1. Ano, aia hoi, ke olelo aku nei Au ia oe, no kou haawi ana i kela mau palapala au i loaa ai ka mana i haawi ia aku ai ia oe e unuhi, ma o ka Urima a me Tumima la, iloko o na lima o kekahi kanaka hewa, ua nalowale ia mau mea ia oe,

2. A ua lilo aku no hoi mai ia oe aku kou haawina ia manawa hookahi no, a o kou naau ua hoopouli ia:

3. Aka nae, ua hoihoi hou ia aku ia ia oe i keia wa, nolaila, e malama e kupaa oe a hoomau aku a hiki i ka pau pono ana o ke koena o ka hana o ka unuhi ana e like me kau i hoomaka mai ai.

4. Mai holo awiwi loa, a i ole hana a oi aku mamua o kou ikaika a me na mea i hoomakaukau ia i mea i hiki ai ia oe ke unuhi; aka e hooikaika a hiki i ka hopena:

5. E pule mau, i puka mai ai oe i mea lanakila; he oiaio, i lanakila ai oe maluna o Satana, a i pakele ai oe mai na lima mai o na kauwa a Satana, ka poe e kakoo ana i kana hana.

6. Aia hoi, ua imi lakou e pepehi ia oe; he oiaio, o ke kanaka no kekahi au i hilinai ai, ua imi e pepehi ia oe.

7. A no keia kumu, olelo aku la Au he kanaka hewa oia, no ka mea, ua imi oia e lawe aku i na mea i waiho ia aku ai ia oe; a ua imi pu no hoi oia e hoopau i kou haawina;

8. A no kou haawi ana i na palapala iloko o kona mau lima, aia hoi, ua lawe na kanaka hewa ia mau mea mai ia oe aku:

9. Nolaila, ua haawi aku oe ia mau mea; ae, oia hoi na mea laa no ka hana hewa ana.

10. A, aia hoi, na Satana i hookomo aku ia iloko o ko lakou mau naau e hoololi i na huaolelo au i kena ai e kakau ia; a i ole, ka mea au i unuhi ai, na mea i hemo aku ai mai kou mau lima aku.

11. A, aia hoi, ke i aku nei Au ia oe, no ko lakou hoololi ana i na huaolelo, ua okoa loa ko lakou heluhelu ia ana mai na mea au i unuhi ai a i kauoha ai e kakau ia;

12. A ma keia ano ua imi ke diabolo e waiho i ala maalea, i hoohiolo ai oia i keia hana;

13. No ka mea, ua hookomo aku oia iloko o ko lakou mau naau e hana i keia, oia hoi, ma ka hoopunipuni ana e olelo ai lakou ua hei oe ia lakou ma na huaolelo au i hookohukohu ai e unuhi.

14. He oiaio, ke i aku nei Au ia oe, aole Au e ae ia Satana e hooko i kona manao ino ma keia mea,

15. No ka mea, aia hoi, ua hookomo oia iloko o ko lakou mau naau e koi ia oe e hoao i ka Haku kou Akua, ma ke noi ana e unuhi hou i ua mea la.

16. A, aia hoi, ke olelo nei lakou a ke noonoo nei iloko o ko lakou mau naau e nana kakou ina ua haawi ke Akua ia ia i ka mana e unuhi, ina pela io, e haawi hou mai no Ia ia ia i ka mana;

17. A ina e haawi hou mai ke Akua ia ia i ka mana, a i ole ina e unuhi hou mai oia, a i ole ma kekahi olelo ana, ina e hoopuka hou mai oia ia mau huaolelo hookahi no, aia hoi, eia no ia mea hookahi me kakou, a ua hoololi kakou ia mau mea:

18. Nolaila, aole e kulike ana ia mau mea, a e olelo no kakou ua hoopunipuni oia ma kana mau olelo, a aohe ona haawina, a aohe no hoi ona mana:

19. Nolaila, e anai kakou ia ia, a me ka hana hoi, a e hana kakou i keia i hilahila ole ai kakou ma ka hopena, i loaa ai ia kakou ka hanohano o ko ke ao nei.

20. He oiaio, he oiaio, ke i aku nei Au ia oe, ua loaa ia Satana ka mana nui maluna o ko lakou mau naau; ke hoeueu nei oia ia lakou e hana ino e kue ana i ka pono,

21. A o ko lakou mau naau ua haumia, a ua piha i ka ino a me na mea hoopailua, a ua aloha lakou i ka pouli mamua o ka malamalama, no ka mea, o ka lakou mau hana he ino: nolaila, aole o lakou nonoi mai Iaʻu.

22. Ke hookonokono nei o Satana ia lakou, i alakai ai oia i ko lakou mau uhane me ke kino i ka make.

23. A pela iho la oia i waiho ai i pahele maalea, e manao ana e hoohiolo i ka hana a ke Akua, aka, e koi aku auanei Au i keia mai ko lakou mau lima, a e huli auanei ia i ko lakou hoohilahila a hoahewa ia ana ma ka la o ka hookolokolo ana;

24. He oiaio, ke hookonokono nei oia i ko lakou mau naau e inaina i keia hana;

25. He oiaio, ke i aku nei oia ia lakou, e hoopunipuni a e hoohalua e pahele, i hiki ai ia oukou ke pepehi—aia hoi, aole keia he mea hewa, a pela oia e hoomalimali nei ia lakou, a hai aku ia lakou, aole he hewa ke hoopunipuni, i loaa ai ia lakou ke kanaka iloko o ka hoopunipuni, i pepehi ai lakou ia ia;

26. A pela oia e hoomalimali nei ia lakou, a alakai ia lakou a hiki i kona kaualako ana i ko lakou mau uhane me he kino i lalo i gehena; a pela iho la oia i kena ai ia lakou e pahele lakou iho iloko o ko lakou pahele ponoi;

27. A pela oia e hele ai iuka a ikai, i o a ianei ma ka honua, e imi ana e pepehi i na uhane me ke kino o na kanaka.

28. He oiaio, he oiaio, ke olelo aku nei Au ia oe, auwe ka mea hoopunipuni no ke pahele ana, no ka mea, ke manao nei oia aia no kekahi mea okoa ae e hoopunipuni nei no ke pahele ana, no ka mea, o ka poe o ia ano aohe e pakele ana mai ka hoopai ana a ke Akua.

29. Ano, aia hoi, ua hoololi lakou i keia mau huaolelo, no ka mea, na Satana i olelo aku ia lakou, Ua hoopunipuni oia ia oe: a pela oia e hoomalimali ai ia lakou e hana i ka hewa, i ae ai oe e hoao i ka Haku i kou Akua.

30. Aia hoi, ke i aku nei Au ia oe, mai unuhi hou oe i kela mau olelo, na mea i lilo ai mai kou mau lima aku;

31. No ka mea, aia hoi, aole e ko ana ko lakou mau manao ino ma ka hoopunipuni kue ana i kela mau olelo. No ka mea, aia hoi, ina e hoopuka mai oe i na huaolelo hookahi no e olelo ana no lakou ua hoopunipuni oe; a ua hookohukohu oe e unuhi, aka nae, ua kue oe ia oe iho:

32. A, aia hoi, e hoolaha no lakou i keia, a e hoopaakiki no o Satana i ka naau o na kanaka e hoalala ia lakou e inaina ia oe, i manaoio ole ai lakou i Kaʻu mau olelo.

33. Pela o Satana e manao nei e lanakila maluna o kau olelo hoike iloko o keia hanauna, i hiki ole ai i ka hana ke puka mai ma keia hanauna:

34. Aka, aia hoi, eia ka naauao, a no ka mea, ke hoike nei Au ia oe i ka naauao, a haawi aku ia oe i na kauoha e pili ana i keia mau mea, i ka mea au e hana ai, mai hoike aku ia mea i ko ke ao nei a hiki i ka pau pono ana ia oe o ka hana o ka unuhi ana.

35. Mai haohao oe no Kaʻu olelo ana aku ia oe, eia ka naauao, mai hoike aku ia mea i ko ke ao nei, no ka mea, olelo aku la Au, mai hoike ia mea i ko ke ao nei, i hoopakele ia ai oe.

36. Aia hoi, aole Au e olelo ana mai hoike aku oe ia mea i ka poe pono;

37. Aka, no ka hiki ole ia oe ke hoomaopopo i ka poe pono, a i ole, no ka hiki ole ia oe ke hoomaopopo i ka poe hewa mai ka poe pono mai, nolaila, ke i aku nei Au ia oe, e hamau oe a hiki i Koʻu ike ana i ke kupono e hoike i na mea a pau i ko ke ao nei e pili ana i keia mea.

38. A, ano, he oiaio, ke i aku nei Au ia oe, o ka mooolelo o ua mau mea la au i kakau ai, i lilo mai kou mau lima aku, ua kahakaha ia maluna o na papa o Nepai;

39. He oiaio hoi, a e hoomanao oe ua olelo ia iloko o ua mau palapala la aia he mooolelo i oi aku ka piha i hoike ia no keia mau mea maluna o na papa o Nepai.

40. A, ano, no ka mea, o ka mooolelo i kahakaha ia maluna o na papa o Nepai ua oi aku ka piha e pili ana i na mea Aʻu i makemake ai, iloko o Koʻu naauao, e lawe mai i ka hoomaopopo o kanaka ma keia mooolelo;

41. Nolaila, e unuhi oe i na mea i kahakaha ia maluna o na papa o Nepai, a hoea aku hoi oe i ka nohoalii ana o ke alii Beniamina, a i ole, a hiki i kou hoea ana i kela wahi au i unuhi ai, au hoi e paa nei:

42. A, aia hoi, e hoolaha oe o ka mooolelo ia o Nepai, a pela Au e hoohauhili ai i ua poe la i hoololi ai i Kaʻu mau olelo.

43. Aole Au e ae ia lakou e hoohiolo i Kaʻu hana; he oiaio, e hoike aku no Au ia lakou ua oi aku Koʻu naauao mamua o ka maalea o ke diabolo.

44. Aia hoi, ua loaa wale no ia lakou he wahi hapa, a i ole he mooolelo i hoopokole ia o ka mooolelo o Nepai.

45. Aia hoi, he nui na mea i kahakaha ia maluna o na papa o Nepai e hoomoakaka lea ae ana i Kuu Euanelio; nolaila, he naauao ia iloko Oʻu e unuhi oe i keia mahele mua o na kaha a Nepai, a hoolaha aku iloko o keia buke.

46. A, aia hoi, o ke koena iho a pau o keia buke, aia iloko olaila na mahele a pau o Kuu Euanelio na mea a Kuu mau Kaula Hemolele, he oiaio, a pela hoi me ka Kuu mau haumana i makemake ai iloko o ka lakou mau pule e puka mai i keia poe kanaka.

47. A olelo aku la Au ia lakou, e haawi ia aku ana no ia ia lakou e like me ko lakou manaoio iloko o ka lakou mau pule;

48. He oiaio, a o keia ko lakou manaoio, o Kuu Euanelio Aʻu i haawi aku ai ia lakou, i hiki ai ia lakou ke hai i ko lakou mau la, e hiki mai no ia i ko lakou mau hoahanau ka poe Lamana, a pela pu no hoi i ka poe a pau i lilo i poe Lamana, mamuli o ko lakou mokuahana ana.

49. Ano, aole o keia wale ae la no—o ko lakou manaoio iloko o ka lakou mau pule, oia keia e hoike pu ia keia Euanelio, ina he mea hiki, i na lahui e ae ke noho ma keia aina;

50. A pela lakou i waiho ai i pomaikai maluna o keia aina ma ka lakou mau pule, o ka mea auanei e manaoio ana i keia Euanelio ma keia aina, e loaa ke ola mau loa;

51. He oiaio, i noa auanei ai ia i kela a me keia lahui, ohana, olelo, a me na kanaka.

52. A ano, aia hoi, e like me ko lakou manaoio ma ka lakou mau pule e lawe mai ai Au i keia mahele o Kuu Euanelio i ka hoomaopopo ana o Kuu poe kanaka. Aia hoi, aole Au i lawe mai nei ia e hoohiolo i ka mea a lakou i loaa ai, aka e kukulu ae ia mea i luna.

53. A no keia kumu Aʻu i olelo ai, ina aole keia hanauna e hoopaakiki i ko lakou mau naau, e kukulu auanei Au i Kuu Ekalesia mawaena o lakou.

54. Ano, aole Au e olelo ana i keia i mea a hoohiolo ai i Kuu Ekalesia, aka, ke olelo nei Au i keia e kukulu i Kuu Ekalesia;

55. Nolaila, o ka mea iloko o Kuu Ekalesia aole ana mea e hopohopo ai, no ka mea, i ka poe o ia ano e loaa auanei ke aupuni o ka lani;

56. Aka, o lakou ka poe i makau ole Iaʻu, aole hoi i malama i Kaʻu mau kauoha, aka, kukulu i na ekalesia no lakou iho i loaa ai ka waiwai, ae, a o ka poe a pau e hana hewa ana a kukulu i ke aupuni o ke diabolo; ae, he oiaio, he oiaio, ke i aku nei Au ia oe, o lakou Kaʻu e hoonioni aku ai, a e hoonaueue, a hoohaalulu a hiki iloko loa.

57. Aia hoi, Owau no o Iesu Kristo, ke Keiki a ke Akua. Hiki mai la Au i Koʻu poe iho, aole nae Koʻu poe iho i hookipa mai Iaʻu.

58. Owau no ka malamalama e olino nei iloko o ka pouli, aole nae ka pouli i hoomaopopo ia mea.

59. Owau no ka mea i olelo i Kaʻu mau haumana, He mau hipa e ae no Kaʻu aole no keia pa, a he nui o lakou i hoomaopopo ole mai i Kaʻu.

60. A e hoike aku no Au i keia poe kanaka he mau hipa e ae no Kaʻu, a he lala lakou o ka hale o Iakoba;

61. A e hoopuka mai no Au i ka lakou mau hana kamahao i ka malamalama, na hana a lakou i hana ai iloko o Koʻu inoa;

62. He oiaio, a e hoopuka mai no hoi Au i Kuu Euanelio, ka mea i hai ia ia lakou, i ka malamalama, a aia hoi, aole lakou e hoole ana i ka mea i loaa aku ia oe, aka, e kukulu ana lakou ia mea, a e hoopuka mai i ka malamalama i na mea oiaio o Kaʻu ao ana, he oiaio, a o ke ao ana hookahi wale no iloko Oʻu;

63. A o keia Kaʻu e hana nei i hiki ai Iaʻu ke kukulu i Koʻu Euanelio, i ole ai e nui ka paio ana, he oiaio, ke hoeueu nei o Satana i ka naau o na kanaka i ka paio ana e pili ana i na kumu manao o Kaʻu mau ao ana; a ma keia mau mea ke kuhihewa nei lakou, no ka mea, he hookahuli nei lakou i na Palapala Hemolele aole hoi hoomaopopo ia mau mea;

64. Nolaila, e wehe aku no Au ia lakou i keia mea huna pohihihi nui;

65. No ka mea, aia hoi, e houluulu Au ia lakou e like me ka moa e houluulu ai i kana ohana keiki malalo o kona mau eheu, ina aole lakou e hoopaakiki i ko lakou mau naau,

66. He oiaio, ina e hele mai lakou, ua hiki no, a e inu wale i ka wai o ke ola.

67. Aia hoi, o keia Kaʻu ao ana: o kela me keia mea e mihi ana a hele mai i Oʻu nei, oia no Koʻu Ekalesia.

68. O ka mea hai a oi aku, a i ole, a emi mai paha i keia, aole ia Noʻu nei, aka ua kue Iaʻu; nolaila, aole ia no Kuu Ekalesia.

69. A ano, aia hoi, o ka mea no Koʻu Ekalesia, a hoomau no Koʻu Ekalesia a hiki i ka hopena, oia auanei Kaʻu e kukulu ai maluna o Kuu pohaku, a o na ipuka o ka po aole e lanakila maluna ona.

70. A ano, e hoomanao i na olelo a ka Mea Nona ke ola a me ka malamalama o ke ao nei, kou Hoolapanai, kou Haku a me kou Akua. Amene.