1. O ka hana a ke kakauolelo a ka Haku, ka mea Ana i koho ai, e malama i kekahi mooolelo a me kekahi Mookuauhau Nui pili laula o ka Ekalesia o na mea a pau e hana ia ana ma Ziona, a me ka poe a pau e hoolaa ana i na waiwai, a loaa pololei mai na hooilina mai ka Bihopa mai;

2. A me ke ano o ko lakou noho ana, ko lakou manaoio a me na hana; a me ka poe haalele hoi a pau, ka poe a pau i haalele i ka Ekalesia mahope iho o ka loaa ana o ko lakou mau hooilina.

3. He mea ia e kue i ka makemake a me ke kauoha a ke Akua e hoopaa ia me na kanaka o ke Akua, na inoa o ka poe i loaa ole ko lakou hooilina ma ka hoolaa ana, i ku i Kona kanawai Ana i haawi mai ai, i hiki ai ia Ia ke auhau i ka hapaumi o ko Kona poe kanaka, e hoomakaukau ia lakou no ka la o ka hoopai a puhi ana hoi;

4. Aole hoi e malama ia ko lakou mookuauhau, aole hoi e paa ma kahi e loaa ai maluna o kekahi o na buke mookuauhau a mooolelo paha o ka Ekalesia;

5. Aole e loaa ko lakou mau inoa i kakau ia iloko o ka buke o ke kanawai o ke Akua, aole hoi na inoa o na makua, aole hoi na inoa o na keiki, wahi a ka Haku o na lehulehu.

6. He oiaio, penei wahi a ka leo malie a uuku, ka mea e hawanawana ana a kapoo a komohia iloko o na mea a pau, a he pinepine na manawa i hoohaalulu ai ia mea i koʻu mau iwi, oiai ia e hoike ana, i ka i ana:

7. A e hiki mai ana keia e hoouna aku no Au, ka Haku ke Akua, i kekahi mea mana a ikaika, e paa ana i ke kookoo alii o ka mana iloko o kona lima, i hoaahu ia me ka malamalama i uhi, nona ka waha e hoopuka ana i na olelo, na olelo mau loa; a o kona opu he punawai ia o ka oiaio, e hooponopono i ka hale o ke Akua, a e hoonohonoho ma ka hailona, i na hooilina o ka Poe Hoano, ka poe no lakou na inoa i loaa, a me na inoa o ko lakou mau makua, a me ko ka lakou mau keiki, i hoopaa ia iloko o ka buke o ke kanawai o ke Akua:

8. Oiai nae, o kela kanaka i kahea ia e ke Akua a i koho ia, e o aku ana i kona lima e hoomaloeloe i ka pahu berita o ke Akua, e haule no ia ma ka ihe o ka make, e like la me kekahi laau i hahau ia e ka ihe lapalapa o ka uila;

9. A o ka poe a pau i kakau ole ia iloko o ka buke hoomanao, aole e loaa kekahi hooilina i kela la, aka, e oki ia lakou a kaawale, a e koho ia ko lakou mahele no lakou mawaena o ka poe hoomaloka, kahi e uwe a e uwi ai na niho.

10. O keia mau mea Aʻu e olelo nei aole Naʻu iho; nolaila, e like me ka ka Haku e olelo nei, pela no hoi Oia e hooko ai.

11. A o ka poe o ka Oihanakahuna Kiekie, no lakou na inoa i kakau ole ia iloko o ka buke o ke kanawai, a i ole e ike ia ua haalele i ka Ekalesia, a i ole ua oki ia mai ka Ekalesia aku; a pela no hoi me ka poe a ka Oihanakahuna haahaa iho, a i ole na lala, aole e loaa ia lakou he hooilina mawaena o ka Poe Hoano o ka Mea Kiekie Loa ma kela la;

12. Nolaila, e hana ia aku ia ia lakou e like me ia i na keiki a ke Kahuna, e like me ia i palapala ia iloko o ka mokuna elua a i ka pauku kanaono-kumamakahi a me kanaono-kumamalua o Ezera.