1. E haliu mai e na kanaka o Kuu Ekalesia, wahi a ka Haku ko oukou Akua, a e hoolohe mai i ka olelo a ka Haku e pili ana ia oukou:

2. Ka Haku e hiki koke aku ana i Kona hale-laa; ka Haku e iho mai ana maluna o ko ka honua me kekahi hoino no ka hoopai ana; he oiaio, maluna o na lahuikanaka a pau i hoopoina i ke Akua, a maluna hoi o ka poe hoomaloka a pau mawaena o oukou.

3. No ka mea, e hoike auanei Oia i Kona lima hemolele imua o na maka o na lahuikanaka a pau, a e ike auanei na welelau a pau o ka honua i ka hoola ana a ko lakou Akua.

4. No ia mea, e hoomakaukau oukou, e hoomakaukau oukou, e Koʻu poe kanaka; e hoomaemae ia oukou iho; e akoakoa pu ae oukou, e na kanaka o Kuu Ekalesia, maluna o ka aina o Ziona, o oukou a pau ka poe i kauoha ole ia e kakali.

5. E puka oukou iwaho mai Babulona aku. E maemae oukou e ka poe e hali nei i na ipu o ka Haku.

6. E kahea i ka oukou mau halawai hoano, a e kamailio pinepine kekahi i kekahi. A e hea aku kela a me keia kanaka ma ka inoa o ka Haku;

7. Ae, he oiaio, ke olelo hou aku nei Au ia oukou, ua hiki mai nei ka manawa a ka leo o ka Haku e olelo aku ai ia oukou, E hele oukou mailoko aku o Babulona; e houluulu ae oukou maiwaena mai o na lahuikanaka, mai na kukulu eha mai, mai kekahi welelau o ka lani a i kekahi.

8. E hoouna aku i na Lunakahiko o Kuu Ekalesia i na lahuikanaka i mamao loa aku; i na mokupuni o ke kai; e hoouna aku i na aina e; e kahea aku i na lahuikanaka a pau; o ka mua i na Genetile, alaila i na Iudaio.

9. A aia hoi, e nana, o keia ko lakou leo kahea, a me ka leo o ka Haku i na kanaka a pau; E hele aku oukou i ka aina o Ziona, i hoakea ia aku ai na palena aina o Kuu poe kanaka, a i hooikaika ia kona mau Mahele-aina, i hele aku ai o Ziona ma na wahi e pili kokoke mai ana;

10. He oiaio, e hoopuka ia aku ka leo kahea mawaena o na kanaka a pau: E ala a e ku a e hele aku e hui me ke Kane-mare: aia hoi, e nana, ke hele mai la ke Kane-mare, e hele aku oukou iwaho e hui me Ia. E hoomakaukau ia oukou iho no ka la nui o ka Haku.

11. Nolaila, e kiai, no ka mea, aole oukou i ike i ka la a me ka hora.

12. Nolaila hoi, e holo aku ka poe mawaena o na Genetile i Ziona.

13. A o ka poe no Iuda e holo lakou i Ierusalema, i na mauna o ka hale o ka Haku.

14. E hele oukou iwaho maiwaena aku o na lahuikanaka, oia hoi, mai Babulona aku, maiwaena aku o ka hewa, oia hoi, o Babulona uhane.

15. Aka, he oiaio, wahi a ka Haku, Mai pupuahulu i ko oukou holo ana, aka, e hoomakaukau ia na mea a pau imua o oukou; a o ka mea e hele ana mai nana oia ihope, o kau koke mai ka make maluna ona.

16. E haliu a hoolohe mai e na kanaka o ka honua. E hoolohe pu mai e na Lunakahiko o Kuu Ekalesia, a e lohe mai i ka leo o ka Haku, no ka mea, ke hea aku nei Oia i na kanaka a pau, a ke kauoha nei Oia i na kanaka a pau ma na wahi a pau e mihi;

17. No ka mea, aia hoi, ua hoouna aku ka Haku ke Akua i ka anela e kahea ana iwaena o ka lani, i ka i ana, E hoomakaukau i ke alanui o ka Haku, a e hana i kona mau kuamoo i pololei, no ka mea, ua kokoke mai ka hora o kona hiki ana mai,

18. Ka wa a ke Keikihipa e ku ai ma Mauna Ziona a me Ia pu he hookahi haneri a me kanaha-kumamaha tausani, me ka inoa o Kona Makua i palapala ia maluna o ko lakou mau lae:

19. No ia mea, e hoomakaukau oukou no ka hiki ana mai o ke Kane-mare; e hele aku oukou, e hele aku oukou iwaho e hui me Ia,

20. No ka mea, aia hoi, e ku ana Oia ma ka mauna o Oliveta, a maluna o ka moana nui, oia hoi, ke kai hohonu, a maluna o na mokupuni o ke kai, a maluna o ka aina o Ziona;

21. A e hoopuka auanei Oia i Kona leo mailoko o Ziona, a e olelo Oia mai ia Ierusalema mai, a e lohe ia auanei Kona leo mawaena o na kanaka a pau,

22. A he leo auanei ia me he leo la o na wai he nui, a me he leo la o kekahi hekili ikaika nana e hoohiolo ana i na mauna ilalo, a aole e loaa na awawa;

23. E kauoha auanei Oia i ke kai hohonu, a e hookahe ia aku ia i na aina ma ka akau, a e lilo na mokupuni i aina hookahi,

24. A o ka aina o Ierusalema a me ka aina o Ziona, e hoihoi hou ia i ko laua wahi ponoi, a e like auanei ka honua me ia i na la mamua o kona mahelehele ia ana.

25. A e ku auanei ka Haku, oia hoi ka Hoola, iwaena o Kona poe kanaka, a e nohoalii maluna o na mea io a pau.

26. A e hele mai ana ka poe ma na aina akau me ka hoomanao ia imua o ka Haku, a e lohe ana ko lakou mau Kaula i Kona leo, a aole e kaohi hou aku ia lakou iho, a e hahau auanei lakou i na pohaku, a e hehee auanei ka hau-paa imua o lakou.

27. A e hana ia auanei i alanui iwaena o ke kai hohonu.

28. A e lilo auanei ko lakou poe enemi i pio na lakou,

29. A ma na waoakua oneanea e puka mai auanei he mau kio wai mapuna; a o ka aina i papaa aole auanei ia e makewai hou aku.

30. A e lawe mai auanei lakou i ka lakou mau waiwai makamae i na keiki a Eperaima, Kaʻu poe kauwa.

31. A e haalulu na palena o na puu mau loa imua o lakou.

32. A malaila lakou e kukuli iho ai ilalo a e hoolei ia me ka nani, he oiaio, ma Ziona, e na lima o na kauwa a ka Haku, oia hoi, na keiki a Eperaima;

33. A e hoopiha ia auanei lakou me na mele o ka hauoli mau loa.

34. Aia hoi, o keia ka hoopomaikai ana a ke Akua mau loa maluna o na ohana o Iseraela, a o ka hoopomaikai oi ae maluna o ke poo o Eperaima a me kona mau hoa.

35. A o ka poe hoi o ka ohana o Iuda, mahope o ko lakou ehaeha ana, e hoomaemae ia me ka hemolele imua o ka Haku, e noho imua Ona i ke ao a me ka po no ka wa mau loa a mau loa.

36. A ano, he oiaio, wahi a ka Haku, i hoomaopopo ia ai keia mau mea iwaena o oukou, e na kanaka o ka honua, ua hoouna aku Au i Koʻu anela e lele ana iwaena o ka lani, e paa ana i ka Euanelio mau loa, a ua haawi ia mea i kanaka, a ua ikea oia e kekahi poe, a e ike ia ana e ka poe he nui e noho ana ma ka honua;

37. A e hai ia keia Euanelio i na lahuikanaka, na ohana, na olelo, a me na kanaka a pau,

38. A e hele aku auanei na kauwa a ke Akua e olelo ana me ka leo nui, E makau i ke Akua a e hoonani ia Ia, no ka mea, ua hiki mai ka hora o Kona hoopai ana;

39. A e hoomana aku ia Ia, i ka Mea nana i hana i ka lani, a me ka honua a me ke kai, a me na waipuna,

40. E hea ana ma ka inoa o ka Haku i ke ao a me ka po, i ka i ana, Ina e haehae ae Oe i na lani, a e iho mai Oe ilalo nei, i kahe ai na mauna ilalo imua o Kou alo.

41. A e hooko ia auanei ia maluna o ko lakou mau poo, no ka mea, e like auanei ke alo o ka Haku me he ahi hoohehee la e hoopau ana, a me he ahi la hoi e baila ana i na wai.

42. E ka Haku, e iho mai Oe ilalo nei e hoike aku i Kou inoa i Kou poe kue, a e haalulu auanei na lahuikanaka a pau imua o Kou alo.

43. Ia Oe e hana ana i na mea weliweli—na mea a lakou i manao ole ai;

44. He oiaio, aia a iho mai Oe ilalo nei, a e kahe mai na mauna imua o Kou alo, e halawai auanei Oe me ka mea e hauoli ana a e hana ana i ka pono, ka mea e hoomanao ana ia Oe ma Kou mau aoao;

45. No ka mea, mai ka hookumu ia ana o ke ao nei, aole na kanaka i lohe a hoomaopopo ma ka pepeiao, aole no he maka i ike, e ke Akua e, Ooe wale no, i na mea nui Au i hoomakaukau ai no ka mea e kakali ana Nou.

46. A e olelo ia auanei: Owai la keia e iho mai nei mai ke Akua mai o ka lani me na aahu i hooluu ia; he oiaio, mai na wahi mai i ike ole ia, i aahu ia iloko o Kona kahiko nani, e kaahele ana iloko o ka nani o Kona ikaika?

47. A e olelo mai auanei Ia, Owau no Ia, ka Mea i olelo ma ka pono, he ikaika ma ka hoola ana.

48. A e ula auanei ka Haku iloko o Kona aahu, a e like kona mau aahu me ka mea e hehi ana ma kahi hehi waina,

49. A no ka nui loa ana o ka nani o Kona alo, e huna ana ka la i kona maka no ka hilahila; a e aua auanei ka mahina i kona malamalama; a e hoolei ia na hoku mai ko lakou mau wahi mai;

50. A e lohe ia auanei Kona leo, Ua hehi hookahi Au i ka mea kaomi waina, a ua lawe mai nei i ka hoopai maluna o na kanaka a pau; a aole kekahi mea me Aʻu;

51. A ua hehihehi iho Au ia lakou iloko o Koʻu huhu, a ua hehi io no Au maluna o lakou iloko o Koʻu inaina, a o ko lakou koko Kaʻu i kapipi iho ai maluna o Koʻu mau aahu, a kohu Koʻu mau lole a pau; no ka mea, o keia ka la o ka hoopai ana, ka mea hoi iloko o Kuu naau.

52. A ano ua hiki mai nei ka makahiki o Kuu poe i hoolapanai ia, a e hai aku auanei lakou i ke aloha lokomaikai o ko lakou Haku, a me na mea a pau Ana i kau mai ai maluna o lakou mamuli o Kona pono, a e like hoi me Kona aloha lokomaikai, no ka wa mau loa a mau loa.

53. Iloko o ko lakou mau ehaeha a pau, ua hoehaeha ia Oia. A na ka anela o Kona alo lakou i hoopakele; a iloko o kona aloha, a iloko o Kona manao menemene, hoolapanai mai la Oia ia lakou, a lawe ia lakou, a kaikai ia lakou i na la a pau o ka wa kahiko;

54. He oiaio, o Enoka hoi kekahi a me ka poe a pau me ia; o na Kaula mamua aku ona; a o Noa no hoi a me ka poe mamua aku ona; a o Mose no hoi a me ka poe mamua aku ona;

55. A mai ia Mose a ia Elaika; a mai ia Elaika a ia Ioane, ka poe me Kristo iloko o Kona alahouana, a me na Aposetolo hemolele, me Aberahama, Isaaka a me Iakoba, e ku ana lakou imua o ke alo o ke Keikihipa.

56. A e hoohamama ia na he o ka Poe Hoano, a e puka mai auanei lakou a e ku ma ka lima akau o ke Keikihipa, i ka wa Ana e ku aku ai maluna o Mauna Ziona, a maluna o ke kulanakauhale hemolele, ka Ierusalema Hou, a e mele lakou i ke mele o ke Keikihipa i ke ao a me ka po, no ka wa mau loa a mau loa.

57. A no keia kumu, i hiki ai na kanaka ke hoolilo ia i poe kaana pu i na nani e hoike ia mai ana, hoouna aku la ka Haku i ka piha o Kona Euanelio, Kona berita mau loa, e ao ana me ka moakaka a me ka pohihihi ole,

58. E hoomakaukau i ka mea nawaliwali no kela mau mea e hiki mai ana maluna o ka honua, a no ka ka Haku hana ma ka la o ka mea nawaliwali e hoohoka aku ai i ka mea naauao, a e lilo ai ka mea liilii i lahuikanaka ikaika, a na na mea elua e hooauhee aku i ko lakou mau umi tausani;

59. A ma na mea nawaliwali o ka honua e hahau ai ka Haku i na lahuikanaka me ka mana o Kona Uhane.

60. A no keia kumu i haawi ia mai ai keia mau kauoha; ua kauoha ia mai lakou ma ka la o ia mau mea i haawi ia mai ai, e huna ia mau mea mai ko ke ao nei aku, aka, e puka aku i keia manawa i na mea io a pau.

61. A o keia mamuli o ka noonoo a me ka makemake o ka Haku, ka Mea e hoomalu ana maluna o na mea io a pau.

62. A i ka mea e mihi ana a e hoomaemae ana ia ia iho imua o ka Haku, e haawi ia ana ia ia ke ola mau loa;

63. A maluna o ka poe e hoolohe ole ana i ka leo o ka Haku, e hooko ia ai kela mea i palapala ia e Mose, ke Kaula, oia hoi, e oki ia lakou maiwaena aku o na kanaka.

64. A pela no hoi kela mea i palapala ia e Malaki, ke Kaula; no ka mea, aia hoi, e hiki mai ana ka la e enaena ana me he imu la, a e lilo ka poe haaheo a pau a me ka poe hana hewa a pau i okumukumu mauu, a na ka la e hiki mai ana e hoopau ia lakou me ke ahi, wahi a ka Haku o na lehulehu, a e waiho ia auanei lakou me ke aa a lala ole.

65. No ia mea, eia ka pane a ka Haku ia lakou:—

66. Ma kela la Aʻu i hele mai ai i Koʻu poe kanaka ponoi, aole kekahi kanaka mawaena o oukou i hookipa mai Iaʻu a ua kipaku ia aku oukou.

67. A i Kuu hea hou ana mai aohe kekahi o oukou malaila e pane mai, eia nae, aole i hoopokole iki ia Kuu lima e hiki ole ai Iaʻu ke hoolapanai, aole hoi Koʻu mana e hoopakele ai.

68. Aia hoi, ma Kaʻu papa ana e hoomaloo no Au i ke kai, hoolilo no Au i na muliwai i waonahele; pilau ko lakou mau ia, a make hoi no ka makewai.

69. Hoaahu aku la Au i na lani i ka pouli, a kau aku la i ke kapa pakapaka i uhi no lakou.

70. A o keia ka oukou e loaa ai mai Kuu lima aku: E moe iho oukou iloko o ka luuluu.

71. Aia hoi, e nana, aohe poe nana e hoopakele ia oukou, no ka mea, ua hoolohe ole oukou i Kuu leo i ka wa Aʻu i kahea aku ai ia oukou mailoko mai o na lani; aole oukou i manaoio i Kaʻu mau kauwa, a i ka wa o lakou i hoouna ia aku ai io oukou la aole oukou i hookipa mai ia lakou;

72. No ia mea, sila iho la lakou i ka olelo hoike, a hoopaa iho la i ke kanawai, a ua haawi ia aku oukou i ka pouli;

73. O keia poe auanei ke hele aku i ka pouli mawaho, kahi o ka uwe ana, a me ke kumakena ana, a me ka uwi ana o na niho.

74. Aia hoi, o ka Haku ko oukou Akua ka i olelo aku ia mea. Amene.