1. Aia hoi, penei wahi a ka Haku i na Lunakahiko o Kona Ekalesia, ka poe e hoi koke aku ana i ka aina o lakou i hele mai ai. Aia hoi, he mea oluolu Iaʻu, i ko oukou hele ana mai ia neinei;

2. Aka, me kekahi aole Au i oluolu loa, no ka mea, aole lakou i wehe i ko lakou mau waha, aka, huna lakou i ke talena Aʻu i haawi aku ai ia lakou, mamuli o ka makau i ke kanaka. Auwe ka poe o ia ano, no ka mea, ua hoaa ia Koʻu inaina ia lakou.

3. A e hiki mai auanei keia, ina aole e oi aku ana ko lakou hooikaika imua Oʻu, e lawe ia aku ana ia, oia hoi, na mea i loaa ia lakou;

4. No ka mea, ke hoomalu nei Au, ka Haku, ma na lani maluna, a mawaena o na puali kaua o ka honua; a i ka la Aʻu e hoonohonoho iho ai i Koʻu mau momi, e ike na kanaka a pau i ka mea e hoike ana i ka mana o ke Akua.

5. Aka, he oiaio, e olelo aku ana Au ia oukou e pili ana i ko oukou huakai hele i ka aina a oukou i hele mai ai. E hana ia, a i ole, e kuai ia kekahi moku, e like me ka oukou i manao ai he pono, he mea ole ia Iaʻu, a e hele koke ma ko oukou huakai hele no kahi i kapa ia o Sana Lui.

6. A mai ia wahi aku e hele Kuu mau kauwa o Sidane Rigedona, a me Iosepa Kamika, opio, a me Oliva Kaudare, ma ko lakou huakai hele no Kinikinaki.

7. A ma keia wahi e hapai lakou i ko lakou leo a hai i Kaʻu olelo me na leo nui, me ka inaina ole a me ke kanalua ole, me ka hapai ana i na lima hemolele maluna o lakou. No ka mea, ua hiki Iaʻu ke hoolilo aku ia oukou i hemolele, a o ko oukou mau hewa ua kala ia no oukou.

8. A o ke koena iho, e hele papalua lakou ma ko lakou huakai hele mai Sana Lui aku, a e hai i ka olelo, aole me ka awiwi, mawaena o na anaina o ka poe hewa, a hiki i ko lakou hoi hou ana i na apana o ka Ekalesia a lakou i hele mai ai.

9. A o keia mau mea a pau no ka pomaikai ia o na apana o ka Ekalesia; no keia manao Au i hoouna ai ia lakou.

10. A e haawi aku Kaʻu kauwa, o Eluene Paterige noloko mai o ke dala Aʻu i haawi aku ai ia ia, i kekahi hapa i Kuu mau Lunakahiko, ka poe i kauoha ia e hoi aku;

11. A o ka mea e hiki ana, e hoihoi hou mai oia ia mea ma o ka agena la, a o ka mea hiki ole, aole no e koi ia aku ia mai ia ia mai.

12. A ano, ke olelo nei Au no ke koena o ka poe e hele mai ana i keia aina.

13. Aia hoi, ua hoouna ia lakou e hai i Kuu Euanelio mawaena o na anaina o ka poe hewa; no ia mea, ke haawi aku nei Au ia lakou i kekahi kauoha penei: Mai hoohala wale oukou i ko oukou manawa, aole hoi oukou e huna wale i ka oukou talena i ike ole ia ai ia.

14. A mahope o ko oukou hiki ana aku i ka aina o Ziona, a hai hoi i Kuu olelo, e huli hoi koke oukou, e hai ana i Kaʻu olelo mawaena o na anaina o ka poe hewa, aole me ka awiwi, aole hoi me ka inaina, aole hoi me ka paio ana;

15. A e lulu aku i ka lepo o ko oukou mau wawae i ka poe e hookipa ole mai ana ia oukou; aole imua o ko lakou alo, o hoonaukiuki oukou ia lakou; aka, ma kahi malu, a e holoi i ko oukou mau wawae, i hoike kue ia lakou ma ka la hookolokolo.

16. Aia hoi, ua lawa keia no oukou, a o ka makemake hoi o ka Mea Nana i hoouna aku ia oukou.

17. A ma o ka waha la o Kaʻu kauwa o Iosepa Kamika, opio, e hoike ia aku auanei ka mea e pili ana no Sidane Rigedona a me Oliva Kaudare. O ke koena iho ma keia hope aku. Pela io no. Amene.