1. “No ka mea, ua huikala ia ke kane hoomaloka e ka wahine, a me ka wahine hoomaloka ua huikala ia oia e ke kane, ina aole pela ina ua haumia na keiki a oukou; aka, ano la, ua huikala ia lakou.”

2. Ano, i na la o na Aposetolo, ua malama ia ke kanawai o ke okipoepoe ana mawaena o na Iudaio a pau i manaoio ole i ka Euanelio o Iesu Kristo.

3. A eia kekahi, ala ae la kekahi hoopaapaa nui mawaena o na kanaka e pili ana i ke kanawai o ke okipoepoe, no ka mea, ua makemake ke kane manaoio ole e okipoepoe ia kana poe keiki a e noho malalo o ke kanawai o Mose, he kanawai hoi i hooko ia.

4. A eia kekahi, mamuli o ka ulu ana ae o na keiki me ka noho ana malalo o ke kanawai o Mose, hoolohe aku la i na mooolelo kahiko o ko lakou mau kupuna a manaoio ole i ka Euanelio o Kristo, a ma ia mea lakou i lilo ai i poe hemolele ole;

5. No ia mea, no keia kumu i palapala aku ai ka Aposetolo i ka Ekalesia, e haawi aku ana ia lakou i kekahi kauoha, aole na ka Haku mai, aka, nana iho no, aole he pono e hoohui ia aku ka mea manaoio me ka mea manaoio ole, ke ole e hoopau ia ke kanawai o Mose maiwaena aku o lakou,

6. I noho ai ka lakou poe keiki me ke okipoepoe ole ia; a i hoopau ia ai ka malama ana i ka mooolelo kahiko, ka mea e olelo ana ua hemolele ole na keiki liilii; no ka mea, ua paa ia mea mawaena o ka poe Iudaio,

7. Aka, he hemolele na keiki liilii, mamuli o ka huikala ia ana ma o ke kalahala ana la o Iesu Kristo; a o keia ka manao o na Palapala Hemolele.