1. E Kaʻu keiki, e Oresona, e maliu a e hoolohe, a e nana mai i ka mea Aʻu, ka Haku ke Akua, e olelo aku ai ia oe, Owau o Iesu Kristo kou Hoolapanai;

2. Ka malamalama a me ke ola o ke ao nei, he malamalama e olino ana iloko o ka pouli a hoomaopopo ole ka pouli ia mea;

3. Ka Mea i aloha i ko ke ao nei a haawi aku la i Kona ola iho, i lilo ai auanei ka poe a pau e manaoio ana, i mau keiki na ke Akua; no ia mea, he keiki oe Naʻu,

4. A pomaikai oe, no ka mea, ua manaoio mai oe;

5. A oi aku kou pomaikai, no ka mea, ua kahea ia oe e Aʻu e hai i Kuu Euanelio,

6. E hookiekie i kou leo me ka nui a loihi e like me ka leo o ka pu, a e hea aku i ka mihi i keia hanauna hewa a kekee, e hoomakaukau ana i ke alanui o ka Haku no Kona hiki elua ana mai;

7. No ka mea, aia hoi, he oiaio, he oiaio, ke olelo aku nei Au ia oe, ua kokoke mai ka manawa e hele mai ai Au iloko o ke ao me ka mana a me ka nani nui,

8. A he la nui auanei ia ma ka manawa o Koʻu hiki ana mai, no ka mea, e haalulu auanei na lahuikanaka a pau.

9. Aka, mamua o ka hiki ana mai o ua la nui la, e pouli ana ka la, a e hoololi ia ana ka mahina i koko, a e hoole na hoku aole e lilelile mai, a e haule kekahi, a he mau luku nui e kali nei i ka poe hewa:

10. No ia mea, e hapai ae i kou leo a mai aua, no ka mea, ua olelo mai ka Haku ke Akua; nolaila e wanana, a e haawi ia ia ma o ka mana la o ka Uhane Hemolele;

11. A ina e kupaa oe, aia hoi, Owau pu me oe a hiki aku Au:

12. A he oiaio, he oiaio, ke olelo aku nei Au ia oe, e hiki koke aku ana Au. Owau no kou Haku a me kou Hoolapanai. Pela io no. Amene.