1. E hoolohe mai e na lani, a e haliu mai e ka honua, a e hauoli oukou e na kanaka olaila, no ka mea, o ka Haku ke Akua, a mawaho ae Ona aohe he Hoola:

2. He nui Kona naauao, a he kupaianaha Kona mau aoao, a o ke akea o Kana mau hana aohe mea hiki ke imi a hoomaopopo;

3. O Kona mau manaopaa aole e haule wale, aole no hoi he mea e hiki ke kaohi i Kona lima;

4. Mai ka wa mau loa a i ka wa mau loa he oia mau no Oia, a o Kona mau makahiki aole loa e pau.

5. No ka mea, penei wahi a ka Haku, he aloha a he lokomaikai Au, ka Haku, i ka poe i makau mai Iaʻu, a e hauoli ana hoi i ka hoomaikai aku i ka poe e hookauwa mai ana Naʻu me ka pono a me ka oiaio a hiki i ka hopena;

6. He nui auanei ko lakou uku a e mau loa ko lakou nani;

7. A ia lakou Au e hoike aku ai i na mea pohihihi a pau, he oiaio, na mea pohihihi a pau i huna ia o Kuu aupuni mai na la kahiko mai, a no na wa e hiki mai ana e hoike aku no Au ia lakou i ka manao maikai o Kuu makemake no na mea a pau e pili ana i Kuu aupuni;

8. Ae, he oiaio, e ike no lakou i na mea kamahao o ka wa mau loa, a e hoike aku no Au ia lakou i na mea e hiki mai ana, oia hoi, i na mea o na hanauna he nui;

9. A e nui aku ana ko lakou naauao, a o ko lakou hoomaopopo ana e hiki aku ana no ia i ka lani; a imua o lakou e haulehia no ka naauao o ka poe naauao, a e lilo ka hoomaopopo ana o ka poe noeau i mea ole;

10. No ka mea, ma Koʻu Uhane Au e hoomalamalama aku ai ia lakou, a ma o Koʻu mana la Au e hoike aku ai ia lakou i na mea huna o Kuu makemake, he oiaio, i kela mau mea a ka maka i ike ole ai, aole hoi i lohe ka pepeiao, aole hoi i komo iloko o ka naau o kanaka.

11. Ia maua, Iosepa Kamika, opio, a me Sidane Rigedona, ma ka Uhane i ka la umikumamaono o Feberuari, iloko o ka makahiki o ko kakou Haku hookahi tausani ewalu haneri a me kanakolu-kumamalua.

12. Ua wehe ia ae la ko maua mau maka ma ka mana o ka Uhane, a ua hoomalamalama ia ko maua mau hoomaopopo ana, i hiki ai ke ike a hoomaopopo i na mea o ke Akua—

13. He oiaio, i kela mau mea mai kinohi loa mai mamua aku o ka hookumu ia ana o ke ao nei, na mea hoi i hooholo ia e ka Makua, ma o Kana Keiki Hanaukahi la, ka Mea iloko o ka poli o ka Makua, he oiaio, mai kinohi mai,

14. A Nona maua e hoike nei, a o ka hoike a maua e hoike nei oia ka piha o ka Euanelio o Iesu Kristo, Oia ke Keiki, ka Mea a maua i ike ai a me Ia maua i kamailio pu ai iloko o ka hihio lani;

15. No ka mea, ia maua e lawelawe ana i ka hana o ka unuhi ana, ka mea hoi a ka Haku i koho ai na maua, hiki aku la maua i ka pauku iwakalua-kumamaiwa o ka mokuna elima o Ioane, ka mea hoi i haawi ia mai ia maua, penei:

16. E kamailio ana no ke ala hou ana o ka poe make, e pili ana hoi i ka poe e lohe ana i ka leo o ke Keiki a ke Kanaka,

17. A e puka mai auanei; O ka poe i hana i ka pono i ke ala hou ana o ka poe pono, a o ka poe i hana hewa i ke ala hou ana o ka poe hewa.

18. Ano, ua lilo keia i mea no maua e haohao ai, no ka mea, ua haawi ia mai ia ia maua e ka Uhane;

19. A ia maua e noonoo ana maluna o keia mau mea, hoopa mai la ka Haku i na maka o ko maua mau hoomaopopo ana a ua hookaakaa ia ae la lakou, a alohi mai la ka nani o ka Haku a puni;

20. A ike aku la maua i ka nani o ke Keiki, ma ka lima akau o ka Makua, a loaa mai la mai Kona piha mai;

21. A ike aku la i na anela hemolele a me ka poe i hoomaemae ia imua o Kona noho alii, e hoomana ana i ke Akua a me ke Keikihipa, ka poe e hoomana ana ia Ia, no ka wa mau loa a mau loa aku.

22. A, ano, mahope o na hoike he nui i haawi ia mai Nona, o keia ka hoike hope o na hoike a pau, a maua e haawi ae nei Nona, oia hoi, ke ola nei Oia.

23. No ka mea, ike aku la maua ia Ia, he oiaio, ma ka lima akau o ke Akua, a lohe ae la maua i ka leo e hoike ana, Oia ka Hanaukahi a ka Makua;

24. A Nana, a ma Ona la, a Nona mai hoi na ao e ku nei a i hana ia ai, a o na kanaka olaila ua hoohanau ia mai he mau keikikane a he mau kaikamahine na ke Akua.

25. A o keia no hoi kekahi a maua i ike ai, a e hoike aku nei, oia hoi, he anela o ke Akua, he mea mana imua o ke alo o ke Akua, i kipi i ke Keiki Hanaukahi, ka Mea hoi a ka Makua i aloha ai, o ka Mea hoi iloko o ka poli o ka Makua—ua hahao ia oia ilalo mai ke alo mai o ke Akua a me ke Keiki,

26. A ua kapa ia o ka Make, no ka mea, uwe iho la na lani nona—oia o Lucipela, he keiki o ke kakahiaka.

27. A ike aku la maua, a aia hoi, ua haule oia! Ua haule! Oia hoi, he keiki o ke kakahiaka.

28. A oiai no maua ma ka Uhane, kauoha mai la ka Haku ia maua e kakau i ka hihio, no ka mea, ike aku la maua ia Satana, kela moo kahiko—oia hoi, ke diabolo—ka mea i kipi i ke Akua a i imi hoi e kaili i ke aupuni o ko kakou Akua a me Kona Kristo,

29. No ia mea, ke kaua nei oia me ka Poe Hoano o ke Akua, a ke hoopuni nei ia lakou a puni.

30. A ike aku la maua i kekahi hihio o na ehaeha o ka poe ana i kaua aku ai a lanakila, no ka mea, pela i pae mai ai ka leo o ka Haku ia maua.

31. Penei wahi a ka Haku, e pili ana i ka poe a pau i ike i Koʻu mana, a i hoolilo ia i mau mea kaana pu ia mea, a ae aku la ia lakou iho, ma o ka mana la o ke diabolo, e hoopio ia mai, a e hoole i ka oiaio a aa i Koʻu mana—

32. O lakou no na keiki o ka Make, ka poe hoi Aʻu e olelo nei e aho no lakou ina aole lakou i hanau ia mai,

33. No ka mea, he mau ipu lakou o ka inaina, i hoopaa ia e ehaeha i ka inaina o ke Akua me ke diabolo a me kona poe anela no ka wa mau loa;

34. E pili ana no ia poe Aʻu i olelo ai, aohe kala ia ana ma keia ao, aole no hoi i ke ao e hiki mai ana,

35. Mamuli o ka hoole ana i ka Uhane Hemolele mahope o ka loaa ana ia ia lakou, a hoole no hoi i ke Keiki Hanaukahi a ka Makua—a kaulia ia Ia no lakou iho, a kau aku ia Ia i ka hoohilahila ia ma ke akea.

36. O keia ka poe e hele aku ana iloko o ka loko ahi a me ke kukae pele, me ke diabolo a me kona poe anela,

37. A maluna o lakou wale no, e loaa ai auanei i ka make elua kekahi mana;

38. Ae, he oiaio, ka poe wale no e hoolapanai ole ia ana iloko o ka manawa kupono o ka Haku, mahope o na ehaeha ana i Kona inaina;

39. No ka mea, e hoala ia mai ana ke koena iho a pau ma ke ala hou ana o ka poe make, ma o ka lanakila ana la a me ka nani o ke Keikihipa, ka Mea i pepehi ia, ka Mea hoi ma ka poli o ka Makua mamua o ka hana ia ana o na ao.

40. A o keia ka Euanelio, ka nuhou hauoli a ka leo mailoko mai o na lani i hoike mai ai ia maua,

41. Hiki mai la Oia i ke ao nei, oia hoi, o Iesu, e kaulia ia no ko ke ao nei, a e auamo i na hewa o ko ke ao nei, a e huikala i ko ke ao nei a e hoomaemae ia mea mai na mea pono ole mai a pau;

42. A ma Ona la e hoola ia ai na mea a pau, ka poe a ka Makua i waiho ai iloko o Kona mana a i hana ia ai e Ia,

43. Ka Mea e hoonani ana i ka Makua, a e hoopakele ana i na hana a pau a Kona mau lima, koe wale no kela poe keiki o ka Make, ka poe i hoole i ke Keiki mahope o ko ka Makua hoike ana mai ia Ia;

44. No ia mea, e hoola ana Oia i na mea a pau a koe lakou; e hele ana lakou iloko o ka hoopai mau loa, oia hoi, ka hoopai hopena ole, oia ka hoopai pau ole, e nohoalii pu me ke diabolo a me kona poe anela no ka wa mau loa, kahi e make ole ana ko lakou ilo, a e pio ole ana ke ahi, a oia ko lakou ehaeha;

45. A o ka hopena o ia mea, a me kahi o ia mea, a i ole, o ko lakou ehaeha, aole kekahi kanaka i ike,

46. Aole no hoi i hoike ia mai, aole i hoike ia i keia wa, aole no hoi e hoike ia ana i ke kanaka, koe wale no ia lakou ka poe e hoolilo ia ana i mau mea loaa o ia mea:

47. Eia no nae, hoike aku la Au, ka Haku, ia mea ma ka hihio i na poe he nui, aka, pani koke hou ae la Au ia mea;

48. No ia mea, o ka hopena, ka laula, ke kiekie, ka hohonu, a me ka ehaeha o ia mea, aole o lakou hoomaopopo, aole no hoi kekahi kanaka, koe wale no o lakou ka poe i hoolilo ia no keia hoopai ana.

49. A lohe aku la maua i ka leo e olelo ana, E kakau i ka hihio, no ka mea, aia hoi! O keia ka hopena o ka hihio o na ehaeha o ka poe aia!

50. A eia hou, ke hoike aku nei maua, no ka mea, ike a lohe aku la maua, a o keia ka hoike a ka Euanelio o Kristo, e pili ana ia lakou ka poe e puka mai ana ma ke alahouana o ka poe pono;

51. O lakou ka poe i loaa ka hoike a Iesu, a manaoio i Kona inoa a bapetizo ia mamuli o ke ano o Kona kanu ia ana, ma ke kanu ia ana iloko o ka wai ma Kona inoa, a o keia mamuli no ia o ke kauoha Ana i haawi mai ai,

52. A ma ka malama ana i na kauoha, e holoi ia ai a e hoomaemae ia ai lakou mai ko lakou mau hewa a pau, a loaa ka Uhane Hemolele ma ke kau ana o na lima o ka mea i hoolilo ia a sila ia no keia mana,

53. Ka poe i lanakila ma o ka manaoio la, a i sila ia ma ka Uhane Hemolele o ka olelo hoopomaikai, a ka Makua i pahola mai ai maluna o ka poe a pau i pono a pololei.

54. O lakou ka poe o ka Ekalesia o ka Hanaumua.

55. O lakou ka poe a ka Makua i haawi aku ai i na mea a pau iloko o ko lakou mau lima—

56. O lakou ka poe he mau Kahuna a he mau Alii, ka poe i loaa kekahi o Kona piha a me kekahi o Kona nani,

57. A he mau Kahuna no ka Mea Kiekie Loa, mamuli o ke ano o ko Melekisedeka, ka mea hoi mamuli o ke ano o ko Enoka, ka mea hoi mamuli o ke ano o ko ke Keiki Hanaukahi;

58. No ia mea, e like me ka mea i palapala ia, he poe Akua lakou, he oiaio, he mau keiki na ke Akua—

59. No ia mea, no lakou na mea a pau, ina o ke ola, a i ole o ka make, a i ole o na mea o keia wa, a i ole o na mea e hiki mai ana, no lakou ia mau mea a pau, a no Kristo lakou, a no ke Akua hoi o Kristo;

60. A e lanakila no lakou maluna o na mea a pau;

61. No ia mea, mai kaena kekahi kanaka iloko o ke kanaka, aka, e aho no oia e kaena iloko o ke Akua, ka Mea e hoopio ana i na enemi a pau malalo iho o Kona mau wawae—

62. E noho keia poe ma ke alo o ke Akua a me Kona Kristo no ka wa mau loa a mau loa.

63. O keia ka poe Ana e lawe pu mai ai me Ia, i Kona wa e hiki mai ai iloko o na ao o ka lani, e nohoalii ma ka honua maluna o Kona poe kanaka.

64. O keia ka poe e loaa ana ke ala mua ana.

65. O keia ka poe e puka mai ana i ke alahouana o ka poe pono.

66. O keia ka poe i hiki aku i ka Mauna Ziona, a i ke kulanakauhale o ke Akua ola, kahi lani, ka wahi hemolele loa o na wahi a pau.

67. O keia ka poe i lilo i puali anela pau ole i ka helu ia, a i hiki i ke anaina nui a me ka Ekalesia o Enoka, a me ko ka Hanaumua.

68. O keia ka poe no lakou na inoa i kakau ia iloko o ka lani, kahi o ke Akua a me Kristo ka lunakanawai o na mea a pau.

69. O keia ka poe kanaka pono i hoohemolele ia ma o Iesu la ka Uwao o ka berita hou, ka Mea i hana i keia kalahala hemolele ma o ka hookahe ia ana la o Kona koko ponoi.

70. O keia ka poe no lakou na kino celesetiela, no lakou ka nani i like me ko ka la, oia hoi, ka nani o ke Akua, ke kiekie loa o na mea a pau, Nona ka nani i palapala ia ai he ano like me ka la o ke aouli.

71. A eia hou, ike aku la maua i ke ao teresetiela, a aia hoi, aia la, o keia ka poe o ka teresetiela, nona ka nani i okoa ae mai ko kela o ka Ekalesia o ka Hanaumua, ka poe i loaa ka piha o ko ka Makua, oia hoi, e like me ka okoa ae o ka mahina mai ko ka la iloko o ke aouli.

72. Aia hoi, o keia ka poe i make me ke kanawai ole,

73. A pela no hoi lakou ka poe uhane o na kanaka i paa iloko o ka halepaahao, ka poe a ke Keiki i hele ai e ike, a hai aku i ka Euanelio ia lakou, i hookolokolo ia ai lakou e like me ko na kanaka ma ka io,

74. Ka poe hoi i hookipa ole i ka hoike a Iesu ma ka io, aka, ua hookipa nae ia mea mahope mai.

75. O keia ka poe he mau kanaka hanohano o ka honua nei, i hoomakapo ia ma ka maalea o kanaka.

76. O keia ka poe i loaa o Kona nani, aka, aole o Kona piha.

77. O keia ka poe e loaa ana ka nohona ma ke alo o ke Keiki, aka, aole nae o ka piha o ko ka Makua;

78. No ia mea, he mau kino teresetiela lakou, a aole he mau kino celesetiela, a ua like ole ma ka nani, e like me ka like ole o ka mahina mai ka la mai.

79. O keia ka poe i koa ole ma ka hoike a Iesu; no ia mea, aole i loaa ia lakou ka leialii maluna o ke aupuni o ko kakou Akua.

80. A ano, o keia ka hopena o ka hihio o ka teresetiela a maua i ike ai, a ka Haku i kauoha mai ai ia maua e kakau, oiai maua ma ka Uhane.

81. A eia hou, ike aku la maua i ka nani o ke tilesetiela, ka nani haahaa iho, oia hoi, e like me ka like ole o ka nani o na hoku mai ka nani o ka mahina iloko o ke aouli.

82. O keia ka poe i hookipa ole i ka Euanelio o Kristo, aole hoi i ka hoike a Iesu.

83. O keia ka poe i hoole ole i ka Uhane Hemolele.

84. O keia ka poe i hahao ia i lalo i gehena.

85. O keia ka poe e hoopakele ole ia mai ana mai ke diabolo mai, a hiki i ke ala hope ana, a hiki i ka hoopau pono ana o ka Haku, oia hoi o Kristo, ke Keikihipa, i Kana hana.

86. O keia ka poe e loaa ole o Kona piha iloko o ke ao mau loa, aka, o ka Uhane Hemolele ma o ka lawelawe ana la o ka teresetiela;

87. A o ka teresetiela ma o ka lawelawe ana la o ka celesetiela;

88. A pela no hoi e loaa ana ia i ka tilesetiela ma o ka lawelawe ana la o na anela i koho ia e lawelawe no lakou, a i ole, i koho ia i mau uhane lawelawe no lakou, no ka mea, e lilo auanei lakou i poe hooilina i ke ola mau loa.

89. A pela maua i ike ai ma ka hihio lani, i ka nani o ka tilesetiela, ka mea i oi aku mamua o ka hoomaopopo ana a pau,

90. A aole he kanaka i ike ia mea, koe wale no ka mea a ke Akua i hoike mai ai ia.

91. A pela maua i ike ai i ka nani o ka teresetiela ka mea i oi pakela aku mamua o na mea a pau o ka nani o ka tilesetiela, he oiaio, ma ka nani, a ma ka mana, a ma ka ikaika, a ma ka mana hoomalu.

92. A pela maua i ike ai i ka nani o ka celesetiela, ka mea i oi pakela aku mamua o na mea a pau—kahi a ke Akua, oia hoi, ka Makua, e nohoalii ana maluna o Kona nohoalii ia ao aku ia ao aku;

93. A imua hoi o Kona nohoalii e kulou haahaa ana na mea a pau a haawi aku ia Ia i ka nani no ka wa mau loa a mau loa.

94. O ka poe e noho ana ma Kona alo, oia ka Ekalesia o ka Hanaumua, a e ike lakou e like me lakou i ike ia mai ai, a e hoomaopopo e like me lakou i hoomaopopo ia mai ai, mamuli o ka loaa ana o Kona piha a me Kona lokomaikai;

95. A ke hoolilo nei Oia ia lakou e likealike ma ka mana, a ma ka ikaika, a ma ka mana hoomalu.

96. A o ka nani o ka celesetiela he hookahi ia, he oiaio, e like me ka nani o ka la he hookahi ia.

97. A o ka nani o ka teresetiela he hookahi ia, he oiaio, e like me ka nani o ka mahina he hookahi ia.

98. A o ka nani o ka tilesetiela he hookahi ia, he oiaio, e like me ka nani o na hoku he hookahi ia, no ka mea, e like me ka okoa o kahi hoku i kekahi hoku ma ka nani, pela no ka okoa o kekahi mai kekahi mai ma ka nani iloko o ke ao tilesetiela;

99. No ka mea, o keia ka poe no Paulo, a no Apolo, a no Kepa.

100. O keia ka poe e olelo ana no ia nei lakou, a o kekahi no ia la—kekahi no Kristo a o kekahi no Ioane, a o kekahi no Mose, a o kekahi no Elia, a o kekahi no Esaia[sa], a o kekahi no Isaia, a o kekahi no Enoka;

101. Aka, aole nae i hookipa i ka Euanelio, aole hoi i ka hoike a Iesu, aole hoi i ka na Kaula, aole hoi i ka berita mau loa.

102. O ka hope loa, o lakou a pau ka poe e houluulu pu ole ia ana me ka Poe Hoano, e kaili pu ia aku iluna i ka Ekalesia o ka Hanaumua, a hookipa ia iloko o ke ao.

103. O keia ka poe wahahee, ka poe anaana, ka poe moekolohe, ka poe hookamakama, a me ka poe i aloha a hana aku hoi i ka wahahee.

104. O keia ka poe i ehaeha i ka inaina o ke Akua maluna o ka honua.

105. O keia ka poe i ehaeha i ka hoopai o ke ahi mau loa.

106. O keia ka poe i hahao ia i lalo i gehena a ehaeha i ka inaina o ke Akua Mana Loa, a hiki i ka piha pono ana o na manawa, ka wa a Kristo e hoopio ai i na enemi a pau malalo o Kona mau wawae, a pau pono Kana hana me ka maikai,

107. Ka wa Ana e haawi aku ai i ke aupuni, a haawi aku ia i ka Makua me ke kina ole, i ka i ana, Ua lanakila Au, a ua hehi hookahi i ka mea kaomi-waina, he oiaio, i ka mea kaomi-waina o ka ikaika o ka inaina o ke Akua Mana Loa.

108. Alaila e hoolei ia Oia me ka leialii o Kona nani, e noho maluna o ka nohoalii o Kona mana e nohoalii mau ai a mau loa.

109. Aka, aia hoi, aia la, ike aku la maua i ka nani a me na kanaka o ke ao tilesetiela, a ua lehulehu lakou e like me na hoku iloko o ke aouli o ka lani, a i ole, e like me ke one o kahakai,

110. A lohe i ka leo o ka Haku e i ana—E pelu auanei keia poe a pau i ke kuli, a e hoike na alelo a pau ia Ia, ka Mea e noho ana maluna o ka nohoalii no ka wa mau loa a mau loa.

111. No ka mea, e hookolokolo ia ana lakou e like me ka lakou mau hana, a e loaa ana i kela a me keia kanaka e like me kana mau hana ponoi, kona mana hoomalu iho, ma na hale i hoomakaukau ia.

112. A e lilo auanei lakou i poe kauwa na ka Mea Kiekie Loa, aka, ma kahi a ke Akua a me Kristo e noho ai aole e hiki ia lakou ke hiki aku, no na ao pau ole.

113. O keia ka pau ana o ka hihio a maua i ike ai, a maua hoi i kauoha ia mai ai e kakau, oiai maua ma ka Uhane.

114. Aka, he manomano a he kupaianaha na hana a ka Haku, a o na mea pohihihi o Kona aupuni Ana i hoike mai ai ia maua, ka mea i oi pakela loa aku mamua o ka hoomaopopo ana a pau ma ka nani, a ma ka mana, a ma ka mana hoomalu,

115. Na mea Ana i kauoha mai ai ia maua aole e kakau, oiai maua ma ka Uhane, a aole hoi ku i ke kanawai no ke kanaka e hai aku;

116. Aole no i hiki i ke kanaka ke hoike aku ia mau mea, no ka mea, he mau mea wale no ia e ike ia a hoomaopopo ia ma ka mana o ka Uhane Hemolele, ka mea a ke Akua e kau ana maluna o ka poe e aloha ana ia Ia, a hoomaemae ia lakou iho imua Ona;

117. A ia lakou Ia e haawi aku ai i ke kuleana o ka ike ana a me ka hoomaopopo ana no lakou iho;

118. A ma o ka mana a me ka hoike ana la o ka Uhane, oiai ma ka io, e hiki ai ia lakou ke ku imua o Kona alo iloko o ke ao o ka nani,

119. A i ke Akua a me ke Keikihipa ka hoonani ia a me ka hanohano, a me ka mana hoomalu ia ao aku ia ao aku. Amene.