawelawe ana i ka Euanelio a me na mea o ke aupuni i ka Ekalesia, a i ko ke ao nei, e uku i ka aie i ka Bihopa ma Ziona;

15. Pela i unuhi ia mai ai ia mailoko mai o ka waiwai o ka Ekalesia, no ka mea, i ku like ai me ke kanawai, o kela a me keia kanaka e pii mai ana i Ziona, e waiho oia i na mea a pau imua o ka Bihopa ma Ziona e pono ai.

16. A ano, he oiaio, ke olelo aku nei Au ia oukou, oiai e haawi aku kela a me keia Lunakahiko ma keia hapa o ka malawaina i ka palapala hoike o kana oihana kahu malama waiwai i ka Bihopa ma keia hapa o ka malawaina e pono ai,

17. Na kekahi palapala hooia mai ka lunakanawai, a i ole Bihopa, ma keia hapa o ka malawaina i ka Bihopa ma Ziona, e hoapono i kela a me keia kanaka, a e pane ma na mea a pau no kekahi hooilina, a e hookipa ia oia he kahu malama waiwai naauao, a he paahana kupaa a hoopono;

18. A i ole pela, aole oia e apono ia e ka Bihopa o Ziona.

19. A ano, he oiaio, ke olelo aku nei Au ia oukou, O kela a me keia Lunakahiko e haawi ana i kana palapala hoike i ka Bihopa o ka Ekalesia, ma keia hapa o ka malawaina, e apono ia e ka apana o ka Ekalesia, a mau apana o ka Ekalesia paha, ma kahi ana e hana ana, i hiki ai ia ia ke hoike aku ia ia iho a me kana mau palapala hoike me ke apono ia ma na mea a pau.

20. A ano, he kuleana ko Kaʻu mau kauwa i koho ia i mau kahu malama waiwai maluna o na mea pili palapala o Kuu Ekalesia, e koi i ke kokua ana mai ka Bihopa mai, a mau Bihopa paha, ma na mea a pau,

21. I hoolaha ia ai na hoikeana, a laha aku ma na welelau o ka honua, i loaa ai no hoi ia lakou na waiwai e pomaikai ai ka Ekalesia ma na mea a pau,

22. I hiki no hoi ia lakou ke hoike aku ia lakou iho me ke apono ia ma na mea a pau, a e helu ia he mau kahu malama waiwai naauao.

23. A ano, aia hoi, e lilo keia i kumuhoohalike no na apana nunui a pau o Kuu Ekalesia ma o a ma o, ma kela a me keia aina kahi e kukulu ia ai lakou. A ano ke hoopau nei Au i Kaʻu mau olelo ana. Amene.

24. He mau olelo kakaikahi e pakui aku ana i na kanawai o ke aupuni, e pili ana i na lala o ka Ekalesia. O ka poe i koho ia ma o ka Uhane Hemolele la e pii aku i Ziona, a me ka poe i haawi ia ke kuleana e pii aku i Ziona,

25. E lawe aku lakou i ka Bihopa i kekahi palapala hooia mai na Lunakahiko ekolu o ka Ekalesia mai, a i ole, i palapala hooia mai ka Bihopa mai,

26. I ole pela, o ka mea e pii aku ana i ka aina o Ziona, aole e helu ia oia he kahu malama waiwai naauao. He kumuhoohalike no hoi keia. Amene.