1. Hoakoakoa mai la i keia la he ahakuka pili laula o iwakalua-kumamaha mau Kahuna Kiekie ma ka hale o Iosepa Kamika, opio, mamuli o kekahi hoikeana, a hoomaka iho la e kukulu i ka Ahakuka Kiekie o ka Ekalesia o Kristo, a iloko ona he umikumamalua Kahuna Kiekie, a me hookahi, a i ole, ekolu mau Peresidena, e like me ka pono no ka hana.

2. Ua koho ia ka Ahakuka Kiekie ma kekahi hoikeana no ka hooponopono ana i na hihia koikoi e ulu ae ana iloko o ka Ekalesia, i hiki ole ke hooponopono ia e ka apana o ka Ekalesia, a i ole, ka ahakuka o ka Bihopa me ke apono ana o na aoao like ole.

3. O Iosepa Kamika, opio, Sidane Rigedona, a me Federika G. Wiliama, ka i apono ia i mau Peresidena ma o ka leo la o ka Ahakuka; a o Iosepa Kamika, makua, Ioane Kamika, Iosepa Koe, Ioane Ioanekona, Makini Hailaki, Ioane S. Kata, Iareda Kata, Oliva Kaudare, Samuela H. Kamika, Oresona Haida, Kiliveta Kamika, a me Luka Ioanekona, he mau Kahuna Kiekie ka i koho ia i Ahakuka kumau no ka Ekalesia, ma o ka leo lokahi la o ka Ahakuka.

4. Alaila ua ninau ia na Hoakuka i hai ia maluna, ina ua ae aku lakou i ko lakou koho ia ana, a, ina paha e lawelawe lakou iloko o ia oihana i ku i ke kanawai o ka lani: pane ae la lakou a pau i ua ninau la ua ae lakou i ko lakou koho ia ana, a e hooko ana i ka lakou mau oihana e like me ka lokomaikai o ke Akua i kau ia mai maluna o lakou.

5. He kanaha-kumamakolu ka heluna ma ia Ahakuka, ka poe i koho aku ma ka inoa a no ka Ekalesia, ma ke koho ana i na Hoakuka i hai ia maluna penei:—He eiwa Kahuna Kiekie, he umikumamahiku Lunakahiko, eha Kahuna, a he umikumamakolu lala.

6. Hooholo ia: Aole loaa ka mana i ka Ahakuka Kiekie e lawelawe ke ole i hiki mai ehiku o na Hoakuka i hai ia maluna, a i ole, ko lakou mau panihakahaka i koho pono ia.

7. He mana ko keia poe ehiku e koho aku i mau Kahuna Kiekie e ae, a lakou i manao ai i kupono a makaukau e lawelawe ma kahi o na Hoakuka i hiki ole mai.

8. Hooholo ia: I ka wa e hakahaka ai kekahi noho ma ka make ana o kekahi o na Hoakuka i hai ia maluna, a hoopau ia ana paha mai ka oihana ae no kekahi hana hewa, a hele paha mai na palena aku o ka hoomalu ana o keia Ekalesia, e hoopiha ia ia ma ka waiho-inoa ana a ka Peresidena a mau Peresidena paha, a apono ia ma o ka leo la o kekahi aha pili laula o na Kahuna Kiekie, i hoakoakoa ia no ia mea, e lawelawe ma ka inoa o ka Ekalesia.

9. O ka Peresidena o ka Ekalesia, a oia no hoi ka Peresidena o ka Ahakuka, ua koho ia ma ka hoikeana, a apono ia iloko o kana lawelawe ana ma o ka leo la o ka Ekalesia.

10. A mamuli o ke kulana kiekie o kana oihana e hoomalu ai oia i ka Ahakuka o ka Ekalesia; a o kona kuleana ia e kokua ia e elua Peresidena e ae, i koho ia ma ia ano hookahi no ona i koho ia ai;

11. A ina e hiki ole mai hookahi, a i ole, laua a elua, na mea i koho ia e kokua ia ia, he mana kona e hoomalu i ka Ahakuka me ka hoakuka ole: a ina oia e kaawale aku, he mana ko ia mau Peresidena e ae e hoomalu ma kona wahi, laua a elua, a i ole, kekahi o laua.

12. I ka wa e kukulu pololei ia ai kekahi Ahakuka Kiekie o ka Ekalesia o Kriso, e like me ke ano i hai ia mamua ae, o ka hana ia na na Hoakuka he umikumamalua e hailona ma na huahelu, a ma ia mea e hoomaopopo ai i ka mea mawaena o ka umikumamalua e olelo mua, e hoomaka ana ma ka helu ekahi, a pela pakahi aku a hiki i ka helu umikumamalua.

13. I ka wa e halawai ai keia Ahakuka e hooponopono i kekahi hihia, e noonoo mua na Hoakuka umikumamalua ina he paakiki ia, a aole paha; ina aole, elua wale no o na Hoakuka e olelo aku maluna o ia mea, e like me ke ano i palapala ia maluna ae.

14. Aka, ina ua manao ia he paakiki, e koho ia i eha; a ina oi aku ka paakiki, i eono; aka, aole he wa i oi aku mamua o eono e koho ia e olelo aku.

15. He kuleana ko ka mea i hoopii ia i ka akahi hapalua o ka Ahakuka i na wa a pau, i mea e hoopau ai i ka olelo ino, a hana paewaewa paha;

16. A na na Hoakuka i koho ia e olelo aku imua o ka Ahakuka, e waiho mai i ka hihia mahope o ka nana pono ana i na olelo-ike, ma kona ano oiaio, imua o ka Ahakuka, a e olelo aku kela a me keia kanaka ma ke ano i ku i ke kaulike a me ka pono.

17. O na Hoakuka e huki ana i na helu-kaulike, oia hoi, 2, 4, 6, 8, 10, 12, o lakou ke ku no ka pono o ka mea i hoopii ia, a e pale aku i ka olelo ino a hana paewaewa paha.

18. I na wa a pau e loaa i ka mea hoopii a me ka mea i hoopii ia ke kuleana o ka olelo ana no laua iho imua o ka Ahakuka, mahope o ka hoolohe ia ana o na olelo-ike, a me ka pau ana o ka olelo ana a na Hoakuka i koho ia e olelo aku maluna o ka hihia.

19. Mahope iho o ka hoolohe ia ana o na olelo-ike, a me ka olelo ana a na Hoakuka, ka mea hoopii, a me ka mea i hoopii ia, e haawi ka Peresidena i ka olelo-hooholo e like me kona hoomaopopo ana i ka hihia, a e hea aku i na Hoakuka umikumamalua e apono ia mea ma ko lakou koho ana.

20. Aka, ina e ike na Hoakuka i koe iho, ka poe i olelo ole aku, a i ole, kekahi paha o lakou, mahope o ka lohe ana i na olelo-ike a me na paleoleo ana, me ka hoopilimeaai ole, i kekahi hewa ma ka olelo-hooholo a ka Peresidena, e hoike aku lakou ia mea, a e hoolohe hou ia ka hihia;

21. A ina, mahope o ka hoolohe hou ia ana, e hoike ia kekahi oiaio hou maluna o ka hihia, e hoololi ia ka olelo-hooholo e kulike ai me ia.

22. Aka, ina aole i hoike ia kekahi oiaio hou, e ku no ka olelo-hooholo mua, ua loaa i ka hapanui o ka Ahakuka ka mana e hooholo ia mea.

23. Ma na hihia paakiki e pili ana i ka loina a me ke kumupaa, (ina aole lawa pono na mea i palapala ia e akaka ai ka hihia i ka noonoo o ka Ahakuka,) ua hiki no i ka Peresidena ke noi aku a loaa mai ka manao o ka Haku ma ka hoikeana.

24. Ua loaa na Kahuna Kiekie, i ka wa ma kahi mamao, ka mana e kahea a kukulu i Ahakuka e like me ke ano i hai ia mamua ae, e hooponopono i na pilikia i ka wa o na aoao, a i ole, kekahi paha o laua e noi mai ai;

25. A ua loaa ka mana i ua Ahakuka la o na Kahuna Kiekie e koho i hookahi o ko lakou heluna iho, e hoomalu ia Ahakuka no ia manawa no.

26. E lilo ia i hana na ia Ahakuka, i olelo ia, e hoouna koke aku i kope o ka mooolelo o ka lakou mau mea i hana ai, me ka hoike piha ana i ka olelo-ike a me ka lakou olelo-hooholo, i ka Ahakuka Kiekie o ke keena o ka Papa Peresidena o ka Ekalesia.

27. Ina aole ku ka olelo-hooholo o ia Ahakuka i ka makemake o na aoao, a i ole, kekahi o laua ua hiki ia laua ke hoohalahala imua o ka Ahakuka Kiekie o ke keena o ka Papa Peresidena o ka Ekalesia, a e hoolohe hou ia, a e hookolokolo ia ia hihia malaila e like me ke ano i palapala mua ia, me he mea la aohe he olelo-hooholo i haawi ia.

28. O ka Ahakuka o na Kahuna Kiekie ma kahi mamao, e kahea wale ia no ia no na hihia koikoi loa e pili ana i na hana Ekalesia; a aole kekahi hihia maa mau a koikoi ole paha, i lawa e kahea ia ia Ahakuka.

29. He mana ko na Kahuna Kiekie kaahele, a i ole, noho paa paha ma kahi mamao, e hooholo he pono a pono ole paha ke kahea ia ia Ahakuka.

30. Aia he ano okoa mawaena o ka Ahakuka Kiekie o na Kahuna Kiekie kaahele ma kahi mamao, me ka Ahakuka Kiekie kaahele o na Aposetolo he umikumamalua, ma ka lakou mau olelo-hooholo.

31. Mai ka olelo-hooholo a ia Ahakuka mua ua hiki no ke hoohalahala aku, aka, mai ka olelo-hooholo a ia Ahakuka hope aole hiki.

32. Ua hiki ia Ahakuka hope ke hoohalahala ia e na luna nui wale no o ka Ekalesia, ina he hana hewa ka hihia.

33. Hooholo ia, he mana ko ka Peresidena, a i ole, na Peresidena o ke keena o ka Papa Peresidena o ka Ekalesia, e hooholo ina he kupono e hoolohe hou ia kekahi o ia ano hihia e hoohalahala ia mai ana, mahope o ka nana pono ana i ka hoohalahala a me na olelo-ike a me na hoakaka i hoouna pu ia mai.

34. Alaila hoomaka iho la na Hoakuka he umikumamalua e hailona, a i ole, e koho balota, i maopopo ai ka mea e olelo mua aku, a o keia iho la ka hopena i loaa, penei:—1. Oliva Kaudare, 2. Iosepa Koe, 3. Samuela H. Kamika, 4. Luka Ioanekona, 5. Ioane S. Kata, 6. Kiliveka Kamika, 7. Ioane Ioanekona, 8. Oresona Haida, 9. Iareda Kata, 10. Iosepa Kamika, makua, 11. Ioane Kamika, 12. Makini Hailaki.Mahope o ka pule ana ua hoopanee ia ka huikuka.