1. E hoolohe mai oukou, e na kanaka o Kuu Ekalesia, no ka mea, he oiaio, ke olelo aku nei Au ia oukou, ua olelo ia aku keia mau mea ia oukou no ko oukou pomaikai a me ka hoonaauao ia ana;

2. Aka, me ka nana ole i kela mau mea i palapala ia, ua haawi mau ia i na Lunakahiko o Kuu Ekalesia mai kinohi mai, a pela mau aku ana no ia, oia hoi, e malama i na halawai a pau e like me lakou e kuhikuhi ia ai a e alakai ia ai e ka Uhane Hemolele;

3. Eia nae, ua kauoha ia oukou aole e kipaku i kekahi mea mai ko oukou mau halawai akea aku e malama ia ana imua o ko ke ao nei;

4. Ua kauoha ia no hoi oukou aole e kipaku i kekahi lala o ka Ekalesia mai ko oukou mau halawai ahaaina a ka Haku aku; aka nae, ina ua hana hewa kekahi, mai ae aku ia ia e ai i ka ahaaina a ka Haku, a hiki i kona hoolaulea ana.

5. A eia hou, ke olelo aku nei Au ia oukou, mai kipaku oukou i kekahi mea mai ko oukou mau halawai ahaaina a ka Haku aku, ka poe hoi e imi ikaika ana i ke aupuni: Ke olelo aku nei Au i keia e pili ana i ka poe aole no ka Ekalesia.

6. A eia hou, ke olelo aku nei Au ia oukou e pili ana i ko oukou mau halawai hoopaa lala ana, ina malaila kekahi aole no ka Ekalesia e imi ikaika ana nae i ke aupuni, mai kipaku oukou ia lakou;

7. Aka, ua kauoha ia oukou ma na mea a pau e noi i ke Akua, ka Mea e haawi lokomaikai mai ana; a o ka mea a ka Uhane e hooiaio mai ai ia oukou, pela no Au e makemake nei ia oukou e hana me ka naau i piha i ka hemolele, e hele ana me ka pono imua Oʻu, e noonoo ana i ka hopena o ko oukou hoola ia ana, e hana ana i na mea a pau me ka pule a me ka mahalo ana, i hoohihia ole ia ai e na uhane ino, a i ole, na ao ana a na diabolo, a i ole, na kauoha a kanaka, no ka mea, na na kanaka mai kekahi, a na na diabolo mai kekahi.

8. No ia mea, e malama o hoopunipuni ia oukou; a i hoopunipuni ole ia ai oukou e imi ikaika oukou i na haawina maikai loa, e hoomanao mau ana i ke kumu o ko lakou haawi ia ana mai;

9. No ka mea, he oiaio, ke olelo aku nei Au ia oukou, ua haawi ia mai ia mau mea no ka pono o ka poe e aloha mai ana Iaʻu a malama i Kaʻu mau kauoha a pau, a me ka mea e imi ana e hana pela, i pomaikai ai na mea a pau e imi ana, a i ole, e noi ana Iaʻu, ka poe e noi ana, aole nae no kekahi hoailona i hiki ai ia lakou ke hoomaunauna iho ia mea maluna o ko lakou mau kuko.

10. A eia hou, he oiaio, ke olelo aku nei Au ia oukou, ke makemake nei Au ia oukou e hoomanao mau, a e hoopaa mau iloko o ko oukou mau naau i ke ano o ua mau haawina la i haawi ia aku ai i ka Ekalesia,

11. No ka mea, aole i haawi ia aku kela a me keia haawina i ka poe a pau; no ka mea, he nui wale na haawina, a ua haawi ia i kela a me keia kanaka kekahi haawina e ka Uhane o ke Akua:

12. I kekahi poe, ua haawi ia aku kekahi, a i kekahi poe, ua haawi ia kekahi mea okoa ae, i pomaikai ai ka poe a pau ma o ia mea la;

13. I kekahi poe, ua haawi ia aku e ka Uhane Hemolele e hoomaopopo o Iesu Kristo ke Keiki a ke Akua, a ua kaulia ia Oia no na hewa o ko ke ao nei;

14. I kekahi poe e ae, ua haawi ia e manaoio i ka lakou mau olelo, i loaa ai no hoi ia lakou ke ola mau loa, ke kupaa lakou.

15. A eia hou, i kekahi poe, ua haawi ia e ka Uhane Hemolele e hoomaopopo i na ano like ole o ka lawelawe ana, e like me ka oluolu o ia mea imua o ia Haku hookahi, i ku i ka makemake o ka Haku, e haawi kupono ana i Kona mau lokomaikai mamuli o ke ano o ka noho ana o na keiki a kanaka.

16. A eia hou, ua haawi ia i kekahi e ka Uhane Hemolele e hoomaopopo i na ano like ole o na hana ana, ina paha na ke Akua ia mau mea, i haawi ia ai na hoike ana o ka Uhane i kela a me keia kanaka i pomaikai ai na mea a pau.

17. A eia hou, he oiaio, ke olelo aku nei Au ia oukou, ua haawi ia i kekahi e ka Uhane o ke Akua, ka olelo o ka naauao,

18. I kekahi e ae, ua haawi ia ka olelo o ka ike, i ao ia ai na mea a pau e naauao a e loaa ka ike.

19. A eia hou, ua haawi ia i kekahi e loaa ka manaoio e hoola ia mai,

20. A i kekahi ua haawi ia e loaa ka manaoio e hoola aku.

21. A eia hou, ua haawi ia i kekahi ka hana ana i na hana mana,

22. A i kekahi poe e ae, ua haawi ia e wanana,

23. A i kekahi e ae, ka hoomaopopo ana i na uhane.

24. A eia hou, ua haawi ia i kekahi e olelo ma na olelo e,

25. A i kekahi e ae, ua haawi ia ka hoomaopopo ana i na olelo e:

26. A mai ke Akua mai keia mau haawina a pau no ka pomaikai o na keiki a ke Akua.

27. A i ka Bihopa o ka Ekalesia, a i na mea a ke Akua e koho ai a hoolilo ai e kiai maluna o ka Ekalesia, a e lilo i mau Lunakahiko no ka Ekalesia, ia lakou e haawi ia ai ka hoomaopopo ana i ua mau haawina la a pau, o loaa kekahi mawaena o oukou e hookohukohu ana, eia nae, aole no ke Akua.

28. A e hiki mai keia o ka mea e noi ana ma ka Uhane e loaa no ma ka Uhane;

29. I haawi ia ai i kekahi e loaa ua mau haawina la a pau, i loaa ai he poo, i pomaikai hoi kela a me keia lala ma o ia mea la:

30. O ka mea e noi ana ma ka Uhane, e noi ana ia i ku i ka makemake o ke Akua, no ia mea, e hana ia e like me kana i noi ai.

31. A eia hou, ke olelo aku nei Au ia oukou, e hana ia na mea a pau ma ka inoa o Kristo e pono ai, o kela a me keia a oukou e hana ai ma ka Uhane;

32. A e haawi aku oukou i ka mahalo i ke Akua ma ka Uhane e pono ai, no kela a me keia pomaikai a oukou i hoopomaikai ia ai;

33. A e hana mau oukou i ka hana maemae a me ka hana hemolele imua Oʻu e pono ai. Pela io no. Amene.