1. A eia hou, he oiaio, Kaʻu e olelo aku nei ia oukou, e Kuu mau hoaloha, he kauoha Kaʻu e haawi aku nei ia oukou, e hoomaka oukou i ka hana o ka hoolala ana a me ka hoomakaukau ana i ke kahua o ke kulanakauhale o ka Mahele-aina o Ziona, maanei ma ka aina o Ketalana, e hoomaka ana ma Kuu hale;

2. A, aia hoi, e hana ia ia e like me ke ano Aʻu i haawi aku ai ia oukou e pono ai.

3. A o ka apana mua ma ka hema, e hoolaa ia ia Noʻu nei no ke kukulu ana i hale no ka Papa Peresidena, no ka hana a ka Papa Peresidena, ma ka loaa ana o na hoikeana; a no ka hana a ka Papa Peresidena ma ka Oihanakahuna, a ma na mea a pau e pili ana i ka Ekalesia a me ke aupuni.

4. He oiaio, Kaʻu e olelo aku nei ia oukou, e kukulu ia ia i kanalima-kumamalima me kanaono-kumamalima kapuai kona laula a me kona loa, ma ke keena maloko;

5. A he keena kekahi malalo a he keena hoi i kiekie ae, e like me ke ano e haawi ia aku ana ia oukou ma keia hope aku;

6. A e hoolaa ia ia no ka Haku mai kona kahua ae mamuli o ke ano o ka Oihanakahuna, e like hoi me ke ana e haawi ia aku ana ia oukou ma keia hope aku:

7. A e hoolaa holookoa ia aku ia i ka Haku no ka hana a ka Papa Peresidena.

8. A mai ae wale aku oukou i kekahi mea haumia e komo iloko olaila; a malaila auanei Kuu nani, a malaila no auanei Au;

9. Aka, ina e komo kekahi mea haumia iloko olaila, aole e noho Kuu nani malaila; aole no hoi Au e komo aku iloko olaila.

10. A eia hou, he oiaio Kaʻu e olelo aku nei ia oukou, o ka apana elua ma ka hema e hoolaa ia ia Noʻu no ke kukulu ana i hale Noʻu, no ka hana o ka pai ana i na mea i unuhi ia o Kuu mau Palapala Hemolele, a me na mea a pau Aʻu e kauoha aku ai ia oukou;

11. A he kanalima-kumamalima me kanaono-kumalima kapuai kona laula a me kona loa ma ke keena oloko; a he keena kekahi malalo a he keena hoi i kiekie ae:

12. A e hoolaa holookoa ia keia hale i ka Haku mai ke kahua aku, no ka pai palapala ana, ma na mea a pau Aʻu e kauoha aku ai ia oukou, e hemolele hoi, haumia ole, e like me ke kumuhoohalike ma na mea a pau, me ia e haawi ia aku auanei ia oukou.

13. A ma ka apana ekolu e loaa ai i Kuu kauwa ia Hailama Kamika kona hooilina.

14. A ma na apana ekahi me elua ma ka akau, e loaa ai i Kuu mau kauwa ia Renola Kahuna a me Iareda Kata he hooilina,

15. I hana ai laua i ka hana Aʻu i koho aku ai na laua, e lilo i komite no ke kukulu ana i Kuʻu mau hale e like me ke kauoha Aʻu, ka Haku ke Akua, i haawi aku ai ia oukou.

16. Aole e kukulu ia keia mau hale elua a hiki i Kuu haawi ana aku ia oukou he kauoha e pili ana ia mau hale.

17. A ano, aole Au e haawi ana i kekahi mea hou aku ia oukou i keia manawa. Amene.