1. E ui aku auanei na welelau o ka honua no kou inoa, a e hoohenehene ka poe hupo ia oe, a e huhu kue mai ka luaahi ia oe,

2. Oiai e imi mau ana ka poe maemae ma ka naau, a me ka poe naauao, a me ka poe noonoo akea, a me ka poe maemae, i ke ao ana, a me ka mana a me na hoopomaikai ana malalo o kou mau lima,

3. A aole e hoohuli ia kou poe kanaka e kue ia oe mamuli o na olelo a ka poe kumakaia;

4. A oiai, e hoolei aku ana ko lakou mana ia oe iloko o ka pilikia, a iloko o na halepaahao, e hoomanao ia auanei oe iloko o ka hanohano, aka, aia a hala kekahi wa pokole a e oi aku auanei ka weliweli o kou leo iwaena o kou poe enemi mamua o ko ka liona huhu, mamuli o kou pono; a e kakoo aku kou Akua ia oe no ka wa mau loa a mau loa.

5. Ina e kahea ia ana oe e komo aku iloko o na popilikia; ina iloko oe o ka pilikia mawaena o na hoahanau apakee; ina iloko oe o ka pilikia mawaena o na powa; ina iloko oe o ka pilikia ma ka aina, a i ole ma ke kai;

6. Ina e hoahewa ia oe me na hoahewa hoopunipuni o kela a me keia ano; ina e lele mai kou mau enemi maluna ou; ina e kaili aku lakou ia oe mai ka launa pu ana mai o kou makuakane a me kou makuahine a me na hoahanau a me na kaikuahine; a ina me ka pahikaua i unuhi ia, e kaili aku kou poe enemi ia oe mai ka poli aku o kau wahine, a o kau mau keiki, a e puili aku kau keikikane hiapo, oiai he eono wale no makahiki, i kou mau aahu, a e olelo aku, E kuu makuakane, no keaha la e hiki ole ai ia oe ke noho mai me makou? Auwe, e kuu makuakane, heaha ka na kanaka e hana aku ana ia oe? A alaila, ina e hoolei ia aku oia mai ia oe aku me ka pahikaua, a e alako ia aku oe i ka halepaahao, a e kokolo hele ae kou poe enemi apuni oe me he poe iliohae la no ke koko o ke keiki hipa;

7. A ina e hahao ia oe iloko o ka lua, a i ole iloko o na lima o ka poe pepehikanaka, a kau ia mai ka hoopai o ka make maluna ou; ina e kiloi ia oe iloko o ka hohonu o ke kai; ina e kipi mai na ale ahiu o ka moana ia oe; ina e lilo na makani weliweli i enemi nou; ina e hakumakuma mai na lani, a e hoohui ae na mea kumupaa a pau e akeakea i ke ala; a maluna ae o na mea a pau, ina e hoohamama mai na iwi-a o gehena i ka waha akea ia oe; e ike oe, e Kuu keiki, e haawi mai ana keia mau mea a pau i ke ao ana ia oe, a e lilo auanei no kou pono.

8. Ua iho ke Keiki a ke Kanaka malalo iho o lakou a pau; ua oi aku anei oe mamua Ona?

9. Nolaila, e hoomau ma kou alahele, a e mau no ka Oihanakahuna me oe, no ka mea, ua paa ko lakou mau palena, aole e hiki ia lakou ke aʻe ae. Ua ike ia kou mau la, a aole e emi iho ka heluna o kou mau makahiki; nolaila, mai makau i ka mea e hiki i ke kanaka ke hana, no ka mea, o ke Akua pu me oe no ka wa mau loa a mau loa.