1. He hana nui a kupaianaha i aneane e puka mai mawaena o na keiki a kanaka.

2. Aia hoi, Owau no ke Akua, a e hoolohe mai i Kaʻu olelo, ka mea ola a mana, i oi aku ka oi i ko ka pahikaua oi-lua, i ka mahele ana a kaawale na ami a me ka lolo; nolaila, e hoolohe mai i Kaʻu olelo.

3. Aia hoi, ua keokeo ka mahinaai, a makaukau e ohi ia, nolaila, o ka mea i makemake e ohi, e hookomo aku ia i kana pahi-kakiwi, me kona ikaika, a e ohi oi kau ka la, i hoahu ai oia no kona uhane ke ola mau loa iloko o ke aupuni o ke Akua;

4. He oiaio, o ka mea e hookomo i kana pahi-kakiwi a ohi, oia ka i kahea ia e ke Akua;

5. Nolaila, ina e noi mai oe Iaʻu, e loaa aku no ia oe, ina e kikeke oe, e wehe ia no ia ia oe.

6. Ano, oiai ua noi mai oe, aia hoi, ke olelo aku nei Au ia oe, e malama i Kaʻu mau kauoha, a e imi e hoopuka mai a hookupaa i ka hana o Ziona.

7. Mai imi i ka waiwai, aka, i ka naauao, a, aia hoi, o na mea pohihihi o ke Akua e wehe ia mai ia ia oe, a alaila e hoowaiwai ia oe; aia hoi, o ka mea i loaa ke ola mau loa, ua waiwai no ia.

8. He oiaio, he oiaio, ke olelo aku nei Au ia oe, oia hoi, e like me kau i makemake ai mai Oʻu aku nei, pela no e hana ia aku ai ia ia oe; a ina e makemake oe, e lilo auanei oe i mea nana e hana i na hana maikai he nui iloko o keia hanauna.

9. Mai hai i kekahi mea, koe wale no o ka mihi, i keia hanauna. E malama i Kaʻu mau kauoha, a e kokua e hoopuka mai i Kaʻu hana, e like me Kaʻu mau kauoha, a e hoopomaikai ia oe.

10. Aia hoi, he haawina kau, a i ole, e loaa ana ia oe kekahi haawina ke makemake oe mai Oʻu aku me ka manaoio, me ka naau hoopono, e manaoio ana iloko o ka mana o Iesu Kristo, a i ole ia, iloko o Koʻu mana ka mea e olelo aku nei ia oe;

11. No ka mea, aia hoi, Owau no ka Mea e olelo nei; aia hoi, Owau no ka malamalama e olino nei iloko o ka pouli, a ma o Koʻu mana la ke haawi aku nei Au i keia mau olelo ia oe.

12. A ano, he oiaio, he oiaio, ke olelo aku nei Au ia oe, e paulele oe maluna o kela Uhane e alakai ana e hana i ka pono: he oiaio, e hana me ka pololei, e hele me ka haahaa, e kaupaona me ka hoopono, a o keia iho la Koʻu Uhane.

13. He oiaio, he oiaio, ke olelo aku nei Au ia oe, e haawi aku no Au ia oe i Koʻu Uhane; a nana no e hoomalamalama i kou naau, a hoopiha i kou uhane me ka olioli.

14. A alaila e ike auanei oe, a i ole ia, ma keia ano e maopopo oe i na mea a pau au i makemake ai ma Oʻu nei, na mea e pili ana i na mea o ka pono, iloko o ka manaoio e paulele ana iloko Oʻu e loaa ana ia ia oe.

15. Aia hoi, ke kauoha aku nei Au ia oe, aole he pono ia oe e manao ua kahea ia oe e haiolelo a kahea ia oe;

16. E kali iki aku, a loaa ia oe Kaʻu olelo, Kuu pohaku, Kuu Ekalesia, a me Kuu Euanelio, i ike io ai oe i Kaʻu ao ana;

17. Alaila hoi, e like me kou mau makemake, he oiaio, e like hoi me kou manaoio, pela no e hana ia aku ai nou.

18. E malama i Kaʻu mau kauoha, e noho hamau, a e nonoi aku i Kuu Uhane;

19. Ae, e pili mai Iaʻu me kou naau a pau, i hiki ai ia oe ke kokua ma ka hoopuka ana i ka malamalama, i kela mau mea i olelo ia ai—he oiaio, ka unuhi ana i Kaʻu hana; e hoomanawanui a hiki i ka pau pono ana o ia mau mea ia oe.

20. Aia hoi, o keia no kau hana, e malama i Kaʻu mau kauoha, he oiaio, me kou mana, kou naau, a me kou ikaika a pau;

21. Mai imi oe e hai aku i Kaʻu olelo, aka, e imi mua e loaa Kaʻu olelo, alaila, e wehe ia kou elelo; alaila, ina e makemake oe, e loaa no Kuu Uhane a me Kaʻu olelo ia oe, he oiaio, ka mana o ke Akua i ka hoohuli ana i kanaka;

22. Aka, ano e hamau oe, e imi i Kaʻu olelo, ka mea i laha aku mawaena o na keiki a kanaka, a e imi pu no hoi i Kaʻu olelo e puka mai ana auanei mawaena o na keiki a kanaka, a i ole, ka mea e unuhi ia nei i keia wa, he oiaio, a hiki hoi i ka loaa ana ia oe na mea a pau Aʻu e haawi aku ai i na keiki a kanaka iloko o keia hanauna, alaila e hui pu ia aku na mea a pau me ia mau mea.

23. Aia hoi, o oe no o Hailama, Kaʻu keiki, e imi i ke aupuni o ke Akua, a e haawi ia aku na mea a pau, e like la me ka mea i ku i ka pono.

24. E kukulu maluna o Kuu pohaku, oia Kuu Euanelio;

25. Mai hoole i ka Uhane o ka hoikeana, aole hoi i ka Uhane o ka wanana, no ka mea, auwe ka mea e hoole ana i keia mau mea;

26. Nolaila, e hoahu oe iloko o kou naau a hiki i ka wa, iloko o Koʻu naauao, nou e hele aku ai.

27. Aia hoi, ke olelo aku nei Au i na poe a pau i loaa na makemake maikai a i hookomo aku i ka lakou pahi-kakiwi e ohi.

28. Aia hoi, Owau no o Iesu Kristo, ke Keiki a ke Akua. Owau no ke ola a me ka malamalama o ke ao nei.

29. Owau no ia mea hookahi i hiki aku i Koʻu poe iho, aole nae Koʻu poe iho i hookipa mai Iaʻu;

30. Aka, he oiaio, he oiaio Kaʻu e olelo nei ia oe, e like me ka nui o ka poe e hookipa mai ana Iaʻu, ia lakou Au e haawi aku ai i ka mana e lilo ai i poe keiki na ke Akua, he oiaio, i ka poe i manaoio maluna o Kuu inoa. Amene.