1. He oiaio, penei wahi a ka Haku ia oukou, ka poe i hoakoakoa pu ia oukou iho e loaa mai Kona makemake e pili ana ia oukou.

2. Aia hoi, he mea oluolu keia i ko oukou Haku, a ke hauoli nei na anela maluna o oukou; ua hoea mai na manawalea o ka oukou mau pule i na pepeiao o ka Haku o Sabaota, a ua hoopaa ia iloko o ka buke o na inoa o ka poe i hoomaemae ia: oia hoi, ka poe o ke ao celesetiela.

3. No ia mea, ke hoouna aku nei Au maluna o oukou i kekahi Uhane Kokua hou ae, oia hoi, maluna o oukou Koʻu mau hoaloha, i noho ai ia iloko o ko oukou mau naau, he oiaio, o ka Uhane Hemolele o ka olelo hoopomaikai; o ua Uhane Kokua hou ae la ka mea hookahi no Aʻu i olelo paa aku ai i Kaʻu mau haumana, e like me ia i palapala ia iloko o ka olelo hoike a Ioane.

4. O keia Uhane Kokua oia ka olelo hoopomaikai Aʻu e haawi aku nei ia oukou no ke ola mau loa; he oiaio, o ka nani o ke aupuni celesetiela:

5. Oia ka nani o ka Ekalesia o ka Hanaumua; oia hoi, o ke Akua ka Mea hemolele loa o na mea a pau, ma o Iesu Kristo la Kana Keiki:

6. Ka Mea i pii ae i luna lilo, me ia no hoi Oia i iho aku ai malalo o na mea a pau; ma ia mea i hoomaopopo ai Oia i na mea a pau, i hiki ai ia Ia ke noho iloko o na mea a pau a komohia mai o a o o na mea a pau, ka malamalama o ka oiaio;

7. Oia ka oiaio e olino nei. O keia ka malamalama o Kristo. Me ia no hoi Oia iloko o ka la, a me ka malamalama o ka la, a me ka mana o ia mea a ma o ua mea la i hana ia ai ia.

8. Me ia no hoi Oia iloko o ka mahina, a Oia ka malamalama o ka mahina, a me ka mana o ia mea ma o ua mea la ia i hana ia ai.

9. A pela no hoi ka malamalama o na hoku, a me ka mana o lakou a ma o ua mea la lakou i hana ia ai.

10. A me ka honua no hoi, a me ka mana ona; he oiaio, ka honua kahi au e ku nei.

11. A o ka malamalama e olino nei, ka mea e haawi nei i ka malamalama ia oukou ma Ona la no ia, ka Mea e hoomaamaama nei i ko oukou mau maka, o ka malamalama hookahi no e hoalaala nei i ko oukou mau hoomaopopo ana;

12. Oia ka malamalama e puka mai nei mai ke alo mai o ke Akua e hoopiha i ke kowa akea loa.

13. Ka malamalama iloko o na mea a pau; ka mea e haawi ana i ke ola i na mea a pau: ke kanawai hoi ma o na la e hoomalu ia nei na mea a pau: oia hoi, ka mana o ke Akua, ka Mea e noho nei maluna o Kona nohoalii, ka Mea iloko o ka poli o ka wa mau loa, ka Mea iwaenakonu o na mea a pau.

14. Ano, he oiaio, ke olelo aku nei Au ia oukou, ma o ka hoolapanai ana i hana ia no oukou, i hiki mai ai ke alahouana mai ka make mai.

15. A o ka uhane a me ke kino oia ka uhane me ke kino o ke kanaka.

16. A o ke alahouana mai ka make mai oia ka hoolapanai ia ana o ka uhane me ke kino;

17. A o ka hoolapanai ia ana o ka uhane me ke kino ma Ona la no ia, ka Mea e hoalaala nei i na mea a pau, a iloko o Kona poli i hooholo ia ai e lilo ai ka honua i ka poe ilihune a me ka poe haahaa ona.

18. Nolaila, he mea pono e hoomaemae ia ia mai na mea pono ole mai a pau, i makaukau ai ia no ka nani celestiela;

19. No ka mea, mahope iho o kona hooko ana i ke kumu o kona hana ia ana, e hoolei ia ia me ka nani, oia hoi, me ka launa pu ana o ke Akua ka Makua;

20. I loaa ai ia mea i na kino o ke aupuni celesetiela no ka wa mau loa a mau loa; no ka mea, no keia kumu i kukulu a i hana ia ai ia, a no keia kumu hoi lakou i hoomaemae ia ai.

21. A o ka poe i hoomaemae ole ia ma o ke kanawai la Aʻu i haawi aku ai ia oukou, oia hoi, ke kanawai o Kristo, e loaa kekahi aupuni okoa ae e pono ai, oia hoi, o ke aupuni teresetiela, a i ole, o ke aupuni tilesetiela,

22. No ka mea, o ka mea e hiki ole ke malama i ke kanawai o kekahi aupuni celesetiela, aole e hiki ke ku i kekahi nani celestiela:

23. A o ka mea e hiki ole ke malama i ke kanawai o kekahi aupuni teresetiela, aole e hiki ke ku i kekahi nani teresetiela:

24. A o ka mea e hiki ole ke malama i ke kanawai o kekahi aupuni tilesetiela, aole e hiki ke ku i kekahi nani tilesetiela; nolaila, aole oia i kupuno no kekahi aupuni o ka nani. Nolaila, e ku oia e pono ai ma kekahi aupuni, aole he aupuni o ka nani.

25. A eia hou, he oiaio, ke olelo aku nei Au ia oukou, ke malama nei ka honua i ke kanawai o kekahi aupuni celesetiela, no ka mea, ke hooko nei ia i ke kumu o kona hana ia ana, a ke uhaki ole nei i ke kanawai.

26. No ia mea, e hoomaemae ia ana ia; he oiaio, me ka nana ole e make ana ia, e hoalaala hou ia ana nae ia, a e ku ma ka mana ona i hoalaala ia ai, a e noho ka Poe Hoano maluna ona:

27. No ka mea, me ka nana ole e make ana lakou, e alahou mai ana no hoi lakou he kino uhane:

28. O ka poe o ka uhane celesetiela e loaa ia lakou ke kino hookahi no, oia hoi, ke kino maoli; he oiaio, e loaa ia oukou ko oukou mau kino, a o ko oukou nani oia kela nani o ko oukou mau kino i hoalaala ia ai.

29. O ka poe o oukou e hoalaala ia ma kekahi hapa o ka nani celesetiela, e loaa ia lakou ia mea hookahi, he oiaio, o ka piha ana.

30. A o ka poe e hoalaala ia ma kekahi hapa o ka nani teresetiela, a loaa ia lakou ia mea hookahi no, he oiaio, o ka piha ana;

31. A o ka poe no hoi i hoalaala ia ma kekahi hapa o ka nani tilesetiela e loaa ia lakou ia mea hookahi no, he oiaio, o ka piha ana;

32. A o ka poe e koe iho ana e hoalaala ia no hoi; aka nae, e hoi hou no lakou i ko lakou wahi ponoi, e hauoli iloko o ka mea a lakou i makemake ai e hookipa, no ka mea, aole lakou i makemake e hauoli iloko o ka mea i hiki ia lakou ke loaa mamua.

33. No ka mea, heaha ka pomaikai i kekahi kanaka, ina e hoili ia kekahi haawina maluna ona, a aole nae oia i hookipa mai ia haawina? Aia hoi, aole oia i hauoli iloko o ka mea i haawi ia aku ia ia, aole hoi i hauoli iloko o ka mea nana i haawi mai i ka haawina.

34. A eia hou, he oiaio, ke olelo aku nei Au ia oukou, o ka mea i hoomalu ia e ke kanawai, ua malama ia hoi e ke kanawai, a e hoohemolele ia a hoomaemae ia e ia mea hookahi no.

35. O ka mea e uhaki ana i kekahi kanawai, a ku ole ma ke kanawai, aka, imi aku e lilo i kanawai nona iho, a makemake e ku iloko o ka hewa, a ku ma na ano a pau iloko o ka hewa, aole e hiki ke hoomaemae ia e ke kanawai, aole hoi e ke aloha, ke kaulike, aole hoi e ka hoopai. Nolaila, e paumaele mau ana lakou.

36. Ua haawi ia kekahi kanawai i na aupuni a pau:

37. A he nui wale na aupuni; no ka mea, aole kekahi kowa i loaa ole kekahi aupuni; a aole kekahi aupuni i loaa ole kekahi kowa, ina he aupuni i nui ae a uuku iho paha.

38. A ua haawi ia i kela a me keia aupuni kekahi kanawai; a i kela a me keia kanawai aia he mau palena a he mau loina no hoi.

39. A o na mea ola a pau e ku ole ana ma ia mau loina aole e apono ia;

40. No ka mea, ke hoopili nei ka ike i ka ike; ke hookipa nei ka naauao i ka naauao; ke apo nei ka oiaio i ka oiaio; ke aloha nei ka maemae i ka maemae; ke hoopili nei ka malamalama i ka malamalama; ke nana oluolu nei ka lokomaikai i ka lokomaikai, a ke koi nei i kana ponoi; ke hoomau nei ke kaulike ma kona alahele, a ke koi nei i kana ponoi; ke hoomau nei ke kaulike ma kona alahele, a ke koi nei i kana ponoi; ke hele nei ka hoopai mamua o ke alo o ka Mea e noho ana maluna o ka nohoalii, e hoomalu ana a e hooko ana i na mea a pau;

41. Ke hoomaopopo nei Oia i na mea a pau, a aia na mea a pau imua Ona, a aia na mea a pau e poai puni ana ia Ia; a aia Oia maluna o na mea a pau, a iloko o na mea a pau, a e komohia ana mai o a o o na mea a pau, a e hoopuni ana i na mea a pau; a ma Ona la na mea a pau, a Nona mai, oia hoi, ke Akua, no ka wa mau loa a mau loa.

42. A eia hou, he oiaio, ke olelo aku nei Au ia oukou, ua haawi Oia i kekahi kanawai i na mea a pau a ma o ia mea la lakou e nee nei ma ko lakou mau manawa a me ko lakou mau kau;

43. A ua hoopaa ia ko lakou mau alahele; he oiaio, na alahele o na lani a me ka honua, ka mea hoi e apo ana i ka honua a me na hoku-hele a pau:

44. A ke haawi nei kekahi i kekahi i ka malamalama ma ko lakou mau manawa a ma ko lakou mau kau, ma ko lakou mau minute, ma ko lakou mau hora, ma ko lakou mau la, ma ko lakou mau hebedoma ma ko lakou mau malama, ma ko lakou mau makahiki: o keia mau mea a pau he hookahi makahiki ia i ke Akua, aka, aole nae i ke kanaka.

45. Ke kaa nei ka honua maluna o kona mau eheu, a ke haawi nei ka la i kona malamalama ma ke ao, a ke haawi nei ka mahina i kona malamalama ma ka po, a ke haawi mai nei no hoi na hoku i ko lakou malamalama, oiai lakou e kaa ana maluna o ko lakou mau eheu iloko o ko lakou nani, iwaenakonu o ka mana o ke Akua.

46. I ke aha la Au e hoohalike ai i keia mau aupuni, i hiki ai ia oukou ke hoomaopopo?

47. Aia hoi, he mau aupuni keia a pau, a o ke kanaka i ike i kekahi, a i ole, i ka mea uuku loa o keia mau mea, ua ike i ke Akua e nee ana iloko o Kona hanohano a me ka mana.

48. Ke olelo nei Au ia oukou, ua ike oia ia Ia, aka nae, o ka Mea i hele mai i Kona poe ponoi, aole i hoomaopopo ia.

49. Ke olino nei ka malamalama iloko o ka pouli, aole nae ka pouli i hoomaopopo ia mea; aka nae, e hiki mai ana ka la e hoomaopopo ai oukou i ke Akua, mamuli o ka hoalaala ia ana iloko Ona a ma Ona la.

50. Alaila, e hoomaopopo ai oukou ua ike oukou Iaʻu, a Owau no ia, Owau ka malamalama oiaio iloko o oukou, a eia oukou iloko Oʻu, i ole pela aole e hiki ia oukou ke ku.

51. Aia hoi, e hoohalike no Au i keia mau aupuni me kekahi kanaka i loaa kekahi mahinaai, a hoouna aku la i Kana poe kauwa iloko o ka mahinaai e mahi iloko o ka mahinaai;

52. A olelo aku la ia i ka mua, e hele oe e hana iloko o ka mahinaai, a ma ka hora mua e hele mai ai au i ou la, a e ike mai oe i ka olioli o koʻu helehelena;

53. A olelo aku la ia i ka lua, e hele no hoi oe iloko o ka mahinaai, a ma ka lua o ka hora e hele mai ai au e ike ia oe me ka olioli o koʻu helehelena;

54. A pela no hoi i ke kolu i ka i ana, e hele mai ana au e ike ia oe;

55. A i ka ha, a pela aku a hiki i ka umikumamalua.

56. A hele aku la ka haku o ka mahinaai i ka mua i ka hora mua, a kali pu me ia ma kela hora a pau, a ua hoohauoli ia oia me ka malamalama o ka helehelena o kona haku;

57. Alaila, hele mai la oia mai ka mua mai i hiki ai ia ia ke hele e ike i ka lua no hoi, a i ke kolu, a i ka ha, a pela aku a hiki i ka umikumamalua;

58. A pela i loaa ai ia lakou a pau ka malamalama o ka helehelena o ko lakou haku; o kela a me keia kanaka ma kona hora, a ma kona manawa, a ma kona kau;

59. E hoomaka ana mai ka mua, a pela aku a hiki i ka mea hope, a mai ka mea hope a hiki i ka mea mua, a mai ka mea mua a hiki i ka mea hope;

60. O kela a me keia kanaka ma kona manawa ponoi, a hiki i ka pau ana o kona hora, oia hoi, e like me ka kona haku i kauoha ai ia ia, i hoonani ia ai kona haku iloko ona, a oia iloko o kona haku, i hoonani ia ai lakou a pau.

61. Nolaila, me keia olelonane e hoohalike ai Au i keia mau aupuni a pau, a me na kanaka olaila, o kela a me keia aupuni ma kona hora, a me kona manawa, a ma kona kau; he oiaio, e like me ka olelo hooholo a ke Akua i olelo ai.

62. A eia hou, he oiaio, ke olelo aku nei Au ia oukou, e Koʻu mau hoaloha, ke waiho nei Au i keia mau olelo me oukou, e nalu iloko o ko oukou mau naau me keia kauoha Aʻu e haawi aku nei ia oukou, e kahea mai oukou maluna Oʻu oi kokoke Au;

63. E hookokoke mai Iaʻu a e hookokoke aku no Au io oukou la: e imi ikaika mai Iaʻu a e loaa no Au ia oukou; e noi a e loaa ia oukou; e kikeke a e wehe ia no ia ia oukou:

64. O kela a me keia mea a oukou e noi ai i ka Makua ma Koʻu inoa e haawi ia no ia ia oukou, o ka mea kupono nae no oukou;

65. A ina e noi mai oukou i kekahi mea i kupono ole no oukou, e huli no ia no ko oukou hoahewa ia ana.

66. Aia hoi, o ka mea a oukou e lohe nei ua like ia me ka leo o ka mea e kala ana ma ka waonahele—ma ka waonahele, no ka mea, aole i hiki ia oukou ke ike ia ia—o Koʻu leo, no ka mea, o Koʻu leo he Uhane no ia; o Koʻu Uhane he oiaio ia; e mau ana ka oiaio a aole hopena; a ina aia ia iloko o oukou e mau ana no ia.

67. A ina e kiakahi ko oukou maka i Koʻu nani, e hoopiha ia ko oukou mau kino holookoa me ka malamalama, a aole kekahi pouli iloko o oukou, a o kela kino i hoopiha ia me ka malamalama oia ka i hoomaopopo i na mea a pau.

68. Nolaila, e hoomaemae ia oukou iho i kiakahi ai ko oukou naau i ke Akua, a e hiki mai ana na la e ike ai oukou ia Ia; no ka mea, e wehe ae Oia i ka uhi o Kona helehelena ia oukou, a ma Kona manawa ponoi auanei no ia, a ma Kona ano iho, a mamuli o Kona makemake ponoi.

69. E hoomanao i ka olelo hoopomaikai nui a hope Aʻu i olelo aku ai ia oukou, e hookaawale ae i ko oukou mau manao waiwai ole a me ko oukou akaaka nui ana a mamao mai ia oukou aku;

70. E kali oukou, e kali oukou ma keia wahi, a e kahea i halawai hoano, he oiaio, o ka poe he mau paahana mua ma keia aupuni hope;

71. A e kahea ka poe a lakou i ao ai ma ka lakou kaahele ana, i ka Haku, a e nalu i ke ao ana iloko o ko lakou mau naau, ka mea a lakou i loaa ai no ka wa pokole.

72. Aia hoi, e nana! E malama no Au i ko oukou mau pu-a hipa, a e hoala ae Au i mau Lunakahiko a hoouna aku io lakou la.

73. Aia hoi, e awiwi ana Au i Kaʻu hana ma kona manawa;

74. A ke haawi aku nei Au ia oukou, ka poe he mau paahana mua ma keia aupuni hope, i kekahi kauoha e hoakoakoa ia oukou iho, a e hoonohonoho ia oukou iho, a e hoomakaukau ia oukou iho, a e hoomaemae ia oukou iho; he oiaio, e hoomaemae i ko oukou mau naau, a e holoi i ko oukou mau lima a me ko oukou mau wawae imua Oʻu, i hoomaemae aku ai Au ia oukou;

75. I hooiaio aku ai Au imua o ko oukou Makua, a me ko oukou Akua, a me Koʻu Akua, ua maemae oukou mai ke koko mai o keia hanauna hewa: i hiki ai Iaʻu ke hooko i keia olelo hoopomaikai, i keia olelo hoopomaikai nui a hope hoi, Aʻu i hana ai no oukou, i Koʻu wa e makemake ai.

76. Ke haawi aku nei no hoi Au ia oukou i kekahi kauoha e hoomau oukou ma ka pule a me ka hookeai ana mai keia manawa aku.

77. A ke haawi aku nei Au ia oukou i kekahi kauoha, e ao oukou kekahi i kekahi i ke ao ana o ke aupuni;

78. E ao ikaika oukou a e mau no Koʻu aloha me oukou, i ao ia ai oukou me ka oi aku o ka pololei ma ka manao-alakai, ma ke kumupaa, ma ke ao ana, ma ke kanawai o ka Euanelio, ma na mea a pau e pili ana i ke aupuni o ke Akua, oia hoi, ka mea kupono no oukou e hoomaopopo ai;

79. No na mea o ka lani a me ka honua pu, a malalo iho o ka honua; na mea mamua aku nei, na mea o keia wa, na mea e hiki koke mai ana e pono ai; na mea ma ka aina nei, na mea ma na aina e; na kaua a me na kuee ana o na lahuikanaka, a me na hoopai maluna o ka aina, a me ka ike no hoi e pili ana no na aina a me na aupuni,

80. I makaukau ai oukou ma na mea a pau i Koʻu wa e hoouna hou aku ai ia oukou e hoonani i ka oihana Aʻu i kahea aku ai ia oukou, a me ka misiona Aʻu i komisina aku ai ia oukou.

81. Aia hoi, hoouna aku la Au ia oukou i waho e hooiaio i ka oiaio a e ao i na kanaka, a he pono i kela a me keia kanaka i ao ia, e ao aku i kona hoalauna.

82. Nolaila, e waiho ia ana lakou me ke kumu kupuno ole e alo ae ai, a e kau no ko lakou mau hewa maluna o ko lakou mau poo ponoi.

83. O ka mea e imi koke mai ana Iaʻu e loaa no Au, a aole e haalele ia.

84. Nolaila, e kali oukou a e hana me ka ikaika, i makaukau pono ai oukou ma ka oukou hana o ka Oihanakahuna e hele aku ai mawaena o ka poe Genetile no ka manawa hope, e like me ka nui a ka waha o ka Haku e kahea ai, e hoopaa ae i ke kanawai a e sila ae i ka olelo-hoike, a e hoomakaukau i ka Poe Hoano no ka hora o ka hoopai e hiki mai ana;

85. I pakele ai ko lakou mau kino me ka uhane pu mai ka inaina aku o ke Akua, ka hooneoneo ana a ka hana hoopailua e kakali nei i ka poe hewa, ma keia ao a ma ke ao hoi e hiki mai ana. He oiaio, ke olelo aku nei Au ia oukou, e hoomau ka poe aole he mau Lunakahiko mua, ma ka pawaina a hiki i ke kahea ana aku a ka waha o ka Haku ia lakou, no ka mea, aole i hiki mai ko lakou manawa; aole i maemae ko lakou mau aahu mai ke koko mai o keia hanauna.

86. E ku oukou ma ke kuokoa a oukou i hookuokoa ia aku ai; mai hoohihia ia oukou iho iloko o ka hewa, aka, e hoomaemae i ko oukou mau lima, a hiki mai ka Haku;

87. No ka mea, aole e nui ana na la mai keia manawa aku e haalulu ka honua, a e hikaka io a ianei e like la me ke kanaka ona, a e huna no ka la i kona helehelena, a hoole i ka haawi ana mai i ka malamalama, a e ho-u ia ka mahina iloko o ke koko, a e inaina loa ana na hoku, a e hoolei ia lakou iho i lalo e like la me ka fiku e helelei ana mai ke kumu fiku mai.

88. A mahope aku o ka oukou olelo-hoike e hiki mai no ka inaina a me ka ukiuki maluna o na kanaka;

89. No ka mea, mahope aku o ka oukou olelo-hoike e hiki mai ai ka hoike o na olai, ka mea nana e hoopuka mai i na nunulu ana iloko o ka honua, a e hina ana na kanaka maluna o ka honua, a aole e hiki ke ku iluna.

90. A e hiki mai no hoi ka hoike o ka leo o na hekili, a me ka leo o na uila, a me ka leo o na makani ino, a me ka leo o na ale o ke kai, e popoi ana lakou ia lakou iho ma o aku o ko lakou mau palena.

91. A e pioloke ana na mea a pau; a he oiaio, e paupauaho ana na naau o na kanaka; no ka mea, e kau mai ana ka makau maluna o na kanaka a pau;

92. A e lele ana na anela mawaena o ka lani, e kala ana me ka leo nui, e hookani ana i ka pu a ke Akua, i ka i ana, E hoomakaukau oukou, e hoomakaukau oukou, e na kanaka o ka honua; no ka mea, ua hiki mai ka hoopai a ko kakou Akua: aia hoi, e nana! Ke hele mai nei ke Kane-mare, e hele oukou iwaho e hui me Ia.

93. A emo ole e ikea ia kekahi hoailona nui iloko o ka lani, a e ike pu na kanaka a pau ia mea.

94. A e hookani kekahi anela hou ae i kana pu, i ka i ana, O kela ekalesia nui, ka makuahine o na mea hoopailua, ka mea nana i hoohainu i na lahuikanaka a pau i ka waina o ka inaina o kona moekolohe ana, ka mea i hoomaau i ka Poe Hoano o ke Akua, i hookahe i ko lakou koko; ka mea e noho nei maluna o na wai he nui, a maluna o na mokupuni o ke kai; aia hoi, oia na kikania o ka honua, ua nakii ia oia ma na pu-a, o kona mau kaula nakii ua hana ia a paa, a aole e hiki i kekahi kanaka ke wehe ia mau mea; nolaila, ua makaukau oia e puhi ia. A e hookani oia [anela] i kana pu me ka ikaika a loihi, a e lohe na lahuikanaka a pau ia mea.

95. A e hamau koloko o ka lani no ka manawa o hapalua hora, a emo ole mahope aku e wehe ia ka paku o ka lani, e like la me ka wehe ia ana o kekahi owili mahope o kona owili ia ana, a e wehe ia ka uhi o ka helehelena o ka Haku;

96. A o ka Poe Hoano maluna o ka honua, ka poe e ola ana, e hoololi ia lakou a kaili ia aku iluna e hui pu me Ia.

97. A e puka mai no ka poe i moe iloko o ko lakou mau lua kupapau; no ka mea, e hoohamama ia ko lakou mau lua kupapau, a e kaili pu ia aku no hoi lakou iluna e hui pu me Ia mawaenakonu o ke kia o ka lani:

98. No Kristo lakou, na hua mua: ka poe e iho mua mai ana me Ia, a o ka poe maluna o ka honua iloko o ko lakou mau lua kupapau, ka poe i kaili mua ia iluna e hui pu me Ia: a o keia mea a pau ma ka leo no ia o ke kani ana o ka pu a ka anela o ke Akua.

99. A mahope o keia e hookani ai kekahi anela hou ae, oia no ka lua o ka pu; alaila e hiki mai ka hoolapanai ia ana o ka poe no Kristo i ka wa o Kona hiki ana mai; ka poe i loaa ko lakou mahele ma kela halepaahao i hoomakaukau ia no lakou, i hiki ai ia lakou ke apo i ka Euanelio a hookolokolo ia e like la me na kanaka ma ka io.

100. A eia hou, e kani kekahi pu hou ae, oia no ke kolu o ka pu; alaila e puka mai ai na uhane o na kanaka e hookolokolo ia ana, a i loaa malalo iho o ka hoahewa ia ana:

101. A o keia ke koena o ka poe make, a aole lakou e ola hou ana a hiki i ka pau ana o ke tausani makahiki, aole loa hou aku, a hiki i ka hopena o ka honua.

102. A e kani kekahi pu hou aku oia no ka ha o ka pu, i ka i ana, Ua loaa mawaena o ka poe e koe ana a hiki i kela la nui a hope loa, oia hoi, ka hopena, ka poe e mau ana i paumaele.

103. A e kani kekahi pu hou ae, oia no ka lima o ka pu, oia no hoi ka lima o ka anela, ka mea e haawi ana i ka Euanelio mau loa,—e lele ana mawaena o ka lani, a i na lahuikanaka, na ohana, na olelo, a me na kanaka a pau;

104. A o keia ke kani ana o kana pu, e olelo ana i na kanaka a pau iloko o ka lani a ma ka honua pu, a malalo o ka honua hoi; no ka mea, e lohe ana kela a me keia pepeiao ia mea, a e kukuli kela a me keia kuli, a e hoike kela a me keia alelo, ia lakou e lohe ana i ka leo o ka pu, i ka i ana, E makau i ke Akua a e haawi i ka nani ia Ia ka Mea e noho ana maluna o ka nohoalii, no ka wa mau loa a mau loa: no ka mea, ua hiki mai ka hora o Kona hoopai ana.

105. A eia hou, e hookani kekahi anela hou ae i kana pu, oia no ke ono o ka anela, i ka i ana, Ua haule oia ka mea nana i hoohainu i na lahuikanaka a pau i ka waina o ka inaina o kona moekolohe ana: ua haule oia! Ua haule!

106. A eia hou, e hookani kekahi anela hou ae i kana pu, oia no ka hiku o ka anela, i ka i ana, Ua pau! Ua pau! Ua lanakila a ua hehi hookahi ke Keikihipa a ke Akua i ka mea kaomi waina; oia hoi, ka mea kaomi waina o ka weliweli o ka inaina o ke Akua Mana Loa;

107. Alaila, e hoolei ia na anela me ka nani o Kona ikaika, a e hoopiha ia ka Poe Hoano me Kona nani, a e loaa ko lakou hooilina a e hoolike ia me Ia.

108. Alaila, e hookani hou ka anela mua i kana pu iloko o na pepeiao o ka poe ola a pau, a hoike mai i na hana malu a kanaka, a me na hana nui a ke Akua iloko o ke tausani makahiki mua.

109. Alaila, e hookani ka lua o ka anela i kana pu, a hoike mai i na hana malu a kanaka, a me na manao a me na iini o ko lakou mau naau, a me na hana nui a ke Akua iloko o ka lua o ke tausani makahiki.

110. A pela aku, a hiki i ka hookani ana o ka hiku o ka anela i kana pu: a e ku aku no oia maluna o ka aina a maluna o ke kai, a hoohiki ma ka inoa o ka Mea e noho ana maluna o ka nohoalii, aole he manawa hou aku; a e hoopaa ia o Satana, kela moo kahiko, ka mea i kapa ia ke diabolo, a aole e hookuu ia no ke kowa o hookahi tausani makahiki.

111. Alaila, e hookuu ia oia no kekahi wa pokole, i hiki ai ia ia ke houluulu i kona mau puali kaua:

112. A o Mikaela, ka hiku o ka anela, oia hoi, ka luna anela, e houluulu pu i kona mau puali kaua, oia hoi, na lehulehu o ka lani.

113. A e houluulu pu ke diabolo i kona mau puali kaua; oia hoi, na lehulehu o gehena, a e pii mai ana e kaua ia Mikaela me kona mau puali kaua:

114. Alaila, e hiki mai ai ke kaua a ke Akua nui; a e kiola ia ke diabolo a me kona mau puali kaua i ko lakou wahi ponoi, i loaa hou ole ai ia lakou ka mana maluna o ka Poe Hoano;

115. No ka mea, e kaua no o Mikaela i ko lakou mau kaua, a e hoopio i ka mea e imi ana i ka nohoalii o ka Mea e noho ana maluna o ka nohoalii, oia hoi, ke Keikihipa.

116. O keia ka nani o ke Akua, a me ka poe i hoomaemae ia; a aole e ike hou lakou i ka make.

117. Nolaila, he oiaio, ke olelo aku nei Au ia oukou, e Kuu mau hoaloha, e kahea i ko oukou halawai hoano, e like me Kaʻu i kauoha aku ai ia oukou;

118. A oiai aole he manaoio ko ka poe a pau, e imi ikaika oukou a e ao kekahi i kekahi i na olelo o ka naauao; he oiaio, e imi oukou mailoko mai o na buke maikai loa i na olelo o ka naauao; e imi i ka ike, he oiaio, ma ka huli nui ana, a ma ka manaoio no hoi.

119. E hoonohonoho ia oukou iho, e hoomakaukau i kela a me keia mea e pono ai, a e kukulu i hale, oia hoi, i hale e pule ai, i hale e hookeai ai, i hale o ka manaoio, i hale e imi ai i ka ike, i hale o ka nani, i hale o ka maluhia, i hale o ke Akua;

120. I hana ia ai ko oukou mau komo ana mai ka inoa o ka Haku, a i hana ia ai ko oukou mau puka ana aku ma ka inoa o ka Haku no hoi; i hana ia ai ko oukou mau aloha ana aku a pau ma ka inoa o ka Haku, me na lima i hapai ia iluna i ka Mea Kiekie Loa.

121. Nolaila, e hooki i ko oukou mau kamailio waiwai ole ana a pau, i na akaaka ana a pau; i ko oukou mau kuko ino; i ko oukou haaheo a noonoo ole a pau, a i ka oukou mau hana hewa a pau.

122. E koho i kekahi kumu ao mawaena o oukou iho, a aole e lilo i poe kamailio i ka wa hookahi; aka, na hookahi mea e kamailio i ka manawa hookahi, a e hoolohe na mea e ae a pau i kana mau olelo ana, a i ka pau ana o na mea a pau i ke kamailio, i ao ia ai na mea a pau e na mea a pau, a i likealike ai ke kuleana o kela a me keia kanaka.

123. E malama e aloha oukou kekahi i kekahi; e hooki i ke kuko hewa, e ao ia e haawi kekahi i kekahi e like me ka ka Euanelio e koi nei;

124. E hoopau i ka palaualelo; e hoopau i ka pelapela; e hooki i ka imihala ana kekahi i kekahi; e hoopau i ka hiamoe ana a oi aku mamua o ke kupono; e hoi i ko oukou mau wahi moe i ka wa kupono o ke ahiahi i maluhiluhi ole ai oukou; e ala i ke kakahiaka nui i hooikaika ia ai ko oukou mau kino a me ko oukou mau noonoo.

125. A maluna ae o na mea a pau, e hoaahu ia oukou iho me na apo-paa o ke aloha, e like me kekahi koloka oia hoi, ke apo-paa o ka hemolele a me ka maluhia;

126. E pule mau, i mauleule ole ai oukou a hiki aku Au: aia hoi, e nana, e hiki koke aku ana Au, a e hookipa mai ia oukou Ioʻu nei. Amene.

127. A eia hou, o ka hoonohonoho ia ana o ka hale i hoomakaukau ia no ka papa peresidena o ke kula o na kaula, i kukulu ia no ko lakou ao ia ana ma na mea a pau i kupono no lakou, he oiaio, no na luna a pau o ka Ekalesia, a i ole, ma kekahi olelo ana, no ka poe i kahea ia no ka hana o ka Oihanakahuna iloko o ka Ekalesia, e hoomaka ana mai na Kahuna Kiekie a hiki aku i lalo i na Diakona;

128. A o keia ka hoonohonoho ia ana o ka hale o ka papa peresidena o ke kula: O ka mea i koho ia i peresidena, a i ole i kumu, e loaa e ku ana ma kona wahi, iloko o ka hale i hoomakaukau ia nona.

129. Nolaila, oia ka mua iloko o ka hale o ke Akua ma kekahi wahi e hiki ai i ke anaina iloko o ka hale ke lohe pono i kana mau olelo me ka moakaka, aole hoi me ka leo nui.

130. A i kona wa e komo mai ai iloko o ka hale o ke Akua, (no ka mea, oia ka mua e pono ai e komo iloko o ka hale; aia hoi, he mea nani keia, i kilo ai oia i kumuhoohalike),

131. E haawi oia ia ia iho ma ka pule ana maluna o kona mau kuli imua o ke Akua, i hoailona, a i ole, i mea hoomanao i ka berita mau loa,

132. A i ka wa o kekahi e komo mai ai mahope ona, e ku ke kumu i luna, a me ke kau ana o na lima i ka lani; ae, he oiaio, me ka pololei, e aloha i kona hoahanau a mau hoahanau paha me keia mau olelo:

133. He hoahanau anei oe, a i ole, he mau hoahanau anei oukou? Ke aloha aku nei au ia oe ma ka inoa o ka Haku o Iesu Kristo, i hoailona, a i ole i mea hoomanao i ka berita mau loa, ka berita hoi aʻu e hookipa nei ia oe i ka launa hoahanau ana, me kekahi manao paa loa, naue ole, a loli ole, e lilo i hoaloha a i hoahanau nou ma o ke aloha la o ke Akua, ma na apo-paa o ke aloha, e hele ma na kauoha a pau o ke Akua me ke kina ole, ma ka hoomaikai ana, no ka wa mau loa a mau loa. Amene.

134. A o ka mea e loaa ana aole i kupono no keia aloha ana, aole e loaa he wahi nona mawaena o oukou: no ka mea, aole oukou e ae e hoohaumia ia Koʻu hale e ia.

135. A o ka mea e komo mai ana a he kupaa oia imua Oʻu, a ina he hoahanau oia, a i ole, he mau hoahanau lakou, e aloha aku lakou i ka peresidena, a i ole, i ke kumu me na lima i hapai ia i ka lani, me keia pule a berita hookahi no, a i ole, ma ka olelo ana Amene, i hoailona no ia mea hookahi no.

136. Aia hoi, he oiaio, ke olelo aku nei Au ia oukou, he kumuhoohalike keia no oukou no ke aloha ana aku kekahi i kekahi iloko o ka hale o ke Akua, ma ke kula o ka poe kaula.

137. A ua kahea ia oukou e hana i keia ma ka pule a me ka hoomaikai ana e like me ka ka Uhane e haawi mai ai i ka olelo ana ma ka oukou mau hana ana a pau iloko o ka hale o ka Haku, iloko o ke kula o na kaula, i lilo ai ia i wahi laa, i hale no ka Uhane Hemolele no ko oukou ao ia ana.

138. A mai hookipa oukou i kekahi mea mawaena o oukou iloko o keia kula, ke ole oia i maemae mai ke koko mai o keia hanauna:

139. A e hookipa ia mai oia ma ka lawelawepaa o ka holoi ana i na wawae, no ka mea, no keia kumu i hookumu ia ai ka lawelawepaa o ka holoi ana i na wawae.

140. A eia hou, e lawelawe ia ka lawelawepaa o ka holoi wawae ana e ka peresidena, a i ole, e ka Lunakahiko Hoomalu o ka Ekalesia.

141. E hoomaka ia ia mea me ka pule, a mahope o ka lawe ana i ka berena a me ka waina, e kaei oia ia ia iho e ku like i ke ano i hoike ia ma ka mokuna umikumamakolu o ka olelo-hoike a Ioane e pili ana Noʻu. Amene.