1. Aia hoi, penei wahi a ka Haku, he oiaio, o ka Haku hoi o ka honua holookoa, ia oe, e Kuu kauwa e Wiliama, ua kahea ia oe a ua wae ia, a mahope o ka bapetizo ia ana me ka wai, oia hoi, ina e hana oe ia mea me ka maka kaukahi i Koʻu nani, e loaa ia oe ke kala ia ana o kou mau hewa, a me ka loaa ana o ka Uhane Hemolele ma o ke kau ana la o na lima;

2. Alaila, e hoolilo ia oe ma o ka lima la o Kuu kauwa o Iosepa Kamika, opio, i Lunakahiko no keia Ekalesia, e hai i ka mihi a me ke kala ia ana o na hewa ma o ka bapetizo ana la iloko o ka inoa o Iesu Kristo, ke Keiki a ke Akua ola;

3. A maluna o ka mea au e kau ai i kou mau lima, ina e mihi lakou imua Oʻu, e loaa ia oe ka mana e haawi i ka Uhane Hemolele.

4. A eia hou, e hookaawale ia oe e kokua i Kaʻu kauwa, ia Oliva Kaudare, e lawelawe i ka hana o ka pai palapala ana, a o ka wae ana, a me ke kakau ana i na buke no na kula iloko o keia Ekalesia, i loaa ai no hoi i na keiki liilii ka hoonaauao ia ana imua Oʻu e like me ka oluolu Iaʻu.

5. A eia hou, he oiaio, ke olelo aku nei Au ia oe, no keia kumu e hele oe ma kou huakai hele me Kuu mau kauwa o Iosepa Kamika, opio, a me Sidane Rigedona, i hoonoho ia ai oe ma ka aina o kou hooilina e lawelawe i keia hana.

6. A eia hoi, e hele no hoi Kaʻu kauwa o Iosepa Koe ma kona huakai hele me laua. E hoike ia aku ana ke koena iho ma keia hope aku, he oiaio, e like me Koʻu makemake. Amene.