1. O Koʻu makemake ia e koho ia a hoolilo ia Kuu kauwa, o Walena A. Kaudare, i Kahuna Kiekie e hoomalu ana maluna o Kuu Ekalesia, ma ka aina o ke Kuokoa [Freedom] a me na wahi e pili kokoke mai ana;

2. A e hai i Kuu Euanelio mau loa a e hapai i kona leo a ao aku i na kanaka, aole ma kona wahi ponoi wale no, aka, ma na aina e ae e pili pu ana,

3. A hoolilo i kona manawa holookoa ma keia oihana kiekie a hemolele Aʻu e haawi aku nei ia ia, e imi ikaika ana i ke aupuni o ka lani a me kana pono, a o na mea a pau e pono ai e pakui ia ana ia mea, no ka mea, ua kupono ka paahana no kona uku.

4. A eia hou, he oiaio Kaʻu e olelo aku nei ia oukou, ke hookokoke mai nei ka hiki ana mai o ka Haku, a e loaa ko ke ao nei me he aihue la i ka po:

5. Nolaila, e kaei i ko oukou mau puhaka i lilo ai oukou i poe keiki no ka malamalama, a aole oukou e loaa i kela la me he aihue la.

6. A eia hou, he oiaio Kaʻu e olelo aku nei ia oukou, aia he hauoli ma ka lani i ka wa a Kuu kauwa, o Walena, i kulou ai i Kuʻu kookoo, a hookaawale ia ia iho mai na hana maalea ae a kanaka;

7. Nolaila, pomaikai Kuu kauwa o Walena, no ka mea, e lokomaikai no Au ia ia; a me ka nana ole i ka haakei o kona naau, e hapai no Au ia ia i luna, ke hoohaahaa oia ia ia iho imua Oʻu.

8. A e haawi no Au ia ia i ka lokomaikai a me ka hooia ana i mea e kupaa ai oia, a ina e hoomau oia i hoike kupaa a i malamalama no ka Ekalesia, ua hoomakaukau Au i leialii nona iloko o na hale o Kuu Makua. Pela io no. Amene.