1. Aia hoi, ke olelo aku nei Au ia oukou, eia ka naauao, ma o ia mea la e ike ai oukou i ka oukou mea e hana ai e pili ana i keia mea, no ka mea, he mea pono Noʻu e hana ia a ikaika keia Mahele-aina Aʻu i hoonoho ai no ka ikaika o Ziona;

2. Nolaila, na Kuu kauwa na Nuela K. Witine, e malama i kahi i koho ia mawaena o oukou, maluna olaila Au e makemake nei e kukulu i Kuu hale hemolele;

3. A, eia hou, e mahelehele ia ia iloko o na apana, e like me ka naauao, no ka pono o ka poe e imi ana i mau hooilina, e like hoi me ka hooholo ia ana ma ke kuka ana mawaena o oukou.

4. Nolaila, e pono oukou e makaala e nana pono i keia mea, a me kela mahele e pono ai Kuu hui kuikahi, no ka hoopuka ana i Kaʻu olelo i na keiki a kanaka;

5. No ka mea, aia hoi, he oiaio, Kaʻu e olelo aku nei ia oukou, o keia ka mea pono loa Iaʻu, e hele aku Kaʻu olelo i na keiki a kanaka, no ka hoohaahaa ana i ka naau o na keiki a kanaka, no ko oukou pono. Pela io no. Amene.

6. A, eia hou, he oiaio Kaʻu e olelo aku nei ia oukou, he mea naauao ia, a he pono Iaʻu no Kuu kauwa, no Ioane Ioanekona, ka mea hoi nana ka mohai Aʻu i apono ai, a me ka pule Aʻu i lohe ai, ia ia hoi Au e haawi aku nei he olelo hoopomaikai o ke ola mau loa ke malama oia i Kaʻu mau kauoha mai keia wa aku—

7. No ka mea, he mamo ia na Iosepa, a he hoa loaa pu o na pomaikai o ka olelo hoopomaikai i haawi ia i kona mau kupuna.

8. He oiaio, ke olelo aku nei Au ia oukou, he mea pono Iaʻu ke lilo oia i lala no ka hui kuikahi, i hiki ai ia ia ke kokua ma ka hoopuka ana i Kaʻu olelo i na keiki a kanaka;

9. Nolaila, e hoolilo oukou ia ia no keia pomaikai, a e imi oia me ka hooikaika i mea e lawe ia aku ai na aie i kau iho maluna o ka hale i koho ia mawaena o oukou, i noho ai oia iloko olaila. Pela io no. Amene.