1. He oiaio, Kaʻu e olelo aku nei ia oukou, e Kuu mau hoaloha, mai hopohopo, e hooluolu ia ko oukou mau naau; he oiaio, e hauoli mau, a e hoomaikai ma na mea a pau,

2. E kakali hoomanawanui ana i ka Haku, no ka mea, ua komo aku ka oukou mau pule iloko o na pepeiao o ka Haku Sabaota, a ua hoopaa ia me keia sila a me keia kauoha; ua hoohiki a kauoha ka Haku e haawi ia mai ia mau mea;

3. Nolaila, ke haawi aku nei Oia i keia olelo-paa ia oukou me kekahi berita loli-ole, i hooko ia ia mau mea, a o na mea a pau o oukou i hoehaeha ia ai, e hana like auanei ia mau mea no ko oukou pono, a no ka nani o Kuu inoa, wahi a ka Haku.

4. A, ano, he oiaio, Kaʻu e olelo aku nei ia oukou e pili ana i na kanawai o ka aina, o Koʻu makemake ia e malama Koʻu poe kanaka i na mea a pau Aʻu e kauoha aku ai ia lakou;

5. A o kela kanawai o ka aina i ku i ke kumukanawai, e kakoo ana i kela kumupaa o ka nohona kuokoa ma ka malama ana i na kuleana a me na pono, no na kanaka a pau ia, a ua apono ia imua Oʻu;

6. Nolaila, ke hoapono nei Au, ka Haku, ia oukou a me ko oukou mau hoahanau o Kuu Ekalesia, ma ke kakoo ana i kela kanawai, oia hoi, ke kumukanawai o ka aina;

7. A no ka mea e pili ana i ke kanawai o kanaka, o ka mea i oi aku a emi mai paha mamua o keia, no ka ino mai ia.

8. Ke hookuokoa nei Au, ka Haku ke Akua, ia oukou, nolaila, ua kuokoa io oukou; a ke hookuokoa nei no hoi ke kanawai ia oukou;

9. Aka nae, i ka wa e noho hoomalu ai ka poe hewa, e kanikau ana na kanaka.

10. No ia mea, e imi ikaika ia na kanaka hoopono, a me na kanaka naauao, a o na kanaka maikai a me na kanaka naauao ka oukou e nana pono ai e kakoo; i ole ia, o ka mea i emi iho malalo o keia no ka ino mai ia.

11. A ke haawi aku nei Au ia oukou he kauoha, e haalele oukou i na mea hewa a pau a e hoopili aku i na mea pono a pau, i ola ai oukou mamuli o kela me keia olelo e puka mai ana mai ka waha mai o ke Akua;

12. No ka mea, e haawi aku ana Oia i ka poe kupaa i lalani maluna o ka lalani, a i loina maluna o ka loina; a e hoao aku no Au ia oukou a e hooiaio ia oukou ma ia mau mea;

13. A o ka mea e waiho iho ana i kona ola no Kaʻu hana, no ka pono hoi o Kuu inoa, e loaa hou no ia ia ia, oia hoi, ke ola mau loa:

14. Nolaila, mai makau i ko oukou mau enemi, no ka mea, ua hooholo Au iloko o Koʻu naau, wahi a ka Haku, e hoao aku no Au ia oukou ma na mea a pau, ina paha oukou e kupaa iloko o Kuu berita, a hiki aku i ka make ana, i ku ai oukou i ke apono ia;

15. No ka mea, ina e kupaa ole oukou iloko o Kuu Berita, aole oukou i kupono Noʻu;

16. Nolaila, e hoole i ke kaua a e kukala i ka maluhia, a e imi ikaika e hoohuli mai i na naau o na keiki i ko lakou mau makua, a o na naau o na makua i na keiki;

17. A eia hou, i na naau o ka poe Iudaio i na kaula, a ko na kaula i na Iudaio, o hiki mai Au a hahau i ka honua holookoa me ka poino, a e hoopau ia na io a pau imua Oʻu.

18. Mai pihoihoi ko oukou mau naau, no ka mea, ma ka hale o Koʻu Makua he nui na keena, a ua hoomakaukau Au i wahi no oukou, a ma kahi o Koʻu Makua a me Aʻu, malaila pu no hoi oukou.

19. Aia hoi, aole Au, ka Haku, i oluolu loa me na poe he nui iloko o ka Ekalesia ma Ketalana,

20. No ka mea, aole lakou i haalele i ka lakou mau hana hewa, a me ko lakou mau aoao hewa, ka haaheo o ko lakou mau naau, a me ko lakou kukohewa, a me ka lakou mau hana hoopailua a pau, a malama hoi i na olelo o ka naauao a me ke ola mau loa Aʻu i haawi aku ai ia lakou.

21. He oiaio, Kaʻu e olelo aku nei ia oukou, e hoopai ana Au, ka Haku, ia lakou, a hana hoi i na mea Aʻu i makemake ai, ke mihi ole a malama ole hoi lakou i na mea a pau Aʻu i olelo aku ai ia lakou.

22. A eia hou, ke olelo aku nei Au ia oukou, ina e malama oukou i na mea Aʻu i kauoha ai ia oukou, e hoohuli ae no Au, ka Haku, i ka inaina a pau a me ka huhu mai o oukou aku, a aole e lanakila mai na ipuka o ka po maluna o oukou.

23. Ano, ke olelo aku nei Au ia oukou e pili ana i ko oukou mau ohana; ina e hahau mai na kanaka ia oukou, a i ole, i ko oukou mau ohana, hookahi manawa, a hoomanawanui oukou ia mea a hoino ole aku ia lakou, aole hoi e imi e panai i ka ino, e uku ia auanei oukou;

24. Aka, ina e hoomanawanui ole oukou ia mea, e helu ia auanei ia ia oukou he ana kupono no oukou.

25. A eia hou, ina e hahau mai ko oukou enemi ia oukou no ka lua o ka manawa, a hana ino ole aku oukou i ko oukou enemi, a hoomanawanui ia mea, e pa-haneri ia auanei ko oukou uku.

26. A eia hou, ina e hahau mau oia ia oukou no ke kolu o ka manawa, a hoomanawanui oukou ia mea, e hoonui ia auanei ka uku no oukou a pa-pa-ha;

27. A e ku keia mau hoike ekolu e kue i ko oukou enemi ke mihi ole oia, a aole e holoi ia.

28. A ano, he oiaio Kaʻu e olelo aku nei ia oukou, ina e pakele kela enemi mai Kaʻu hoopai ana, a lawe ole ia mai oia no ka hookolokolo ia ana imua Oʻu, alaila, e nana oukou e ao aku ia ia ma Kuu inoa, i hele ole mai oia maluna o oukou, aole hoi i ko oukou mau ohana, oia hoi, i na keiki a ka oukou poe keiki, a hiki aku i ke kuakahi a me ke kualua o na hanauna;

29. A alaila, ina e hiki mai oia maluna o oukou, a i ole, i ka oukou poe keiki, a i ole, i na keiki a ka oukou poe keiki a hiki aku i ke kuakahi a me ke kualua o na hanauna, e waiho aku no Au i ko oukou enemi ma ko oukou mau lima.

30. Alaila, ina e hoopakele oukou ia ia, e uku ia oukou no ko oukou pono; a pela me ka oukou poe keiki, a me na keiki a ka oukou poe keiki, a hiki aku i ke kuakahi a me ke kualua o na hanauna;

31. Aka nae, aia ko oukou enemi iloko o ko oukou mau lima, a ina e uku oukou ia ia e like me kana mau hana, e hoapono ia no oukou, ina ua imi oia i ko oukou ola, a ua hoopilikia ia ko oukou ola e ia, aia ko oukou enemi iloko o ko oukou mau lima a ua hoapono ia oukou.

32. Aia hoi, o keia ke kanawai Aʻu i haawi ai i Kaʻu kauwa ia Nepai, a me ko oukou mau kupuna, o Iosepa, a me Iakoba, a me Isaaka, a me Aberahama, a me Kuu mau Kaula a me na Aposetolo a pau o ka wa kahiko.

33. A eia hou, o keia ke kanawai Aʻu i haawi ai i Kaʻu poe o ka wa kahiko, i hele ole ai lakou a kaua me kekahi lahuikanaka, ohana, olelo, a i ole, na kanaka, ke ole Au, ka Haku, i kauoha ia lakou.

34. A ina kekahi lahui, olelo, a i ole poe kanaka, e kukala kaua mai ia lakou, e hapai mua ae lakou he hae o ka maluhia imua o ia poe kanaka, lahui, a olelo paha;

35. A ina e ae ole mai kela poe kanaka i ka haawina o ka maluhia, aole hoi i ka lua, a i ke kolu paha o ka manawa, e lawe mai lakou i keia mau hoike imua o ka Haku;

36. Alaila, e haawi aku Au, ka Haku, ia lakou i kauoha, a hoapono hoi ia lakou no ka hele ana i ke kaua me kela lahui, olelo, a poe kanaka paha,

37. A, e kaua aku Au, ka Haku, i ka lakou mau kaua, a me na kaua a ka lakou poe keiki, a me na keiki a ka lakou poe keiki, a hiki i ko lakou hoopai ana i ko lakou mau enemi a pau, a hiki aku i ke kuakahi a me ke kualua o na hanauna.

38. Aia hoi, he kumuhoohalike keia no na kanaka a pau, wahi a ka Haku, ko oukou Akua, no ka hoapono ia ana imua Oʻu.

39. A eia hou, he oiaio Kaʻu e olelo aku nei ia oe, ina e mihi kou enemi mahope o kona lele ana mai maluna ou ka mua o ka manawa, a hele mai imua ou me ka nonoi ana i kou huikala ana aku, e kala oe ia ia, a aole e paa hou ia mea i hoike kue no kou enemi,

40. A pela aku a hiki i ka lua a me ke kolu o ka manawa; a e like me ka mihi pinepine ana o kou enemi no ka lawehala ana i lawehala ai ia oe, e kala oe ia ia, a hiki aku i ke kanahiku hiku o ka manawa:

41. A ina e lawehala oia ia oe a mihi ole i ka wa mua, eia nae, e kala oe ia ia;

42. A ina e lawehala oia ia oe i ka lua o ka manawa, a mihi ole, e kala nae oe ia ia;

43. A ina e lawehala oia ia oe i ke kolu o ka manawa, a mihi ole, e kala no hoi oe ia ia;

44. Aka, ina e lawehale oia ia oe i ka ha o ka manawa, aole oe e kala ia ia, aka, e lawe mai oe i keia mau hoike imua o ka Haku, aole auanei ia mau mea e holoi ia a hiki i kona mihi ana, a uku pa-ha mai ia oe ma na mea a pau ana i lawehala ai ia oe;

45. A ina e hana oia i keia, e kala oe ia ia me kou naau a pau, a ina e hana ole oia i keia, e hoopai pa-haneri no Au, ka Haku, i kou enemi;

46. A maluna o kana poe keiki, a maluna o na keiki a kana poe keiki o ka poe a pau e inaina mai ana Iaʻu, a hiki aku i ke kuakahi a me ke kualua o na hanauna.

47. Aka, ina e mihi na keiki, a i ole, na keiki a na keiki, a huli aku i ka Haku ko lakou Akua, me ko lakou naau a pau, a me ko lakou mana, noonoo, a me ka ikaika a pau, a hoihoi pa-ha no ka lakou mau lawehala ana a pau, a lakou i lawehala ai, a i ole, a ko lakou mau makua i lawehala ai, a i ole, na makua o ko lakou mau makua, alaila, e kapae ia ae kou huhu,

48. A aole e hiki hou mai ka hoopai maluna o lakou, wahi a ka Haku, kou Akua, a aole e lawe hou ia mai ka lakou mau lawehala ana i hoike imua o ka Haku. Amene.