1. E haliu a hoolohe mai, e oukou, Koʻu poe kanaka, wahi a ka Haku a me ko oukou Akua, ka poe Aʻu e hauoli nei e hoopomaikai aku me na pomaikai nui loa, ka poe hoi e hoolohe mai ana Iaʻu; a o oukou ka poe e hoolohe ole mai ana Iaʻu, ka poe e olelo ana ua lawe i Koʻu inoa, Kaʻu e hoino aku ai me ke koikoi loa o na hoino a pau.

2. E haliu mai, e oukou na Lunakahiko o Kuu Ekalesia, ka poe Aʻu i kahea ai: aia hoi, ke haawi aku nei Au ia oukou i kekahi kauoha, e hoakoakoa oukou ia oukou iho i lokahi ai ma Kaʻu olelo,

3. A ma ka pule o ko oukou manaoio e loaa ai ia oukou Koʻu kanawai, i hoomaopopo ai oukou i ke ano o ka hoomalu ana i Kuu Ekalesia, a i pololei ai na mea a pau imua Oʻu.

4. A Owau ana ko oukou Mea Hoomalu i Koʻu wa e hiki mai ai; a aia hoi, e hiki koke mai ana Au a e nana pono oukou i malama ia ai Koʻu kanawai.

5. O ka mea e hookipa ana i Koʻu kanawai a malama ia mea, oia no Kaʻu haumana; a o ka mea e olelo ana ua hookipa oia ia mea a malama ole nae, aole oia he haumana Naʻu, a e kipaku ia aku oia maiwaena aku o oukou:

6. No ka mea, aole he pono e haawi ia na mea o na keiki o ke aupuni i ka poe i kupono ole, a i ole, i na ilio, a i ole, e kiola ia na momi imua o na puaa.

7. A eia hou, he mea pono e kukulu ia i hale no Kau kauwa, o Iosepa Kamika, opio, i wahi e noho a e unuhi ai.

8. A eia hou, he mea pono ke noho Kaʻu kauwa, o Sidane Rigedona, e like me kana i manao ai he pono, ke malama nae oia i Kaʻu mau kauoha.

9. A eia hou, ua kahea aku Au i Kaʻu kauwa, ia Eluene Paterige, a ke haawi aku nei Au i kekahi kauoha, e koho ia oia e ka leo o ka Ekalesia, a e hoolilo ia i Bihopa no ka Ekalesia, e haalele i kona mau waiwai kalepa a e hoolilo i kona manawa a pau iloko o na hana o ka Ekalesia:

10. E kiai maluna o na mea a pau e like me ia e waiho ia ana ia ia, ma Koʻu mau kanawai i ka la Aʻu e haawi aku ai ia mau mea.

11. A o ke kumu o keia no ka maemae o kona naau imua Oʻu, no ka mea, ua like oia me Natanaela o ka wa kahiko, aole hewa iloko ona.

12. Ke haawi ia nei keia mau olelo ia oukou, a he maemae ia mau mea imua Oʻu; no ia mea, e akahele i ka oukou paa ana ia mau mea, no ka mea, e hooko ia ia mau mea maluna o ko oukou mau kino me ka uhane i ka la o ka hookolokolo ana. Pela io no. Amene.