1. Ua kahea ia Kuu kauwa, o Oresona Haida, ma kona hoolilo ia ana e hai aku i ka Euanelio mau loa, ma o ka Uhane la o ke Akua ola, mai kekahi poe kanaka a i kekahi poe kanaka, a mai kekahi aina a i kekahi aina, ma na anaina o ka poe hewa, iloko o ko lakou mau halehalawai, e kamailio ana me ka noonoo kuhohonu a e hoakaka ana i na Palapala Hemolele a pau ia lakou.

2. A, aia hoi, e nana mai, he kumu hoohalike keia no na mea a pau i hoolilo ia i keia Oihanakahuna, no lakou ka misiona i koho ia e hele aku;

3. A o keia he kumuhoohalike ia lakou, e olelo aku lakou e like me lakou e uluhia ia ai e ka Uhane Hemolele.

4. A o kela a me keia mea a lakou e olelo ai i ka wa e uluhia ia ai e ka Uhane Hemolele, e lilo ana ia he Palapala Hemolele, ka makemake o ka Haku, ka manao o ka Haku, ka olelo a ka Haku, ka leo o ka Haku, a me ka mana o ke Akua e ola ai:

5. Aia hoi, o keia ka olelo hoopomaikai a ka Haku ia oukou, e Kuu poe kauwa;

6. No ia mea, e olioli nui, a mai hopohopo, no ka mea, Owau, ka Haku, pu me oukou, a e kakoo ana ia oukou; a e hoike oukou Noʻu, oia hoi, no Iesu Kristo, Owau ke Keiki a ke Akua ola, Owau no ia mamua, Owau no ia i keia wa, a e hiki aku ana Au.

7. O keia ka olelo a ka Haku ia oe, e Kuu kauwa, Oresona Haida, a pela no hoi i Kuu kauwa ia Luka Ioanekona, a i Kuu kauwa ia Laimana Ioanekona, a i Kuu kauwa ia Wiliama E. Makalelina, a i na Lunakahiko kupaa a pau o Kuu Ekalesia.

8. E hele aku oukou i ko ke ao nei a pau, e hai i ka Euanelio i na kanaka a pau, me ka lawelawe ana ma ka mana Aʻu i haawi aku ai ia oukou, e bapetizo ana iloko o ka inoa o ka Makua, a o ke Keiki, a o ka Uhane Hemolele;

9. A o ka mea e manaoio ana a bepatizo ia e hoola ia oia, a o ka mea e manaoio ole ana e hoahewa ia oia;

10. A o ka mea e manaoio ana e hoopomaikai ia ana oia me na hoailona e hahai ana, he oiaio, e like me ia i palapala ia;

11. A e haawi ia ia oukou e ike i na ouli o na manawa, a me na hoailona o ka hiki ana mai o ke Keiki a ke Kanaka;

12. A e like me ka nui o ka poe a ka Makua e hoike aku ai, e haawi ia ia oukou ka mana e sila ia lakou no ke ola mau loa. Amene.

13. A ano, e pili ana i na mea e pakui ia i na berita a me na kauoha oia keia:

14. Aia no ma keia hope aku, iloko o ka manawa kupono o ka Haku, he mau Bihopa e ae e hookaawale ia iloko o ka Ekalesia, e lawelawe e like me ko ka mua;

15. No ia mea, i mau Kahuna Kiekie kupono lakou e pono ai, a e koho ia lakou e ka Papa Peresidena o ka Oihanakahuna Melekisedeka, ke ole lakou he mau mamo ponoi na Aarona,

16. A ina he mau mamo ponoi lakou na Aarona, he kuleana maoli ko lakou i ka oihana Bihopa, ina o lakou na hanaumua mawaena o na keiki a Aarona;

17. No ka mea, e paa ana ka hanaumua i ke kuleana o ka oihana peresidena maluna o keia Oihanakahuna, a me na ki a me na mana o ia mea.

18. Aole kekahi kanaka i loaa ke kuleana maoli i keia oihana e paa i na ki o keia Oihanakahuna, ke ole oia he mamo ponoi a he hanaumua hoi na Aarona;

19. Aka, oiai he mana ko ke Kahuna Kiekie o ka Oihanakahuna Melekisedeka e lawelawe iloko o na oihana haahaa iho a pau, e hiki no ia ia ke lawelawe ma ka oihana o ka Bihopa, ina aole e hiki ke loaa kekahi mamo ponoi a Aarona, ke kahea ia nae ia, a hookaawale ia a hoolilo ia i keia mana malalo o na lima o ka Papa Peresidena o ka Oihanakahuna Melekisedeka.

20. A e wae ia no hoi ka mamo ponoi a Aarona e keia Papa Peresidena e pono ai, ke ike ia he kupono, a e poni ia, a hoolilo ia malalo o na lima o keia Papa Peresidena, ina aole pela aole lakou i hoamana pololei ia e lawelawe ma ka lakou Oihanakahuna;

21. Aka, mamuli o ka mana o ka olelo hooholo e pili ana i ko lakou kuleana i ka Oihanakahuna e ili ana mai ka makuakane a i ke keiki, ua hiki ia lakou ke koi i ko lakou poni ia ana, ina e hiki ana ia lakou ma kekahi manawa ke hooiaio i ko lakou mookuauhau, a i ole, e hoomaopopo lea ia mea ma ka hoikeana mai ka Haku mai, malalo o na lima o ka Papa Peresidena i hai mua ia ae nei.

22. A eia hou, aole kekahi Bihopa, a i ole, kekahi Kahuna Kiekie, e hookaawale ia ana i keia oihana, e hookolokolo ia a hoahewa ia no kekahi kalaima, ke ole ia imua o ka Papa Peresidena o ka Ekalesia;

23. A ke ku ka hewa ia ia imua o keia Papa Peresidena, mamuli o ka olelo hoike i hiki ole ke kulai ia, e hoahewa ia oia.

24. A ina e mihi oia e kala ia no ia, e like la me ko na berita a me na kauoha o ka Ekalesia.

25. A eia hou, ina he mau keiki ka na makua ma Ziona, a i ole, iloko o kekahi o kona mau Mahele-aina i kukulu ia, a ao ole ia lakou e hoomaopopo i ka loina o ka mihi, ka manaoio iloko o Kristo, ke Keiki a ke Akua ola, a me ka bapetizo ana a me ka haawina o ka Uhane Hemolele ma o ke kau ana la o na lima i ka wa e piha ai o na makahiki ewalu, e ili ana ka hewa maluna o na poo o na makua;

26. No ka mea, e lilo keia i kanawai no na kanaka o Ziona, a iloko hoi o kona mau Mahele-aina i kukulu ia;

27. A e bapetizo ia ka lakou mau keiki no ke kala ia ana o ko lakou mau hewa i ka wa e piha ai o na makahiki ewalu, a e loaa ke kau ana o na lima,

28. A e ao no hoi lakou i ka lakou mau keiki e pule a e hele me ka pono imua o ka Haku.

29. A e malama no hoi na kanaka o Ziona i ka la Sabati a e hoano ia la.

30. A e hoomanao no hoi na kanaka o Ziona i ka lakou mau hana me ka manao kupaa, ina e koho ia lakou e hana, no ka mea, e lawe ia ka mea palaualelo me ka hoomaopopo ia imua o ka Haku.

31. Ano, aole Au, ka Haku, i oluolu loa me na kanaka o Ziona, no ka mea, aia he poe palaualelo mawaena o lakou; a ke ulu ae nei no hoi ka lakou poe keiki iloko o ka hewa; aole no hoi o lakou imi ikaika i na waiwai o ka wa mau loa, aka, ua piha ko lakou mau maka me ke alunu.

32. Aole he pono keia mau mea, a e hoopau ia maiwaena aku o lakou e pono ai: no ia mea, e lawe aku Kuu kauwa, o Oliva Kaudare, i keia mau olelo i ka aina o Ziona.

33. A he kauoha Kaʻu e haawi aku nei ia lakou, o ka mea e malama ole ana i kana mau pule imua o ka Haku iloko o ka wa kupono o ia mea, e lawe ia oia me ka hoomaopopo ia imua o ka lunakanawai o Kuu poe kanaka.

34. He oiaio a he pololei keia mau olelo; no ia mea, mai uhaki ia mau mea, aole hoi e lawe i kekahi mea noloko mai olaila.

35. Aia hoi, Owau ka Alepa a me ka Omega, a e hiki koke aku ana Au. Amene.