Na Berita A Me Na Kauoha

1. E hoolohe oukou, e na kanaka o Kuu Ekalesia, wahi a ka leo o ka Mea e noho ana ma kahi kiekie, a Nona hoi na maka maluna o na kanaka a pau; he oiaio, ke olelo aku nei Au, e hoolohe mai oukou e na kanaka ma kahi mamao; a me oukou e ka poe maluna o na mokupuni o ke kai, e hoolohe pu mai.

2. No ka mea, he oiaio, aia ka leo o ka Haku i na kanaka a pau, a, aole he mea hookahi e pakele, a, aole he maka e ike ole ana, aole hoi he pepeiao e lohe ole ana, aole hoi he naau e hoowalania ole ia.

3. A o ka poe kipikipi, e hou ia auanei lakou me ka ehaeha nui, no ka mea, o ko lakou mau hewa e hai ia ana ia maluna o na kaupoku hale, a o ka lakou mau hana malu e hoike ia auanei.

4. A o ka leo ao i na kanaka a pau no ia, ma o na waha la o Kaʻu mau haumana, ka poe Aʻu i wae ai i keia mau la hope nei.

5. A e hele aku no lakou, a aole mea nana e kaohi ia lakou, no ka mea, Naʻu, na ka Haku, i kauoha ia lakou.

6. Aia hoi, o keia Koʻu mana, a me ka mana o Kaʻu mau kauwa, a me Kaʻu mau olelo hoakaka mua no ka buke o Kaʻu mau kauoha, ka mea Aʻu i haawi ai ia lakou e hoolaha aku ia oukou, e na kanaka o ka honua.

7. No ia mea, e makau a e haalulu oukou, e na kanaka, no ka mea, o ka mea Aʻu, a ka Haku, i hooholo ai iloko o lakou, e hooko ia no.

8. A he oiaio, ke olelo aku nei Au ia oukou, o lakou, o ka poe e hele aku ana e lawe ana i keia mau olelo i na kanaka o ka honua, ia lakou ka mana i haawi ia e sila ai maluna o ka honua a iloko o ka lani pu, i ka poe manaoio ole a me ka poe kipikipi;

9. Ae, he oiaio, e sila ia lakou no ka la o ka inaina o ke Akua e ninini ia mai ai maluna o ka poe hewa me ke ana ole;

10. No ka la o ka Haku e hele mai ai e uku i kela a me keia kanaka e like me kana hana ana, a e ana aku no kela a me keia kanaka e like me ke ana ana i ana aku ai i kona hoa-kanaka.

11. No ia mea, o ka leo o ka Haku aia no ia i na welelau o ka honua, i lohe ai ka poe a pau i makemake e lohe:

12. E hoomakaukau oukou, e hoomakaukau oukou no ka mea e hiki mai ana, no ka mea, ua kokoke mai ka Haku;

13. A o ka inaina o ka Haku, ua hoaa ia, a o Kana pahikaua ua hooluu ia iloko o ka lani, a e haule auanei ia maluna o na kanaka o ka honua;

14. A e hoike ia auanei ka lima o ka Haku; a e hiki mai ka la, o ka poe e hoolohe ole i ka leo o ka Haku, aole hoi i ka leo o Kana mau kauwa, aole hoi e maliu mai i na olelo a na Kaula a me na Aposetolo, e oki ia auanei lakou mai waena aku o na kanaka;

15. No ka mea, ua hele hewa aku lakou mai Kaʻu mau hana lawelawe-paa aku, a ua uhaki i Kaʻu berita mau loa;

16. Aole lakou i imi i ka Haku e kukulu i Kona pono, aka, hele no kela a me keia kanaka ma kona aoao iho, a mamuli o ke ano o kona akua iho, nona hoi ke ano i like me ke ano o ko ke ao nei, a o kona kino he akua kii no ia, e lualua a e lilo ana auanei i mea ole iloko o Babulona, oia hoi o Babulona ka nui, ka mea e haule ana.

17. No ia mea, Naʻu, na ka Haku, no ka ike ana i ka popilikia e hiki mai ana maluna o na kanaka o ka honua, i kahea aku i Kaʻu kauwa, ia Iosepa Kamika, opio, a olelo aku la ia ia mai ka lani mai, a haawi aku la ia ia i mau kauoha;

18. A haawi aku la no hoi i mau kauoha i kekahi poe e ae, i hai aku ai lakou i keia mau mea i ko ke ao nei; a o keia mau mea a pau i hooko ia ai na mea i palapala ia ai e na Kaula;

19. E puka mai no na mea nawaliwali o ko ke ao nei a e hoohiolo i na mea mana a ikaika, i ole ai ke kanaka e launa kuka me kona hoa-kanaka, aole hoi e hilinai iloko o ka lima o ka io,

20. Aka, i olelo ai kela a me keia kanaka iloko o ka inoa o ke Akua ka Haku, oia hoi ka Hoola o ke ao nei;

21. I mahuahua ai no hoi ka manaoio ma ka honua;

22. I kukulu ia ai Kuu berita mau loa;

23. I hai ia ai ka piha o Kuu Euanelio e ka mea nawaliwali a haahaa, a hiki aku i na palena o ke ao nei, a imua o na alii a me na luna.

24. Aia hoi, Owau ke Akua a ua olelo ia mea; o keia mau kauoha mai Oʻu aku nei no ia, a ua haawi ia i Kaʻu mau kauwa iloko o ko lakou nawaliwali, mamuli o ke ano o ka lakou olelo, i hiki ai ia lakou ke hoomaopopo;

25. A ina lakou i kuhihewa he hiki ke hoike ia:

26. A ina e imi lakou i ka naauao he hiki ke ao ia lakou:

27. A ina lakou e hana hewa he hiki lakou ke hoopai ia, i mihi ai lakou:

28. A ina ua haahaa lakou he hiki ke hooikaika ia lakou, a e hoopomaikai ia mailuna mai, a e loaa ka ike ia manawa aku ia manawa aku:

29. A ma hope iho o ka loaa ana o ka mooolelo o ko Nepai poe, ae, he oiaio, e loaa ai i Kaʻu kauwa, ia Iosepa Kamika, opio, ka mana e unuhi i ka Buke a Moramona ma o ka lokomaikai la o ke Akua, ma o ka mana la o ke Akua.

30. A i loaa ai i ka poe no hoi i haawi ia aku ai keia mau kauoha, ka mana e hookumu i ke kahua o keia Ekalesia, a e hoopuka mai ia mea mailoko mai o kahi nalo powehiwehi a mailoko mai o ka pouli, oia wale no ka Ekalesia ola a oiaio maluna o ka ili o ka honua holookoa, ka mea Aʻu, a ka Haku, i hauoli loa ai, oia hoi, e kamailio ana i ka Ekalesia ma ke ano pili laula a aole hoi ma ke ano pili kahi.

31. No ka mea, aole hiki Iaʻu, ka Haku, ke nana aku maluna o ka hewa me ka lihi iki o ka ae ana aku ia mea;

32. Aka nae, o ka mea i mihi a hooko aku i na kauoha a ka Haku e kala ia no;

33. A o ka mea mihi ole, e lawe ia mai ia ia mai ka malamalama ana i loaa ai, no ka mea, aole e hooikaika mau Koʻu Uhane me kanaka, wahi a ka Haku o na Lehulehu.

34. A eia hou, he oiaio, ke olelo aku nei Au ia oukou, e na kanaka o ka honua, ke makemake nei Au, ka Haku, e hoike aku i keia mau mea i na mea io a pau,

35. No ka mea, aole Au he mea manao i ko waho o ke kanaka, a ke makemake nei Au e ike na kanaka a pau e hiki koke mai ana ka la; aole nae i hiki mai ka hora, aka, ua kokoke mai, ka wa e lawe ia aku ai ka maluhia mai ka honua aku, a e loaa i ke diabolo ka mana maluna o kona aupuni iho;

36. A e loaa no hoi i ka Haku ka mana maluna o Kona Poe Hoano, a e nohoalii mawaena o lakou, a e iho mai me ka hookolokolo ana maluna o Idumea, a i ole o ke ao nei.

37. E huli i keia mau kauoha, no ka mea, he oiaio a he pololei lakou, a o na wanana a me na olelo hoopomaikai iloko o lakou e hooko ia ana no a pau.

38. O ka mea Aʻu, a ka Haku, i olelo ai, Naʻu no ia i olelo aku, a aole Au e imi i kumu Noʻu e alo ae ai: a oiai nae e lilo na lani a me ka honua, o Kaʻu olelo aole loa ia e lilo aku, aka, e hooko ia lakou a pau, ina paha ma o Koʻu leo ponoi, a i ole ma o ka leo la o Kaʻu mau kauwa, ua like no ia;

39. No ka mea, aia hoi, e hoomaopopo, o ka Haku ke Akua, a ke hoike nei ka Uhane, a o ka hoike he oiaio, a o ka oiaio e ku aku ana ia no ka wa mau loa a mau loa aku. Amene.