1. E hoolohe i ka leo o Iesu Kristo, ko oukou Hoolapanai, ka Mea Nui a Mana Loa, Nona ka lima o ke aloha, ka mea i panai no ko oukou mau hewa;

2. Ka Mea e houluulu mai ana i Kona poe kanaka e like me ke kinana moa e houluulu ai i kana ohana keiki malalo o kona mau eheu, oia hoi, ka poe a pau e hoolohe mai ana i Kuu leo a hoohaahaa ia lakou iho imua Oʻu, a kahea mai Iaʻu me ka pule ikaika.

3. Aia hoi, he oiaio, he oiaio, ke olelo aku nei Au ia oukou, i keia manawa ua kala ia ko oukou mau hewa, nolaila, i loaa ai ia oukou keia mau mea; aka, e hoomanao mai hana hewa hou aku, o kau mai na poino maluna o oukou.

4. He oiaio, ke olelo aku nei Au ia oukou, ua wae ia oukou mailoko mai o ko ke ao nei e hai aku i Kuu Euanelio me ka leo o ka hauoli, e like me ka leo o ka pu;

5. E hapai ae i ko oukou mau naau a e olioli, no ka mea, aia Au mawaena o oukou, a Owau ko oukou uwao me ka Makua; a o Kona makemake maikai ia e haawi mai i ke aupuni ia oukou;

6. A e like me ka mea i palapala ia, O kela a me keia mea a oukou e noi mai ai me ka manaoio, me ke kuikahi ma ka pule e like me Kaʻu kauoha, e loaa no ia ia oukou;

7. A ua kahea ia oukou e hooko i ka houluulu ana o Kuu poe i wae ia; no ka mea, ke hoolohe nei Koʻu poe i wae ia i Koʻu leo a ke hoopaakiki ole nei i ko lakou mau naau;

8. No ia mea, ua puka aku ke kauoha mai ka Makua aku, e houluulu ia mai lakou ma kahi hookahi maluna o ka ili o keia aina, e hoomakaukau i ko lakou mau naau, a e noho makaukau ma na mea a pau no ka la o ka popilikia a me ka hooneoneo ana e hoouna ia ai maluna o ka poe hewa;

9. No ka mea, ua kokoke mai ka hora, a ua aneane mai ka la e oo ai ka honua: a o ka poe haaheo a pau, a me ka poe e hana hewa ana, e like auanei lakou me na okumukumu mauu, a e puhi aku no Au ia lakou me ke ahi, wahi a ka Haku o na Lehulehu, i mau ole ai ka hewa maluna o ka honua;

10. No ka mea, ua kokoke mai ka hora, a o na mea i olelo ia e Kaʻu mau Aposetolo e hooko ia e pono ai; no ka mea, e like me ka lakou i olelo ai pela no auanei e hooko ia ai;

11. No ka mea, e hoike aku no Au Iaʻu iho mai ka lani mai me ka mana a me ka nani nui, me na lehulehu a pau olaila, a e noho iloko o ka pono me na kanaka maluna o ka honua no na makahiki he tausani, a e hiki ole i ka poe hewa ke ku.

12. A eia hou, he oiaio, he oiaio, ke olelo aku nei Au ia oukou, a ua puka aku ia ma ke kauoha paa, ma o ka makemake la o ka Makua, o Kuu mau Aposetolo, ka Umikumamalua me Aʻu ma Kuu lawelawe ana ma ka Oihanakahuna ma Ierusalema, e ku lakou ma Koʻu lima akau ma ka la o Koʻu hiki ana mai iloko o ke kia ahi, i hoaahu ia me na aahu o ka pono, me na lei maluna o ko lakou mau poo, iloko o ka nani e like me Aʻu, e hookolokolo i ko ka hale holookoa o ka Iseraela, e like me ka nui i aloha mai Iaʻu a i malama i Kaʻu mau kauoha, a aole hoi i kekahi mea e ae;

13. No ka mea, e kani loihi kekahi pu me ka leo nui, e like la me ia maluna o Mauna Sinai, a e haalulu no ka honua a pau, a e ala mai lakou—he oiaio, ka poe make i make hoi iloko Oʻu, i loaa ai ka lei o ka pono, a e hoaahu ia aku e like me Aʻu nei, a e noho pu me Aʻu, i hookahi ai makou.

14. Aka, aia hoi, ke olelo aku nei Au ia oukou, mamua o ka hiki ana mai o keia la nui, e pouli ana ka la a e hoololi ia ana ka mahina i koko, a e helelei ana na hoku mai ka lani mai, a e ikea ia auanei he mau hoailona pakela loa ae ma ka lani i luna, a ma ka honua ilalo;

15. A aia auanei ka uwe ana a me ke kumakena ana mawaena o na lehulehu o na kanaka;

16. A e hoouna ia aku auanei he kuaua huahekili nui e luku i ko na mahinaai o ka honua;

17. A eia kekahi, no ka hewa o ko ke ao nei, e kau no Au i ka hoopai o ka inaina maluna o ka poe hewa, no ka mea, aole lakou e mihi ana; no ka mea, ua piha ke kiaha o Koʻu inaina; no ka mea, aia hoi, aole e hoomaemae ana Koʻu koko ia lakou, ina e hoolohe ole mai ana lakou Iaʻu.

18. No ia mea, e hoouna aku no Au, ka Haku ke Akua, i na nalo maluna o ka ili o ka honua, a na lakou e paa i na kanaka olaila, a e ai i ko lakou io, a e lilo i kumu no na ilo e komo iho ai iloko o lakou;

19. A e hoopaa ia ko lakou mau elelo i hiki ole ai ia lakou ke olelo kue mai Iaʻu; a o ko lakou io e helelei no ia mai ko lakou mau iwi aku, a o ko lakou mau onohi maka mai ko lakou mau poopoo mai:

20. A eia kekahi, na na holoholona o ka ululaau a me na manu o ka lewa e ai ia lakou;

21. A o kela ekalesia nui a ino loa, ka wahine hookamakama o ka honua a pau, e hoolei ia no ia ilalo e ka lapalapa o ke ahi e hoopau ana, e like me ia i olelo ia ma ka waha o Ezekiela ke kaula, ka mea i olelo mai no keia mau mea, na mea i hooko ole ia hoi i keia wa, aka, e hooko io ia no e pono ai, me Aʻu e ola nei, no ka mea, aole loa e nohoalii na mea ino a hoopailua.

22. A eia hou, he oiaio, he oiaio, ke olelo aku nei Au ia oukou i ka wa e pau ai ke tausani makahiki, a hoomaka hou na kanaka e hoole i ko lakou Akua, alaila e hoopakele no Au i ka honua no kekahi manawa pokole wale no;

23. A e hiki mai ka hopena, a e hoopau ia ka lani a me ka honua a hala aku, a e hoea mai ana he lani hou a he honua hou,

24. No ka mea, e hala aku na mea kahiko a pau, a e lilo ae na mea a pau i mau mea hou, he oiaio, o ka lani a me ka honua, a me na mea a pau e piha ai, na kanaka a me na holoholona pu, na manu o ka lewa, a me na ia o ke kai;

25. A aole hookahi oho, aole huna, e nalohia, no ka mea, oia ka hana a Koʻu lima.

26. Aka, aia hoi, he oiaio, ke olelo aku nei Au ia oukou, mamua o ka hala ana aku o ka honua, e puhi e mai o Mikaela, Koʻu luna anela, i kana pu, alaila, e ala mai ka poe make a pau, no ka mea, e hoohamama ia ko lakou mau luakupapau, a e puka mai no lakou; he oiaio, o na mea a pau.

27. A e houluulu ia ka poe pono ma Koʻu lima akau i ke ola mau loa; a o ka poe hewa ma Koʻu lima hema, e hilahila ana Au e ae aku imua o ka Makua Noʻu lakou;

28. No ia mea, e olelo aku Au ia lakou—E hele mai Oʻu aku, e ka poe i hoino ia, iloko o ke ahi mau loa i hoomakaukau ia no ke diabolo a me kona mau anela.

29. A ano, aia hoi, ke olelo aku nei Au ia oukou, aole loa ma kekahi wa Aʻu i hai ai mai Koʻu waha ponoi aku e hoi hou mai ana lakou, no ka mea, aole e hiki ia lakou ke hele mai ma kahi Aʻu e noho nei, no ka mea, aole o lakou mana;

30. Aka, e hoomanao aole i haawi ia Kaʻu mau olelo hooholo a pau i kanaka: a oiai ua puka aku na olelo mai Koʻu waha aku, pela no lakou e hooko ia ai, o ka mua e lilo i hope, a o ka hope e lilo i mua ma na mea a pau Aʻu i hana ai ma o ka olelo la o Koʻu mana, oia hoi ka mana o Koʻu Uhane;

31. No ka mea, ma o ka mana la o Kuu Uhane i hana ai Au ia lakou; he oiaio, o na mea a pau pili uhane a me na mea pili kino pu:

32. O ka mua, ma ka uhane—ka lua, ma ke kino, oia no ka hoomaka ana o Kaʻu hana; a eia hou, ka mua, ka mea pili kino—a o ka lua, ka mea pili uhane, oia ka hope loa o Kaʻu hana:

33. E olelo aku ana Au ia oukou i hoomaopopo maoli ai oukou, aka, Iaʻu iho aole hopena o Kaʻu mau hana, aohe no hoi he hoomaka ana; aka, ua haawi ia ia ia oukou i hoomaopopo ai oukou, no ka mea, ua noi mai oukou Iaʻu no ia mea, a ua lokahi hoi.

34. No ia mea, he oiaio, ke olelo aku nei Au ia oukou he mea pili uhane na mea a pau Iaʻu, a aole loa he manawa Aʻu i haawi aku ai ia oukou i kekahi kanawai i pili kino; aole hoi i kekahi kanaka, aole hoi i na keiki a kanaka; aole hoi ia Adamu, ko oukou makua, ka mea Aʻu i hana ai.

35. Aia hoi, ua haawi aku Au ia ia e lilo i agena nona iho; a ua haawi aku Au ia ia he kauoha, aka, aole kekahi kauoha pili kino Aʻu i haawi aku ai ia ia, no ka mea, o Kaʻu mau kauoha he pili uhane; aole lakou he ano maamau, aole hoi he pili kino, aole he ano o ko ka io, aole hoi he kuko ino.

36. A eia kekahi, no ka hoowalewale ia ana o Adamu e ke diabolo (no ka mea, aia hoi, o ke diabolo mamua no ia o Adamu, no ka mea, kipi mai la oia Iaʻu, i ka i ana, E haawi mai iaʻu i Kou nani, oia hoi, Koʻu mana; a hoohuli aku la oia he hapa-kolu no hoi o na lehulehu o ka lani mai Oʻu aku mamuli o ko lakou mana koho;

37. A ua kiola ia lakou ilalo, a pela i lilo ai i diabolo a me kona mau anela.

38. A, aia hoi, aia no he wahi i hoomakaukau ia no lakou mai kinohi mai, o ua wahi nei o gehena ia:

39. A he mea ia e pono ai ke hoowalewale ke diabolo i na keiki a kanaka, a ina aole pela aole lakou e hiki ke lilo i mau agena no lakou iho, no ka mea, ina aole i loaa ia lakou ka awahia, aole hiki ia lakou ke ike i ka momona.)

40. No ia mea, eia kekahi, hoowalewale aku la ke diabolo ia Adamu, a ai iho la ia i ka hua i papa ia a uhai i ke kauoha, a ma ia mea ua kaa oia malalo o ka makemake o ke diabolo, no ka mea, ua ae aku oia i ka hoowalewale ia.

41. No ia mea, kena aku la Au ka Haku ke Akua e kipaku ia oia mai ke Kihapai o Edena aku, mai Koʻu alo aku, mamuli o kana hana hewa ana, a ma o ia mea la i make ai oia ma ko ka uhane, oia hoi, ka make mua, he oiaio, o ia make hookahi no, oia ka make hope, a he make uhane ia, oia hoi, ka mea e puana ia ana maluna o ka poe hewa i Koʻu wa e olelo aku ai—E hele pela, e ka poe i hoino ia.

42. Aka, aia hoi, ke olelo aku nei Au ia oukou, haawi aku la Au ka Haku, ke Akua, ia Adamu a i kana mau hua aole lakou e make me ka make pili kino a hoouna aku Au ka Haku, ke Akua, i na anela e hai aku ia lakou i ka mihi a me ka hoolapanai ana, ma o ka manaoio la maluna o ka inoa o Kaʻu Keiki Hanaukahi.

43. A pela Au ka Haku, ke Akua, i koho ai no ke kanaka i na la o kona ola ana; a ma o kona make maoli ana la e hoala ia oia iloko o ka palaho ole i ke ola mau loa, o ka poe a pau e manaoio mai ana;

44. A o ka poe e manaoio ole ana i ka poino mau loa, no ka mea, aole e hiki ke hoolapanai ia lakou mai ko lakou haule uhane ana, no ka mea, aole o lakou mihi;

45. No ka mea, e aloha ana lakou i ka pouli mamua o ka malamalama, a he ino ka lakou mau hana, a e loaa ia lakou ko lakou mau uku mai ka mea a lakou i haliu ai e hoolohe.

46. Aka, aia hoi, ke olelo aku nei Au ia oukou, ua hoolapanai ia na keiki liilii mai ka hookumu ia ana o ke ao nei ma o Kaʻu Keiki Hanaukahi la:

47. No ia mea, aole e hiki ia lakou ke hana hewa, no ka mea, aole he mana i haawi ia ia Satana e hoowalewale i na keiki liilii, a hiki i ka wa a lakou e hoomaka ai e lilo i mea ku i ka hookolokolo ia imua Oʻu;

48. No ka mea, ua haawi ia ia ia lakou me Aʻu i makemake ai, e like me Koʻu manao iho, i koi ia ai na mea nui ma ka lima o ko lakou mau makua.

49. A eia hou, ke olelo nei Au ia oukou, o ka mea i loaa ka ike, aole anei Au i kauoha aku e mihi?

50. A o ka mea i loaa ole ka hoomaopopo ana, eia no Iaʻu ka hana ana e like me ka mea i palapala ia. A ano, aole Au e hai ana i kekahi mea hou aku ia oukou i keia manawa. Amene.