1. E hoolohe mai oukou, e na Lunakahiko o Kuu Ekalesia, a e haliu mai i ka pepeiao i na olelo Aʻu e olelo aku ai ia oukou;

2. No ka mea, aia hoi, he oiaio, he oiaio, ke olelo aku nei Au ia oukou, ua loaa ia oukou kekahi kauoha, i kanawai no Koʻu Ekalesia, ma o ka mea la Aʻu i koho ai no oukou e loaa na kauoha a me na hoikeana mai Koʻu lima aku.

3. A e ike maopopo oukou i keia aole kekahi mea e ae i koho ia no oukou e loaa na kauoha a me na hoikeana a hiki i kona lawe ia ana aku, ina e kupaa oia iloko Oʻu.

4. Aka, he oiaio, he oiaio, ke olelo aku nei Au ia oukou, aole kekahi mea e ae e koho ia no keia haawina, ke ole ma ona la, no ka mea, ina e lawe ia ia mai ia ia aku, aole i loaa ia ia ka mana koe wale no e koho aku i kekahi mea e ae ma kona wahi;

5. A e lilo keia i kanawai ia oukou, e hookipa ole oukou i na ao ana a kekahi mea e hele mai ana imua o oukou, ma ke ano he mau hoikeana a kauoha paha;

6. A ke haawi aku nei Au i keia ia oukou i hoopunipuni ole ia oukou, a i hoomaopopo ai oukou aole Naʻu ia mau mea.

7. No ka mea, he oiaio, ke olelo aku nei Au ia oukou, o ka mea i hoolilo ia e Aʻu nei e komo mai ma ka ipuka a e hoolilo ia e like me Kaʻu i olelo aku ai ia oukou mamua, e ao i kela mau hoikeana i loaa aku ai ia oukou, a e loaa mai ana ma o ka mea la Aʻu i koho ai.

8. A ano, aia hoi, ke haawi aku nei Au ia oukou i kekahi kauoha, i ka wa o oukou e akoakoa pu ai, e ao aku a e hoonaauao oukou kekahi i kekahi, i ike ai oukou ke ano o ka hana ana a me ke alakai ana i Kuu Ekalesia, i ke ano o ka hana ana ma na loina o Kuu kanawai a me na kauoha Aʻu i haawi aku ai;

9. A pela iho la e ao ia ai oukou iloko o ke kanawai o Kuu Ekalesia, a e hoomaemae ia ma na mea i loaa ia oukou, a e hoopaa oukou ia oukou iho e hana me ka hemolele a pau imua Oʻu.

10. A e like me oukou e hana ai i keia, pela e pakui ia aku ai ka nani i ke aupuni a oukou i loaa ai. E like me oukou e hana ole ai ia mea, pela no ia e lawe ia aku ai, he oiaio, ka mea a oukou i loaa ai.

11. E hookaawale aku oukou i ka hewa maiwaena aku o oukou; e hoomaemae ia oukou iho imua Oʻu,

12. A ina e makemake oukou i na nani o ke aupuni, e koho oukou i Kaʻu kauwa, ia Iosepa Kamika, opio, a e kakoo ia ia imua Oʻu ma o ka pule la o ka manaoio.

13. A eia hou, ke olelo aku nei Au ia oukou, ina e makemake oukou i na mea pohihihi o ke aupuni, e hoolako nona i ka ai a me ka aahu, a i kela a me keia mea i kupono nona e hooko ai i ka hana, ka mea Aʻu i kauoha aku ai ia ia;

14. A ina e hana ole oukou ia mea, e hoomau oia me ka poe i hookipa mai ia ia, i hiki ai Iaʻu ke hookoe Noʻu iho i poe kanaka maemae imua Oʻu.

15. Eia hou, ke olelo aku nei Au e hoolohe mai oukou, e na Lunakahiko o Kuu Ekalesia, ka poe Aʻu i koho ai; aole oukou i hoouna ia aku e ao ia mai, aka, e ao i na keiki a kanaka i na mea Aʻu i waiho aku ai iloko o ko oukou mau lima ma o ka mana la o Kuu Uhane;

16. A e ao ia oukou mailuna mai. E hoomaemae ia oukou iho a e haawi ia ka mana ia oukou, i hiki ai ia oukou ke haawi aku e like me Kaʻu i olelo ai.

17. E hoolohe mai oukou, no ka mea, aia hoi, ua kokoke mai ka la nui o ka Haku.

18. No ka mea, e hiki mai ana ka la a ka Haku e hoopuka ai i Kona leo mai ka lani mai; e naueue no na lani, a e haalulu ka honua, a e kani nui a loihi ka pu a ke Akua, a e olelo aku i na lahuikanaka i hiamoe, E oukou ka Poe Hoano, e ala a e ola; e oukou ka poe hana hewa, e noho a e hiamoe a kahea hou aku Au;

19. No ia mea, e kaei i ko oukou mau puhaka o loaa auanei oukou mawaena o ka poe hewa.

20. E hapai i ko oukou mau leo a mai aua. E kahea i na lahuikanaka e mihi, o ka poe kahiko a me na opiopio, o ka poe paa a paa ole, i ka i ana, e hoomakaukau ia oukou iho no ka la nui o ka Haku;

21. No ka mea, ina e hapai au, he kanaka wale no, i koʻu leo a kahea aku ia oukou e mihi, a inaina mai nae oukou iaʻu, heaha ana ka oukou e olelo ai i ka wa e hiki mai ai ka la o na hekili e hoopuka mai ai i ko lakou mau leo mai na welelau o ka honua, e olelo ana i na pepeiao o ka poe ola a pau, i ka i ana, E mihi, a e hoomakaukau no ka la nui o ka Haku;

22. Ae, eia hou, i ka wa o ka uila e anapu ai mai ka hikina a i ke komohana, a hoopuka mai i ko lakou mau leo i ka poe a pau e ola ana, a mania na pepeiao o ka poe a pau e lohe ana, i ka i ana i keia mau olelo, E mihi oukou, no ka mea, ua hiki mai ka la nui o ka Haku.

23. A eia hou, e hoopuka no ka Haku i Kona leo mai ka lani mai i ka i ana, E hoolohe mai, e na lahuikanaka o ka honua, a e hoolohe i na olelo a kela Akua nana oukou i hana.

24. E oukou na lahuikanaka o ka honua, pehea ka nui o na manawa Aʻu i makemake ai e houluulu ia oukou a akoakoa, e like me ke kinana moa e houluulu ai i kana ohana keiki malalo o kona mau eheu, aole nae oukou i makemake mai!

25. Pehea ka nui o na manawa Aʻu i kahea aku ai ia oukou ma o ka waha la o Kaʻu mau kauwa, a ma o ka lawelawe ana la o na anela, a ma o Koʻu leo ponoi la, a ma o ka leo la o na hekili, a ma o ka leo la o na uila, a ma o ka leo la o na makani ino, a ma o ka leo o na olai, a me na kuaua-huahekili, a ma o ka leo la o na wi a me na ahulau o kela a me keia ano, a ma o ke kani nui ana la o kekahi pu, a ma o ka leo la o ka hoopai, a ma o ka leo la o ke aloha a po ka la, a ma o ka leo la o ka nani, a me ka hanohano, a me na waiwai o ke ola mau loa, a makemake e hoola ia oukou i ke ola mau loa, aka, aole oukou i makemake mai!

26. Aia hoi, ua hiki mai nei ka la, ka wa i piha ai ke kiaha o Kuu inaina.

27. Aia hoi, he oiaio, ke olelo aku nei Au ia oukou, o keia mau mea na olelo a ka Haku ko oukou Akua;

28. No ia mea, e hana oukou, e hana oukou ma Koʻu pa-waina no ka manawa hope loa—no ka manawa hope loa e kahea ai i ka poe kanaka o ka honua,

29. No ka mea, ma Koʻu manawa kupono e hele mai ai Au maluna o ka honua me ka hoopai ana, a e hoolapanai ia Koʻu poe kanaka a e noho alii me Aʻu maluna o ka honua,

30. No ka mea, e hiki mai no ka Milenio nui, ka mea Aʻu i olelo ai ma o ka waha la o Kaʻu mau kauwa;

31. No ka mea, e hoopaa ia ana o Satana, a i kona wa e hookuu hou ia ai, e noho alii wale ana no ia no kekahi manawa pokole, alaila e hiki mai ka hopena o ka honua;

32. A e hoololi ia ka mea e ola ana iloko o ka pono iloko o ka imo ana a ka maka, a e lilo aku ka honua me he la ma o ke ahi la;

33. A e hele aku ka poe hewa iloko o ke ahi pio ole, a aole e ike kekahi kanaka maluna o ka honua i ko lakou hopena, aole hoi e ike ana i kahi manawa, a hiki i ko lakou hiki ana mai imua Oʻu iloko o ka hookolokolo ana.

34. E hoolohe mai oukou i keia mau olelo; Aia hoi, Owau no o Iesu Kristo, ka Hoola o ke ao nei. E hoahu i keia mau mea iloko o ko oukou mau naau, a e ae aku i na mea koikoi a eehia o ka wa mau loa e kau maluna o ko oukou mau noonoo.

35. E kuoo. E malama i Kaʻu mau kauoha a pau. Pela io no. Amene.