1. Ke manaoio nei makou ua hookumu ia kekahi mau aupuni e ke Akua, no ka pomaikai o kanaka, a ke paa nei Oia i na kanaka e hookolokolo ia no ka lakou mau hana e pili ana i ua mau aupuni la, ma ke kau ana i na kanawai a ma ka hooko ana ia mau mea no ka pomaikai a me ka palekana o na kanaka.

2. Ke manaoio nei makou aole e hiki i kekahi aupuni ke mau iloko o ka maluhia, ke ole e kau ia na kanawai a malama ia me ka uhaki ole ia i loaa ai i kela me keia mea pakahi ke kuokoa o ka hoohana ana i kona lunaikehala, a me ke kuleana e paa a hoomalu i ka waiwai, a me ka palekana o ke ola.

3. Ke manaoio nei makou he mea pono e loaa i na aupuni a pau na luna a me na lunakanawai e hooko i na kanawai o ia mau aupuni, a o ka poe e hooko ana i ke kanawai me ke kaulike a me ka pono, he mea pono e imi ia aku a e kakoo ia e ka leo o na kanaka (ina he aupuni repubalika), a i ole, e ka makemake o ka Moi.

4. Ke manaoio nei makou ua hookumu ia ka hoomana Akua ana e ke Akua, a e ku ke kanaka i ka hookolokolo ia imua Ona, a imua Ona wale no, no ka lawelawe ana ia mea, ke ole e hookonokono ana ko lakou mau manao pili hoomana e ae aku maluna o na pono a me na kuleana kuokoa o kekahi poe e aku; aka, aohe o makou manaoio he kuleana ko na kanawai o kanaka e akeakea ma ke kau ana i mau rula hoomana e hoohaiki ai i na lunaikehala o kanaka, a i ole, e hookikina mai i na ano o ka haipule ana ma ke akea a ma kahi malu; e keakea ka lunakanawai i na karaima e pono ai, aole nae e rula i ka lunaikehala; e hoopai i ka mea hewa e pono ai, aka, aole loa e kinai i ke kuokoa o ka uhane.

5. Ke manaoio nei makou he mea pono i na kanaka a pau e kokua a e kakoo i na aupuni like ole ma kahi a lakou e noho ana, oiai e malama ia ana e na kanawai o ua mau aupuni la iloko o ko lakou mau kuleana a pono pili paa i hiki ole hoi ke lawe ia aku; a o ka hoala kipi a me ke kaua kipi, he hana kupono ole ia na kela a me keia makaainana i malama ia pela, a he mea pono e hoopai ia i ku i ka hewa; a he kuleana hoi ko na aupuni a pau e hana i na kanawai a lakou i manao ai he kupono e loaa ka pono kaulike o ka lehulehu, a ia wa hookahi no nae e malama ana me ka laahia i ke kuokoa o ka lunaikehala.

6. Ke manaoio nei makou he mea pono e kakoo ia kela a me keia kanaka ma kona wahi; o na alii a me na lunakanawai, ma ia mau oihana, oiai ua hoonoho ia no ka hoopakele ana i ka poe hewa ole, a no ka hoopai ana i ka poe hewa; a e hoomaikai a malama aku na kanaka a pau i na kanawai e pono ai, no ka mea, ke ole ia mau mea, e kanu ia auanei ka haunaele a me ka hana hooweliweli ma kahi o ka maluhia a me ka lokahi; ua hookumu ia na kanawai o ke kanaka no ka hooponopono ana i ko kakou mau pono ma ke ano he mau kanaka a he mau lahuikanaka hoi, mawaena o ke kanaka a me ke kanaka; a ua haawi ia mai na kanawai o ke Akua noluna mai, e hai mai ana i na rula maluna o na mea pili uhane, no ka manaoio a me ka hoomana ana, a na ke kanaka e pane aku i kona Mea Nana i hana no keia mau mea a elua.

7. Ke manaoio nei makou he kuleana ko na mea hoomalu, na mokuaina a me na aupuni, he mea pono no lakou e hana i na kanawai no ka hoopakele ana i na kanaka a pau ma ka lawelawe kuokoa ana i ko lakou manaoio hoomana; aka, aole o makou manaoio he kuleana ko lakou, ma ke ano pono, e hoonele i na makaainana i keia kuleana, a e hoahewa ia lakou iloko o ko lakou mau manao, oiai ua hoike ia ka hoomaikai ana a me ka malama ana i na kanawai, a oiai hoi aole e kakoo ana ia mau manao pili hoomana i ka hoala kipi a me ka ohumu kipi.

8. Ke manaoio nei makou he mea pono e hoopai ia ka hana ana i ke karaima e like me ke koikoi o ka hewa; o ka pepehikanaka, ke kipi ana, ka powa ana, ka aihue ana, ka hoopilikia ana i ka maluhia o ka lehulehu, ma na ano a pau, e hoopai ia e pono ai, e ku like me ka nui a ke karaima a me ka hoala ana i ka ino mawaena o kanaka, e na kanawai o ke aupuni kahi i hana ia ai ia hewa; a no ka maluhia a me ka nohona oluolu o ka lehulehu, he mea pono i na kanaka a pau e hele mai imua a e hoohana i ko lakou mana ma ka lawe ana mai i ka poe haihai i na kanawai maikai i ka hoopai ana.

9. Aohe o makou manaoio he mea pono ia e hoohuikau i ka mana o ka hoomana me ko ke aupuni o kanaka, i mea e kokua ai i kekahi hui hoomana a e ahewa hoi i kekahi iloko o kona mau kuleana pili uhane, a hoole i na kuleana o kela me keia o kona mau lala pakahi ma ke ano he mau makaainana.

10. Ke manaoio nei makou he kuleana ko na hui hoomana a pau e hooponopono i ko lakou mau lala no na hana pono ole, e ku i na rula a me na kanawai o ia mau hui, ina nae o ia mau hooponopono ana no ke kuleana hoahanau a me ke kuleana lala; aka, aohe o makou manaoio he mana ko kekahi hui hoomana e hookolokolo i na kanaka no ke kuleana e paa i ka waiwai, a i ole, i ke ola, e lawe mai o lakou aku i na pono o keia ao, a i ole, e hookomo ma kahi e poino ai ke ola a lala paha, aole no hoi e hookau i kekahi hoopai e eha ai ke kino maluna o lakou, o ke oki wale aku no ia lakou mai ko lakou hui aku, a e lawe mai i ko lakou kuleana hoahanau mai ia lakou mai.

11. Ke manaoio nei makou e hoohalahala aku na kanaka imua o na kanawai o ka aina e pono ai no ka hooponopono ana i na hana hewa ia mai a me na hoopilikia ia, i ka wa i hoehaeha ia mai ai ke kino, a i ole, i keakea ia ai ke kuleana e paa i ka waiwai a hoino ia ai paha ka inoa maikai, ina aia he mau kanawai e ku pale ana i ua mau mea nei; aka, ke manaoio nei makou, ua apono ia na kanaka a pau ma ke ku pale ana ia lakou iho, i ko lakou mau hoaloha, a me ka waiwai, a me ke aupuni, mai na hoeha a komohewa ana a na kanaka a pau i kue i ke kanawai, a ma na manawa kupilikii, ka wa hoi e hiki koke ole ai ke hoohalahala aku imua o ke kanawai a loaa mai ke kokua ia.

12. Ke manaoio nei makou he mea pono ia e hai aku i ka Euanelio i na lahuikanaka a pau o ka honua, a e ao e aku i ka poe pono e hoopakele ia lakou iho mai ka ino mai o ko ke ao nei; aka, aohe o makou manaoio he mea pono ia e mauae wale aku me na kauwa i hoopaa ia, aole hoi e hai i ka Euanelio ia lakou, a aole no hoi e bapetizo ia lakou me ke kue i ka makemake a me ka manao o ko lakou mau haku, a aole hoi e komo kuleana ole aku a koi iki ia lakou, i mea no lakou e ohumu ai no ko lakou kulana iloko o keia ola ana, a ma ia mea e hoopoino ia ai ke ola o na kanaka; ke manaoio nei makou o ia mauae wale ana he ku ole ia i ke kanawai a he pono ole hoi, a he mea hoopilikia hoi i ka maluhia o kela a me keia aupuni e ae ana i na kanaka e paa ia iloko o ka nohona kauwa kuapaa.