1. Aia hoi, penei, wahi a ka Haku ko oukou Akua ia oukou, E na Lunakahiko o Kuu Ekalesia, e maliu mai oukou a hoolohe, a e apo mai i Koʻu makemake e pili ana no oukou;

2. No ka mea, he oiaio, ke olelo aku nei Au ia oukou, ke makemake nei Au ia oukou e lanakila maluna o ko ke ao nei, no ia mea, e aloha aku ana Au ia oukou.

3. Aia kekahi poe mawaena o oukou i hana hewa; aka, he oiaio, ke olelo aku nei Au, no keia manawa hookahi wale no, no Koʻu nani iho, a no ka hoola ia ana o na uhane, ua kala aku Au ia oukou i ko oukou mau hewa.

4. E aloha aku ana Au ia oukou, no ka mea, ua haawi aku Au i ke aupuni ia oukou:

5. A aole e lawe ia na ki o na mea pohihihi o ke aupuni mai Kuu kauwa o Iosepa Kamika, opio, mai ma o na mea la Aʻu i koho ai, oiai oia e ola ana, ina e hoolohe ana oia i Kuu mau kanawai.

6. Aia he poe i imihala ia ia me ke kumu ole;

7. Eia nae, ua hana hewa oia, aka, he oiaio, ke olelo aku nei Au ia oukou, e kala ana Au, ka Haku, i na hewa o ka poe e hoike ana i ko lakou mau hewa imua Oʻu a noi mai i ke kala ana, ka poe i hana ole i ka hewa ku i ka make.

8. Imihala ae la Kaʻu mau haumana kekahi i kekahi, i na la o ka wa kahiko, a kala ole aku kekahi i kekahi iloko o ko lakou mau naau, a no keia hewa lakou i hoopilikia ia ai, a hahau nui ia ai:

9. No ia mea, ke olelo aku nei Au ia oukou, he pono ia oukou ke kala aku kekahi i kekahi, no ka mea, o ka mea e kala ole ana i kona hoahanau i kona mau hewa, e ku ana oia me ke ahewa ia imua o ka Haku, no ka mea, ke waiho la iloko ona ka hewa i oi aku.

10. E kala aku ana Au, ka Haku, i ka mea Aʻu e makemake ai e kala aku, aka, ua koi ia oukou e kala aku i na kanaka a pau;

11. A he pono e i iho oukou iloko o ko oukou mau naau na ke Akua e kaupaona mai mawaena o kaua, a e uku mai ia oe e like me kau mau hana.

12. A o ka mea e mihi ole ana i kona mau hewa, a hoike ole ia mau mea, alaila, e lawe mai oukou ia ia imua o ka Ekalesia, a e hana aku ia ia e like me ka ka Palapala Hemolele i hai mai ai ia oukou, ina paha ma ke kauoha, a i ole, ma ka hoikeana.

13. A e hana oukou i keia i hoonani ia ai ke Akua, aole no ko oukou kala ole aku, oiai ua loaa ole ke aloha, aka, i apono ia ai oukou imua o na maka o ke kanawai, i lawehala ole ai oukou ia Ia i ko oukou Mea-kau-kanawai.

14. He oiaio, ke olelo aku nei Au, no keia kumu e hana oukou i keia mau mea.

15. Aia hoi, ua huhu Au, ka Haku, ia ia, oia hoi, i Kuu kauwa mamua, o Ezera Buki, a me Kuu kauwa no hoi o Isaaka Mole, no ka mea, aole laua i malama i ke kanawai, a aole no hoi i ke kauoha;

16. Imi hewa iho la laua iloko o ko laua mau naau, a kaohi mai la Au ka Haku i Kuu Uhane. Hoahewa aku la laua i kela mea me hea la he ino, aole nae he ino iloko o ia mea; eia no nae, ua kala aku Au i Kaʻu kauwa ia Isaaka Mole.

17. A o Kaʻu kauwa no hoi o Eluene Paterige, aia hoi, ua hana hewa oia, a ke imi nei o Satana e pepehi i kona uhane me ke kino, aka, i ka wa e hoike ia aku ai keia mau mea ia lakou, a mihi lakou no ka hewa, e kala ia auanei lakou.

18. A ano, he oiaio, ke olelo nei Au, he mea pono ia iloko Oʻu, mahope aku o kekahi mau pule kakaikahi, e hoi hou Kaʻu kauwa o Sidane Gilibati i kana hana, a me kana oihana agena ma ka aina o Ziona;

19. A o na mea ana i ike a i lohe ai e hoike ia aku ia i Kuu mau haumana, i make ole ai lakou. A no keia kumu i kamailio aku ai Au i keia mau mea.

20. A eia hou, ke olelo aku nei Au ia oukou, i ole ai e hoowalewale ia Kaʻu kauwa, o Isaaka Mole, a oi aku mamua o ka mea e hiki ia ia ke kaupale aku, a ao hewa aku oia a pilikia oukou, haawi aku la Au i kauoha e kuai lilo aku i kona aina mahiai.

21. Aole Oʻu makemake e kuai aku Kuu kauwa, o Federika G. Wiliama, i kona aina mahiai, no ka mea, ke makemake nei Au, ka Haku, e paa i kekahi kuleana ikaika ma ka aina o Ketalana, no ke kowa o na makahiki elima, a iloko o ia manawa aole Au e hoohiolo i ka poe hewa, a ma ia mea e hoopakele paha Au i kekahi poe;

22. A mahope o ia la, aole Au, ka Haku, e hoahewa ana i kekahi mea e pii ana me ka naau hamama i ka aina o Ziona; no ka mea, ke makemake nei Au, ka Haku, i na naau o na keiki a kanaka.

23. Aia hoi, o keia wa ua kapa ia o keia la (a hiki i ka hiki ana mai o ke Keiki a ke Kanaka), a he oiaio, he la ia no ka mohai ana a he la no ka auhau ana i na hapaumi o ka waiwai o Kuu poe kanaka; no ka mea, o ka mea i auhau ia i ka hapaumi o ka waiwai, aole e puhi ia i ke ahi (i Kona hiki ana mai);

24. No ka mea, mahope aku o keia la e hiki mai ai ka puhi ia ana i ke ahi: he olelo keia mamuli o ke ano o ka Haku; no ka mea, he oiaio, ke i aku nei Au, i ka la apopo, o ka poe haaheo a pau a me ka poe hana hewa e like ana lakou me he mauu maloo la; a e puhi aku no Au ia lakou, no ka mea, Owau ka Haku o na lehulehu: a aole loa Au e hookoe i kekahi e noho ana iloko o Babulona.

25. No ia mea, ina e manaoio mai oukou Iaʻu, e hana ana oukou oiai ka wa i kapa ia o keia la.

26. A aole he mea pono i Kuu mau kauwa o Nuela K. Witine a me Sidane Gilibati e kuai lilo aku i ko laua hale kuai a me ko laua mau waiwai maanei, no ka mea, aole keia he naauao, a hiki i ka wa o ke koena o ka Ekalesia e noho nei ma keia wahi, e hele aku ai i ka aina o Ziona.

27. Aia hoi, ua olelo ia ma Kuu mau kanawai, a i ole, ua papa ia ke komo ana iloko o ka aie i ko oukou poe enemi;

28. Aka, aia hoi, aole i olelo ia ma kekahi manawa, aole e lawe ana ka Haku i Kona manawa e makemake ai, a hookaa aku e like me Kana i manao ai he pono:

29. No ia mea, oiai he poe agena oukou, a aia oukou ma ka ka Haku hana; a o kela a me keia mea a oukou e hana ai i ku i ka makemake o ka Haku, o ka ka Haku hana no ia,

30. A ua hoonoho Oia ia oukou e hoolako i Kona Poe Hoano ma keia mau la hope nei, i loaa ai ia lakou he hooilina ma ka aina o Ziona:

31. A aia hoi, ke hai aku nei Au, ka Haku, ia oukou, a o Kaʻu mau olelo he oiaio a aole loa i haule, e loaa auanei ia ia lakou;

32. Aka, e hooko ia na mea a pau ma ko lakou manawa e pono ai;

33. No ia mea, mai paupauaho ma ka hana pono, no ka mea, ke hookumu nei oukou i ke kahua o kekahi hana nui. A mailoko mai o na mea liilii e puka mai ai na mea nui.

34. Aia hoi, ke makemake nei ka Haku i ka naau a me ka manao e ake ana e hana; a o ka mea e ake ana e hana a hoolohe e ai auanei ia i na mea maikai o ka aina o Ziona i keia mau la hope;

35. A e oki ia aku ka poe kipi mai ka aina aku o Ziona, a e hookuke ia i kahi e, a aole e lilo ka aina ia lakou:

36. No ka mea, he oiaio, ke olelo nei Au o ka poe kipi aole lakou no ke koko o Eperaima, no ia mea, e o-u ia lakou.

37. Aia hoi, ua kukulu Au ka Haku i Kuu Ekalesia ma keia mau la hope nei me he lunakanawai la e noho ana maluna o kekahi puu, a i ole, ma kekahi wahi kiekie, e hookolokolo i na lahuikanaka:

38. No ka mea, e hiki mai no keia na na kanaka o Ziona e hookolokolo i na mea a pau e pili ana ia Ziona;

39. A e hookolokolo ia ka poe wahahee a me ka poe hookamani e lakou, a o ka poe aole he mau aposetolo a he mau kaula e ike ia auanei lakou.

40. A o ka Bihopa no hoi, ka lunakanawai, a me kona mau hoakuka, ina aole lakou i hoopono ma ko lakou oihana kahu malama waiwai, e ahewa ia no, a e hoonoho ia kekahi poe e ae ma ko lakou wahi;

41. No ka mea, aia hoi, ke olelo aku nei Au ia oukou e ulumahiehie no o Ziona, a e kau mai ka nani o ka Haku maluna ona,

42. A e lilo auanei ia i hae no na kanaka, a e hele mai i ona la mailoko mai o kela a me keia lahuikanaka malalo iho o ka lani.

43. A e hiki mai ana ka la e haalulu ai na lahuikanaka o ka honua mamuli ona, a e makau mamuli o kona poe weliweli. Ua olelo ka Haku ia mea. Amene.