1. He oiaio Kaʻu e olelo nei ia oukou, e Kuu mau hoaloha, aia hoi, e haawi no Au ia oukou he hoikeana a kauoha hoi, i maopopo ai ia oukou ke ano o ka lawelawe ana ma ka hooko ana i ka oukou mau hana e pili ana i ka hoola ana a me ka hoolapanai ana i ko oukou mau hoahanau i hoopuehu ia ma ka aina o Ziona;

2. I hookuke ia a hahau ia e na lima o Kuu mau enemi, maluna hoi o lakou Au e ninini ai i Kuu inaina me ke ana ole ma Koʻu wa ponoi iho;

3. No ka mea, ua hookuu Au ia lakou pela, i hoopiha ai lakou i ke ana o ka lakou mau hana hewa, i piha ai hoi ko lakou kiaha;

4. I ao ia a hoopai ia ka poe e kapa nei ia lakou iho ma Koʻu inoa, no kekahi wa pokole me kekahi hoopai eha a kaumaha, no ka mea, aole lakou i hoolohe ma na ano a pau i na olelo-ao a me na kauoha Aʻu i haawi ai ia lakou.

5. Aka, he oiaio Kaʻu e olelo aku nei ia oukou, ua hoopuka aku Au i kekahi kauoha na Koʻu poe kanaka e hoomaopopo ai, ke hoolohe lakou mai keia hora aku i na olelo-ao Aʻu, ka Haku ko lakou Akua, e haawi ai ia lakou.

6. Aia hoi, e hoomaka lakou e lanakila maluna o Koʻu mau enemi mai keia hora ano, no ka mea, ua hooholo aku Au ia mea,

7. A ma ka haliu ana mai e malama i na olelo a pau Aʻu, ka Haku ko oukou Akua, e olelo ai ia lakou, aole e pau ko lakou lanakila ana a hiki i ka hoopio ia ana o na aupuni o ke ao nei malalo o Kuu mau wawae a haawi ia ka honua i ka Poe Hoano i wahi e noho ai no ka wa mau loa a mau loa.

8. Aka, ina e malama ole lakou i Kaʻu mau kauoha, a haliu ole mai e malama i Kaʻu mau olelo a pau, e lanakila no na aupuni o ke ao nei maluna o lakou,

9. No ka mea, ua hoonoho ia aku lakou i malamalama no ke ao nei, a e lilo i poe hoola no na kanaka;

10. A ina aole lakou i poe hoola no kanaka, ua like lakou me he paakai la i pau kona liu, a he waiwai ole ma ia hope aku, aka e kiola ia i waho a hehi ia e na wawae o kanaka.

11. Aka, he oiaio Kaʻu e olelo aku nei ia oukou, ua kauoha aku Au e hoi hou mai ko oukou poe hoahanau i hoopuehu ia, i ka aina o ko lakou mau hooilina, a e kukulu ae i na wahi oneanea o Ziona;

12. No ka mea, mahope o na popilikia he nui, e like me Kaʻu i olelo ai ia oukou ma kekahi kauoha mamua, e hiki mai no ka pomaikai.

13. Aia hoi, o keia ka pomaikai Aʻu i olelopaa ai mahope o ko oukou mau popilikia a me na popilikia o ko oukou poe hoahanau; ko oukou hoolapanai ia ana a me ka hoolapanai ia ana o ko oukou mau hoahanau, oia hoi, ko lakou hoihoi hou ia ana i ka aina o Ziona, e kukulu ia aole e hoohiolo hou ia;

14. Aka nae, ina e hoohaumia lakou i ko lakou mau hooilina, e hoolei ia lakou ilalo, no ka mea, aole Au e hoopakele ia lakou ke hoohaumia lakou i ko lakou mau hooilina.

15. Aia hoi, ke olelo aku nei Au ia oukou, e hiki mai no ka hoolapanai ia ana o Ziona ma o ka mana la e pono ai;

16. Nolaila, e hoala mai Au no Kuu poe kanaka i kekahi kanaka e alakai ia lakou e like me Mose la i alakai ai i na keiki o ka Iseraela,

17. No ka mea, o oukou na keiki o ka Iseraela, a o ka hua a Aberahama, a e alakai ia oukou mai ka noho luhi ana ma o ka mana la e pono ai, a me ka lima i hohola ia aku;

18. A e like me ke alakai ia ana o ko oukou mau kupuna mamua, pela no auanei ka hoolapanai ia ana o Ziona.

19. Nolaila, mai paupauaho ko oukou mau naau, no ka mea, aole Au e olelo aku nei ia oukou e like me Kaʻu i olelo ai i ko oukou mau kupuna, o Kuu anela ke hele mamua o oukou, aka, aole Owau;

20. Aka, ke olelo aku nei Au ia oukou, o Kuu mau anela ke hele mamua o oukou, a Owau pu no hoi, a i ka wa pono e loaa ia oukou ua aina maikai la,

21. He oiaio, he oiaio, Kaʻu e olelo aku nei ia oukou, o Kaʻu kauwa o Iosepa Kamika, opio, ke kanaka Aʻu i hoohalike ai me ke kauwa a ka Haku o ka malawaina i olelo ia ma ka olelonane Aʻu i haawi ai ia oukou.

22. Nolaila, e olelo aku Kuu kauwa o Iosepa Kamika, opio, i ka ikaika o Kuu hale, Kuu poe opio a me ka poe aoo, e hoakoakoa ia oukou iho ma ka aina o Ziona, maluna o ka aina Aʻu i kuai ai me na dala i hoolaa ia mai Naʻu;

23. A e hoouna na apana a pau o ka Ekalesia i poe kanaka naauao me ka lakou mau dala, a e kuai i mau aina e like me Kaʻu i kauoha ai ia lakou;

24. A ina e hele mai Kuu mau enemi e kue ia oukou a e hookuke ia oukou mai Kuu aina maikai aku Aʻu i hoolaa ai e lilo i aina o Ziona; oia hoi, mai ko oukou mau aina ponoi ae mahope o keia mau hoike a oukou i lawe mai ai imua Oʻu e kue ia lakou, e hoino oukou ia lakou;

25. A o ka poe a oukou e hoino ai, e hoino no Au, a e hoopai oukou i Kuu mau enemi Noʻu;

26. A Owau pu me oukou ma ka hoopai ana i Kuu mau enemi, a hiki aku i ke kuakahi a me ke kualua o na hanauna o ka poe e inaina mai ana Iaʻu.

27. Mai makau kekahi kanaka e haawi i kona ola Noʻu, no ka mea, o ka mea e haawi ana i kona ola Noʻu e loaa hou ia ia ia;

28. A o ka mea e ae ole ana e haawi i kona ola Noʻu, aole ia Kaʻu haumana.

29. O Koʻu makemake ia e hookiekie ae Kuu kauwa, o Sidane Rigedona, i kona leo iloko o na anaina ma na aina o ka hikina, ma ka hoomakaukau ana i na apana o ka Ekalesia e malama i na kauoha Aʻu i haawi aku ai ia lakou e pili ana i ka hoihoi hou ia ana a me ka hoolapanai ia ana o Ziona.

30. O Koʻu makemake ia aole e hoi aku Kuu kauwa, o Pale P. Parata, a me Kuu kauwa, o Laimana Waita, i ka aina o ko laua mau hoahanau, a hiki i ka loaa ana o na puali kanaka e pii aku i ka aina o Ziona, ma ka pa-umi, a i ole ma ka pa-iwakalua, a i ole, pa-kanalima, a i ole pa-haneri, a hiki i ka loaa ana o ka heluna o elima haneri o ka ikaika o Kuu hale.

31. Aia hoi, o keia Koʻu makemake, e noi a e loaa ia oukou, aka, aole hana na kanaka i Koʻu makemake i na wa a pau;

32. Nolaila, ina aole e hiki ia oukou ke loaa he elima haneri, e imi ikaika aku, malia paha e loaa ia oukou he ekolu haneri;

33. A ina aole e hiki ia oukou ke loaa he ekolu haneri, e imi ikaika, malia o loaa ia oukou he hookahi haneri.

34. Aka, he oiaio Kaʻu e olelo aku nei ia oukou, he kauoha Kaʻu e haawi aku nei ia oukou, aole oukou e pii aku i ka aina o Ziona, a hiki i ka loaa ana he hookahi haneri o ka ikaika o Kuu hale, e pii pu ai me oukou i ka aina o Ziona.

35. Nolaila, e like me Kaʻu i olelo aku ai ia oukou, e noi a e loaa ia oukou; e pule ikaika malia paha e hele pu Kuu kauwa, o Iosepa Kamika, opio, me oukou, a hoomalu mawaena o Kuu poe kanaka, a kukulu i Kuu aupuni maluna o ka aina i hoolaa ia, a kukulu i na keiki o Ziona maluna o na kanawai a me na kauoha i haawi ia aku, a e haawi ia aku ana auanei ia oukou.

36. Ua lawe ia mai ka lanakila a me ka nani a pau ia oukou la ma o ka oukou hooikaika, kupaa, a me na pule o ka manaoio.

37. E kaahele pu Kuu kauwa, o Pale P. Parata, me Kuu kauwa, o Iosepa Kamika, opio.

38. E kaahele pu Kuu kauwa, o Laimana Waita, me Kuu kauwa, o Sidane Rigedona.

39. E kaahele pu Kuu kauwa, o Hailama Kamika, me Kuu kauwa, o Federika G. Wiliama.

40. E kaahele pu Kuu kauwa, o Oresona Haida, me Kuu kauwa, o Oresona Parata, ma na wahi a pau a Kuu kauwa o Iosepa Kamika, opio, e kuhikuhi aku ai ia laua, i loaa ai ka hooko ia ana o keia mau kauoha Aʻu i haawi ai ia oukou, a waiho i ke koena iho iloko o Kuu mau lima. Pela io no. Amene.