1. Aia hoi, penei wahi a ka Haku i na Lunakahiko, ka poe Ana i kahea ai a i wae ai i keia mau la hope nei, ma o ka leo la o Kona Uhane,

2. I ka i ana, E hoike aku ana Au, ka Haku, ia oukou i ka mea Aʻu e makemake ai ia oukou e hana mai keia manawa a hiki i keia huikuka ae, e malama ia ana ma Misouri, maluna o ka aina Aʻu e hoolaa aku ai no Koʻu poe kanaka, ke koena o Iakoba, a me lakou ka poe hooilina mamuli o ka berita.

3. No ia mea, he oiaio, ke olelo aku nei Au ia oukou, e hele koke aku Kaʻu mau kauwa o Iosepa Kamika, opio, a me Sidane Rigedona, ma ko laua huakai hele i ka wa e makaukau ai e haalele i ko laua mau home, a e hele aku i ka aina o Misouri.

4. A ina e kupaa laua ma Oʻu nei, e hoike ia aku auanei ia laua i ka laua mea e hana ai;

5. A ina e kupaa laua, e hoike ia aku ana no hoi ia laua ka aina o ko oukou hooilina.

6. A ina aole laua e kupaa, e oki ia aku laua, he oiaio, e like me Koʻu makemake, e like me Kaʻu e manao ai he pono.

7. A eia hou, he oiaio, ke olelo aku nei Au ia oukou, e hele koke aku Kaʻu kauwa o Laimana Waita, a me Kaʻu kauwa o Ioane Korila, ma ko laua huakai hele:

8. A pela no hoi Kuu kauwa o Ioane Mudoka, a me Kuu kauwa o Hailama Kamika, e hele i ko laua huakai hele ia wahi hookahi no ma ke ala o Detoroita.

9. A e hele lakou mai ia wahi aku me ka hai ana i ka olelo ma ke alahele, me ka olelo ole ana i kekahi mau mea okoa mawaho ae o ka na Kaula a me ka na Aposetolo i palapala ai, a me ka mea i ao ia ia lakou e ka Uhane Kokua ma o ka pule la o ka manaoio.

10. E hele papalua lakou, a pela lakou e hai ai ma ke alahele ma kela a me keia anaina, e bapetizo ana me ka wai, a me ke kau ana o na lima ma kae o ka wai;

11. No ka mea, penei wahi a ka Haku, e hoopokole no Au i Kaʻu hana iloko o ka pono, no ka mea, e hiki mai ana na la e hoouna aku ai Au i ka hoopai ana i ka lanakila ana.

12. A e ao Kaʻu kauwa o Laimana Waita, no ka mea, ke makemake nei o Satana e kanana ia ia me he opala la.

13. A aia hoi, o ka mea kupaa e hoonoho ia auanei i mea hoomalu maluna o na mea he nui.

14. A eia hou, e haawi aku no Au ia oukou i kumu-hoohalike ma na mea a pau, i ole ai oukou e hoopunipuni ia, no ka mea, eia o Satana mao a maanei o ka aina, a ke hele nei oia e hoopunipuni ana i na lahuikanaka;

15. No ia mea, o ka mea e pule ana me ka uhane mihi, oia ka mea e apono ia e Aʻu, ina e malama oia i Kaʻu mau lawelawe-paa.

16. O ka mea e olelo ana me ka uhane mihi, nona ka olelo haahaa e hoonaauao aku ana, no ke Akua ia, ina e malama oia i Kaʻu mau lawelawe-paa.

17. A eia hou, o ka mea e haalulu ana malalo o Koʻu mana e hooikaika ia auanei oia, a e hoohua mai i na hua o ka hoomaikai ia a me ka naauao i ku like ai me na hoikeana a me na mea oiaio Aʻu i haawi aku ai ia oukou.

18. A eia hou, o ka mea i hoopio ia a hoohua ole mai i na hua, oia hoi, e like me keia kumuhoohalike, aole ia Noʻu nei;

19. No ia mea, ma o keia kumuhoohalike la e hoomaopopo ai oukou i na uhane ma na ano a pau malalo iho o na lani a pau.

20. A ua hiki mai na la, e like me ka manaoio o na kanaka pela e hana ia aku ai no lakou.

21. Aia hou, ua haawi ia keia kauoha i na Lunakahiko a pau Aʻu i wae ai.

22. A eia hou, he oiaio, ke olelo aku nei Au ia oukou, e hele no hoi Kaʻu kauwa o Toma B. Maka, a me Kaʻu kauwa o Ezera Tea, ma ko laua huakai hele e hai ana i ka olelo ma ke alahele, a hoea aku i ua aina hookahi la.

23. A eia hou, e hele Kaʻu kauwa o Isaaka Mole, a me Kaʻu kauwa o Ezera Buki, ma ko laua huakai hele, e hai ana no hoi i ka olelo ma ke alahele a hoea aku ia aina hookahi no.

24. A eia hou, e hele Kaʻu mau kauwa o Eluene Paterige a me Makini Hailaki, ma ko laua huakai hele me Kaʻu mau kauwa o Sidane Rigedona a me Iosepa Kamika, opio.

25. A e hele no hoi Kaʻu mau kauwa o Davida Witima, a me Hawe Witeloka, ma ko laua huakai hele, a e haiolelo ma ke alahele a hoea i keia aina hookahi.

26. A e hele Kaʻu mau kauwa o Pale P. Parata a me Oresona Parata ma ko laua huakai, a e haiolelo ma ke alahele, a hoea no hoi i keia aina hookahi.

27. A e hele no hoi Kaʻu mau kauwa o Solomona Hanakoki a me Simeona Kata, ma ko laua huakai hele a hoea i keia aina hookahi, a e haiolelo ma ke alahele.

28. A e hele no hoi Kaʻu mau kauwa o Edesona Fula a me Iakoba Sekota ma ko laua huakai hele.

29. A e hele no hoi Kaʻu mau kauwa o Levi Hanakoki a me Zebedaio Koterina ma ko laua huakai hele.

30. A e hele no hoi Kaʻu mau kauwa o Renola Kahuna a me Samuela H. Kamika ma ko laua huakai hele.

31. A e hele no hoi Kaʻu mau kauwa o Wila Baluwina a me Wiliama Kata ma ko laua huakai hele.

32. A e hoolilo pu ia Kaʻu mau kauwa o Nuela Naita a me Sila J. Giripine a e hele ma ko laua huakai hele;

33. Ae, he oiaio, ke olelo nei Au, e hele lakou nei a pau ma ko lakou huakai hele a hiki i kahi hookahi, ma ko lakou mau alahele like ole, a mai kukulu kekahi kanaka maluna o ke kahua o kekahi, aole hoi e kaahele ma ka mooa o kekahi.

34. O ka mea kupaa, oia auanei ke malama ia a hoopomaikai ia me na hua he nui.

35. A eia hou, ke olelo aku nei Au ia oukou, e hele Kaʻu mau kauwa o Iosepa Wekipila a me Solomona Humapela ma ko laua huakai hele ma na aina o ka hikina:

36. E hoohulihuli laua i ko laua mau ohana, aole e hai ana i na mea mawaho ae o ka na Kaula a me ka na Aposetolo, oia hoi, o na mea a laua i ike ai a i lohe ai, a i manaoio maoli ai, i hooko ia ai na wanana.

37. A mamuli o ka hana hewa ana, e lawe ia mai ka mea i hooili ia maluna o Hemana Baseta, mai ia ia mai, a e kau ia maluna o ke poo o Simona Raida.

38. A eia hou, he oiaio, ke olelo aku nei Au ia oukou, e hoolilo ia o Iareda Kata i Kahuna, a e hoolilo ia no hoi o Keoki Iakobo i Kahuna.

39. A e kiai ke koena iho o na Lunakahiko maluna o na apana o ka Ekalesia, a e hai i ka olelo ma na aina e kokoke mai ana ia lakou: a e hana lakou me ko lakou mau lima ponoi, i ole ai e lawelawe ia ka hoomanakii a me ka hana hewa.

40. A e hoomanao ma na mea a pau i ka poe hune a me ka poe nele, ka poe mai a me ka poe pilikia, no ka mea, o ka mea e hana ole ana i keia mau mea, aole oia he haumana Naʻu.

41. A eia hou, e lawe Kaʻu mau kauwa o Iosepa Kamika, opio, a me Sidane Rigedona, a me Eluene Paterige, me lakou he palapala hoomaikai mai ka Ekalesia aku. A e loaa no hoi hookahi no Kuu kauwa no Oliva Kaudare;

42. A pela, e like me Kaʻu i olelo ai, ina e kupaa oukou, e hoakoakoa oukou ia oukou iho e hauoli maluna o ka aina o Misouri, oia hoi, ka aina o ko oukou hooilina, ka aina nae o ko oukou mau enemi i keia wa.

43. Aka, aia hoi, e hoohikiwawe mai ana Au, ka Haku, i ke kulanakauhale iloko o kona manawa, a e hoolei i ka poe kupaa me ka hauoli a me ka olioli ana.

44. Aia hoi, Owau no o Iesu Kristo, ke Keiki a ke Akua, a e hookiekie no Au ia lakou iluna ma ka la hope. Pela io no. Amene.