1. Aia hoi, ua kahea ia oe a wae ia e kakau i ka Buke a Moramona, a i Kaʻu hana ma ka Oihanakahuna; a ua hapai ae Au ia oe mailoko mai o kou mau popilikia, a ua ao aku hoi ia oe, a ua hoopakele ia oe mai kou mau enemi mai a pau, a ua hoopakele ia oe mai na mana o Satana a mai ka pouli mai!

2. Eia nae, aole oe i ku i ke kala ia no kou mau lawehala ana; eia nae, e hele oe a mai hana hewa hou aku.

3. E hoonani i kau oihana; a mahope o kou lulu ana ma kau mau mahinaai a paa pono lakou, e hele koke i ka apana o ka Ekalesia ma Kolevile, Feieta, a me Manekeka, a na lakou e malama ia oe; a Naʻu e hoopomaikai ia lakou ma ko ka uhane a me ko ke kino pu;

4. Aka, ina aole lakou e hookipa ia oe, e hoouna aku no Au i kekahi hoino maluna o lakou ma kahi o ka hoopomaikai.

5. A e hoomau oe i ke kahea ana i ke Akua ma Koʻu inoa, a me ke kakau ana i na mea e haawi ia aku ana ia oe e ka Uhane Kokua, a e hoakaka ana i na Palapala Hemolele a pau i ka Ekalesia;

6. A e haawi ia no ia ia oe ia manawa koke no i kau mea e olelo a e kakau ai, a e lohe no lakou ia mea, a i ole, e hoouna aku no Au ia lakou i kekahi hoino ma kahi o ka hoopomaikai.

7. No ka mea, e haawi oe i kau mau hana a pau ma Ziona; a ma keia e loaa no ia oe ka ikaika.

8. E hoomanawanui iloko o na popilikia, no ka mea, e loaa no auanei ia oe he nui; aka, e hoomanawanui ma ia mau mea, no ka mea, aia hoi, Owau no me oe a hiki aku i ka hopena o kou mau la.

9. A ma na hana pili kino aole e loaa ana ia oe ka ikaika, no ka mea, aole keia o kau oihana. E makaala ma kau oihana a e loaa no ia oe na mea e hiki ai ke hoonani i kau oihana, a e hoakaka i na Palapala Hemolele a pau, a e hoomau i ke kau ana o na lima a me ka hoopaa ana i na lala o ka Ekalesia.

10. A e hoomau kou hoahanau o Oliva i ka lawe ana i Koʻu inoa imua o ko ke ao nei, a i ka Ekalesia no hoi. A mai manao oia e hiki ana ia ia ke olelo aku i na mea a lawa no Kaʻu hana; a aia hoi, Owau pu me ia a hiki i ka hopena.

11. Iloko Oʻu e loaa ai ia ia ka nani, a aole ma ona iho; ina paha iloko o ka nawaliwali, a i ole, iloko o ka ikaika, ina iloko o na mea paa, a paa ole paha.

12. A ma na wa a pau, a ma na wahi a pau, e oaka oia i kona waha a e hai aku i Kuu Euanelio me he leo la o ka pu, i ke ao a me ka po. A e haawi aku no Au ia ia i ka ikaika o ke ano i ike ole ia mawaena o na kanaka.

13. Mai ake nui i na hana mana, ke ole Au e kauoha aku ia oe, koe wale no ka mahiki ana i na daimonio, ka hoola ana i ka mai a me ka nahu ana o na mooniho-awa, a me ka poino o na laau make;

14. Mai hana aku oe i keia mau mea, ke ole i nonoi ia mai oe e ka poe e makemake ana ia mea, i ko ai ka Palapala Hemolele; no ka mea, e hana oe e like me ka mea i palapala ia.

15. A ma kela a me keia wahi au e komo ai, a hookipa ole mai lakou ia oe ma Koʻu inoa, e waiho oe i hoino ma kahi o ka hoopomaikai, ma ka lulu ana i ka lepo o kou mau wawae e kue ia lakou ma ke ano he hoike, a me ka holoi ana i kou mau wawae ma kapa alanui.

16. A eia kekahi, o kela a me keia mea e kau ana i kona mau lima maluna ou me ka ikaika, e kauoha oe e hahau ia ma Koʻu inoa; a aia hoi, e hahau no Au ia lakou e like me kau mau olelo, ma ka manawa kupono Iaʻu.

17. A o ka mea e hele ana i ke kanawai me oe e hoopai ia auanei e ke kanawai.

18. A mai lawe oe i aa-moni, a i ole, i kieke ai, aole hoi i kookoo, aole hoi i elua kuka, no ka mea, na ka Ekalesia e haawi ia oe ia hora no na mea au e nele ai i ai a i aahu, a i kamaa, a i kala, a i kieke;

19. No ka mea, ua kahea ia oe e paipai i Kuu malawaina me kekahi paipai ikaika loa, he oiaio, no ka manawa hope loa. He oiaio, a o ka poe a pau no hoi au i hoolilo ai e hana lakou e like me keia ano i kuhikuhi ia. Amene.