1. I mea e sila ai i ka olelo hoike o keia buke a me ka Buke a Moramona, ke kukala nei makou i ka Pepehi ia ana o Iosepa Kamika, ke Kaula, a me Hailama Kamika, ka Makualii. Ua ki pu ia laua maloko o ka hale paahao o Katage, ma ka la 27 o Iune, M. H. 1844, ma kau wahi o ka hora 5 o ke ahiahi, e kekahi puali o ka poe uluaoa i pena ia a eleele—o ka huina he 150 a i ole 200 paha poe kanaka. O Hailama ka i ku mua i ka poka a haule malie iho la, me ka olelo ana ae, “He kanaka make au!” Lele aku la o Iosepa mai ka puka aniani aku, a ua ku i ka poka a make ma ia hana ana, me ka olelo ana ae, “E ka Haku kuu Akua;” Ua ki-ki hou ia laua a elua mahope o ko laua make ana ma ke ano hoomainoino loa, a loaa like ia laua a elua he eha poka pakahi.

2. O Ioane Tela, a me Wilada Rikeke, he mau lala o ka Papa Umikumamalua na mea wale no iloko o ka rumi ia manawa; o ka mua, ua hoeha ia ma ke ano ino loa me na poka eha, aka, ua ola nae oia mahope mai; a o ka hope, ua pakele ma o ka lokomaikai la o ke Akua, “me ka loaa ole o kekahi puka ma kona aahu.”

3. Ua hana o Iosepa Kamika, ke Kaula a Mea Ike o ka Haku, i na mea i oi aku (koe o Iesu wale no) no ka hoola ana i na kanaka o keia ao, mamua o kekahi kanaka e ae i ola maluna olaila. Iloko o ka manawa pokole o iwakalua makahiki, ua hoopuka mai oia i ka Buke a Moramona, ka mea ana i unuhi ai ma ka haawina a me ka mana o ke Akua, a ma ona la i hoolaha ia ai ia ma na aina nui elua o ka honua; a ua hoouna hoi i ka piha o ka Euanelio mau loa, ka mea iloko olaila, i na mahele eha o ka honua; a ua hoopuka mai i na hoikeana a me na kauoha, na mea i piha ai keia Buke o na Berita a me na Kauoha, a me kekahi mau palapala naauao a me na ao ana e ae he nui no ka pomaikai o na keiki a kanaka; houluulu iho la na tausani he nui o ka Poe Hoano o na La Hope nei; kukulu ae la i kekahi kulanakauhale nui; a waiho iho la i hanohano a i inoa hoi i hiki ole ke hoopau ia. Ua ola oia me ka hanohano, a ua make oia me ka hanohano iloko o na maka o ke Akua a me kona poe kanaka, a e like me ka hapa nui loa o ka ka Haku poe i poni ia i na wa kahiko, ua sila oia i kona misiona a me kana mau hana me kona koko ponoi—a pela no hoi kona kaikuaana o Hailama. I ka wa e ola ana aole laua i mokuahana, a i ka make ana aole laua i hookaawale ia!

4. I ka wa o Iosepa i hele ai i Katage e haawi ia ia iho no na koi hoopunipuni o ke kanawai, he elua a ekolu la paha mamua o kona pepehi ia ana, olelo ae la oia, “Ke hele nei au me he keikihipa la i kahi e pepehi ia ai; aka, ua malie au e like me ke kakahiaka o ke kau mehana; he lunaikehala koʻu i nele i ka hoahewa ana i ke Akua, a i na kanaka a pau. E Make Hala Ole Ana Au, A E Olelo Ia Auanei Noʻu—Ua Pepehi Mainoino Ia Oia.” Ia kakahiaka no, mahope o ko Hailama hoomakaukau ana e hele—e olelo ia anei i kahi e pepehi ia ai? Ae, no ka mea, pela io no ia,—heluhelu iho la oia i keia pauku malalo iho nei ma na pauku 36-38 o ka mokuna umikumamalua o Etera, ma ka Buke a Moramona, a pelu mai la oia i ka lau o ka buke malaila:

5. “A eia kekahi, pule aku la au i ka Haku i haawi aku ai Oia i ka poe Genetile i ka lokomaikai, i loaa ai ia lakou ke aloha io. A eia kekahi, i mai la ka Haku iaʻu: Ina aole o lakou aloha io, he mea ole ia ia oe, ua kupaa oe; nolaila, ua maemae kou mau aahu. A no kou ike ana i kou nawaliwali, e hooikaika ia auanei oe, a hiki aku i ka noho ana ilalo ma kahi Aʻu i hoomakaukau iho ai ma na wahi i noho ai o Koʻu Makua. Ano, ke uwe aloha aku nei au . . . . . i ka poe Genetile, he oiaio, a i kuu poe hoahanau no hoi aʻu e aloha nei, a hiki i ka wa e halawai pu ai kakou imua o ka noho hookolokolo o Kristo, kahi e ike ai na kanaka a pau, aole i kikohukohu ia koʻu mau aahu me ko oukou koko.” Ano, ua make na mea nana ka hoike i paa ai, a ua mana ko laua hoike.

6. He 44 mau makahiki o Hailama, iloko o Feberuari, M. H. 1844, a o Iosepa Kamika he 38 iloko o Dekemaba, M. H. 1843; a mai keia manawa aku e helu pu ia ko laua mau inoa mawaena o ka poe i make no ka hoomana; a e hoomaopopo ka mea heluhelu iloko o kela a me keia lahuikanaka, ua hoolilo ia ke koko pookela o ke keneturia umikumamaiwa e hoopuka mai i ka Buke a Moramona a me keia Buke o na Berita a me na Kauoha o ka Ekalesia, no ka hoola ana i ko keia ao poino loa; a ina e hiki ke a ia ke kumulaau maka i ke ahi no ka nani o ke Akua, he mea hiki wale ke hoopau ae i “na kumulaau maloo” i hoomaemae ia ai ka pawaina o ka ino. Ua ola laua no ka nani, ua make laua no ka nani; a o ka nani ko laua uku mau loa. Mai ia wa aku ia wa aku e iho aku no ko laua mau inoa i na mamo me he mau momi la no ka poe i hoomaemae ia.

7. Ua hala ole laua i kekahi karaima, e like me laua i hooiaio pinepine ia mamua aku, a ua hoopaa wale ia no iloko o ka halepaahao mamuli o ka ohumu kipi o ka poe kumakaia a me na kanaka hewa; a o ko laua koko hala ole maluna o ka papahele o ka halepaahao o Katage, he sila akea ia i hoopaa ia no ka “Hoomana Moramona” i hiki ole ke hoole ia e kekahi aha hookolokolo maluna o ka honua; a o ko laua koko hala ole maluna o ka sila o ka Mokuaina o Ilinoi, me ka aelike o ka Mokuaina i hoohiki ia e ke Kiaaina i uhaki wale ia, he hoike ia no ka oiaio o ka Euanelio mau loa, e hiki ole ai i ko ke ao nei a pau ke hoohiolo; a o ko laua koko hala ole maluna o ka hae o ke kuokoa, a maluna o ke Kumukanawai o Amerika Huipuia, he elele ia no ka hoomana o Iesu Kristo e hoowalania ana i na naau o na kanaka hoopono mawaena o na lahuikanaka a pau; a o ko laua koko hala ole me ke koko hala ole o ka poe make no ka hoomana malalo o ke kuahu a Ioane i ike ai, e kahea ana ia i ka Haku o na lehulehu, a hiki i Kona hoopai ana no ua koko la maluna o ka honua. Amene.