1. He Olelo Naauao no ka pomaikai o ka Aha Kuka o na Kahuna Kiekie, i akoakoa ma Ketalana, a no ka Ekalesia; a me ka Poe Hoano no hoi ma Ziona.

2. E hoouna ia aku me ke aloha—aole ma ke ano he kauoha, aole hoi ma ka hookikina ana, aka, ma ke ano he hoikeana a me ka olelo naauao e hoike ana i ke ano pololei a me ka makemake o ke Akua no ka hoola ana i na kino o ka Poe Hoano a pau ma na la hope.

3. I haawi ia i kumupaa me ka olelo hoopomaikai i kupono i ka poe nawaliwali a me ka poe nawaliwali loa o ka Poe Hoano a pau, ka Poe Hoano maoli, a i ole, ka poe e hiki ke kapa ia he Poe Hoano.

4. Aia hoi, he oiaio, penei ka olelo a ka Haku ia oukou, mamuli o na hewa a me na manao ino e paa nei, a e ulu mai ana hoi iloko o na naau o na kanaka hewa ma na la hope, ua ao aku Au ia oukou, a ke ao e aku nei ia oukou, ma ka haawi ana aku ia oukou i keia olelo naauao ma ka hoike ana,

5. Ina e inu kekahi kanaka mawaena o oukou i ka waina, a i ole, i ka waiona, aia hoi, aole ia he hana maikai, aole hoi i kupono imua o ko oukou Makua, koe wale no ma ko oukou hoakoakoa pu ana ia oukou iho e haawi aku i ka oukou mau ahaaina a ka Haku imua Ona.

6. A aia hoi, o ka waina e pono ai no ia mea, he oiaio, o ka waina maemae mai ka hua mai o ke kumu waina, a i hana ia e oukou ponoi.

7. A, eia hou, aole no ka opu na waiona, aka, no ka holoi ana i ko oukou mau kino.

8. A eia hou, o ka baka aole ia no ke kino, aole hoi no ka opu, a aole ia he mea maikai no ke kanaka, aka, he nahelehele ia no na palapu a no na bipi mai a pau, e lawelawe ia nae me ka noonoo akahele a me ke akamai.

9. A eia hou, aole pono na mea inu wela no ke kino, aole hoi no ka opu.

10. A eia hou, he oiaio, ke olelo aku nei Au ia oukou, ua hookaawale ke Akua i na nahelehele a pau i kupono ke ai ia no ke kino, ke ano a me ka pomaikai o ke kanaka.

11. O kela a me keia nahelehele ma kona kau iho, a o kela a me keia hua ai ma kona kau iho; e hoohana ia keia mau mea a pau me ka noonoo a me ka mahalo.

12. He oiaio, ua hookaawale Au ka Haku i ka io no hoi o na holoholona a me na manu o ka lewa no ka pomaikai o ke kanaka me ka mahalo; eia nae, e ai ia ia mau mea me ka pakiko;

13. A he mea oluolu ia Iaʻu aole e ai ia ia mau mea, koe wale no ma na manawa o ka hooilo, a i ole, ma ka wa anu, a i ole, ma ka wa wi.

14. Ua hookaawale ia na hua liilii a pau i mau mea e pomaikai ai ke kanaka a me na holoholona, i mau mea e ola ai ke kino, aole no ke kanaka wale no, aka, no na holoholona pu o ke kula, a me na manu o ka lewa, a me na holoholona hihiu a pau e holo ana, a i ole e kolo ana maluna o ka honua;

15. A ua hana ia keia mau mea e ke Akua no ka pomaikai o ke kanaka i na manawa o ka wi a me ke wa pololi loa wale no.

16. He maikai na hua liilii a pau i ai na ke kanaka, pela no hoi ka hua o na mea hihi, ka mea e hoohua mai ana i ka hua, ina paha iloko o ka lepo, a i ole, maluna ae o ka lepo.

17. Eia nae, o ka huita na ke kanaka ia, a o ke kulina na ka bipi, a o ka ota na ka lio, a o ka rai na na manu a me na puaa, a me na holoholona a pau o ke kula, a o ka bale na na holoholona hana a pau, a no ka hana ana i na mea inu e ona ole ai, a pela hoi na hua liilii e ae.

18. A o ka Poe Hoano a pau e hoomanao ana e malama a e hooko i keia mau olelo, e hele ana me ka hoolohe ana i na kauoha, e loaa ia lakou ke ola kino maikai iloko o ko lakou mau piko, a me ka lolo iloko o ko lakou mau iwi,

19. A e loaa ia lakou ka naauao a me na waihona nui o ka ike, oia hoi, na waihona i huna ia;

20. A e holo no lakou aole nae e maluhiluhi, a e hele hoi aole nae e maule;

21. A ke haawi aku nei Au, ka Haku, ia lakou i kekahi olelo hoopomaikai, e kaalo ae no ka anela luku ia lakou e like me ia i na keiki o ka Iseraela, a aole e luku ia lakou. Amene.