1. O ke ku ana o ka Ekalesia o Kristo i keia mau la hope, oia hoi, he hookahi tausani ewalu haneri me kanakolu makahiki mai ka hiki ana mai o ko kakou Haku a Mea e Ola ai o Iesu Kristo ma ka io, oia hoi, ua hoonohonoho pono ia ia a kukulu ia i ku i na kanawai o ko kakou aina, ma o ka makemake la a me na kauoha a ke Akua, iloko o ka ha o ka malama, a ma ka la eono o ka malama i kapa ia o Aperila;

2. Oia na kauoha i haawi ia ia Iosepa Kamika, opio, ka mea i kahea ia e ke Akua, a hoolilo ia i Aposetolo no Iesu Kristo, e lilo i Lunakahiko mua no keia Ekalesia;

3. A ia Oliva Kaudare, ka i kahea ia no hoi e ke Akua, i Aposetolo no Iesu Kristo, e lilo i Lunakahiko elua no keia Ekalesia, a i hoolilo ia hoi malalo o kona lima;

4. A o keia mamuli o ka lokomaikai o ko kakou Haku a Mea e Ola ai o Iesu Kristo, ia Ia ka nani a pau, i keia wa a i ka wa pau ole. Amene.

5. Mahope o ka hoike pololei ia ana aku i keia Lunakahiko mua ua loaa ia ia ka huikala ia ana o kona mau hewa, ua hoohihia hou ia oia iloko o na mea haakei o ko ke ao nei.

6. Aka, mahope o ka mihi ana, a me ka hoohaahaa ana ia ia iho me ka oiaio, ma o ka manaoio la, lawelawe mai la ke Akua ia ia ma o kekahi anela hemolele la, nona ka nanaina me he uila la, a nona na aahu i maemae a keokeo mamua o na keokeo e ae a pau;

7. A haawi aku la ia ia i na kauoha nana i hoeueu ia ia;

8. A haawi hoi ia ia i ka mana mailuna mai, ma o na mea la i hoomakaukau ia mamua, e unuhi i ka Buke a Moramona,

9. A iloko ona ka mooolelo o kekahi lahuikanaka i haule, a me ka piha o ka Euanelio o Iesu Kristo i ka poe Genetile a i na Iudaio no hoi,

10. Ka mea i haawi ia mai ma o ka uluhia ia ana la, a i hooiaio ia aku i kekahi poe e ae ma o ka lawelawe ana la o na anela, a i hai ia aku i ko ke ao nei e lakou,

11. E hooia ana i ko ke ao nei he oiaio ka Palapala Hemolele, a ke hoouluhia nei ke Akua i na kanaka a kahea hoi ia lakou i Kana hana hemolele i keia kau a i keia hanauna, e like me ia i na hanauna o ka wa kahiko,

12. A ma o ia mea la e hoike ana Oia no ke Akua hookahi inehinei, i keia la, a i ka wa pau ole. Amene.

13. Nolaila, mamuli o ka loaa ana o ua mau hoike nui nei, ma o lakou nei e hookolokolo ia ai auanei ko ke ao nei, he oiaio, e like me ka nui o ka poe e loaa ana ka ike no keia hana ma keia hope aku;

14. A o ka poe e apo mai ana ia mea me ka manaoio, a hana aku i ka pono, e loaa no ka lei alii o ke ola mau loa;

15. Aka, o ka poe e hoopaakiki ana i ko lakou mau naau iloko o ka hoomaloka a hoole ia mea, e huli auanei ia i ko lakou hoahewa ia ana,

16. No ka mea, o ka Haku ke Akua ka i olelo mai i keia mea; a o makou, na Lunakahiko o ka Ekalesia, ua lohe a ke hoike nei i na olelo a ke Alii Nani ma kahi kiekie, ia Ia ka hoonani ia no ka wa mau loa a mau loa aku. Amene.

17. Mamuli o keia mau mea, ke ike nei kakou aia he Akua iloko o ka lani, ka Mea mana loa a mau loa hoi, mai ka wa mau loa a i ka wa mau loa, ke Akua hookahi a loli ole, ka Mea nana i kukulu i ka lani a me ka honua, a me na mea a pau iloko o laua;

18. A Nana i hana i ke kanaka, i kane a i wahine, ma Kona ano iho a ma Kona like ana, i hana ai Oia ia laua,

19. A haawi mai la ia laua i na kauoha e aloha a e hookauwa aku laua Nana, na ke Akua ola a oiaio hookahi, a Oia wale no ka Mea a laua e hoomana aku ai.

20. Aka, ma o ka uhai ia ana la o keia mau kanawai hemolele, ua lilo ke kanaka i ko ke kuko, a i ko ke diabolo, a lilo i kanaka haule.

21. No ia mea, i haawi mai ai ke Akua Mana Loa i Kana Keiki Hanaukahi, e like me ia i palapala ia ma kela mau Palapala Hemolele i haawi ia mai ma Ona la.

22. Ua hoomanawanui Oia i na hoowalewale, aka, aole i maliu aku ia mau mea;

23. Ua kaulia ia Oia, a make, a ala hou mai i ke kolu o ka la;

24. A pii aku la i ka lani, e noho iho ma ka lima akau o ka Makua, e hoomalu mai ai me ka mana loa e like me ka makemake o ka Makua,

25. A e like me ka nui o ka poe e manaoio a bapetizo ia ma Kona inoa hemolele, a hoomanawanui iloko o ka manaoio a hiki i ka hopena, e hoola ia:

26. Aole wale no o ka poe i manaoio mahope o kona hiki ana mai i ka waenakonu o ka manawa, ma ka io, aka, o ka poe a pau mai kinohi mai, he oiaio, e like me ka nui mamua o Kona hiki ana mai, ka poe hoi i manaoio i na olelo a na Kaula hemolele, ka poe i olelo mai ai e like me ka uluhia ia ana ma ka haawina o ka Uhane Hemolele, ka poe i hoike oiaio mai Nona ma na mea a pau, e loaa auanei ia lakou ke ola mau loa,

27. E like me ka poe e hiki mai ana mahope, ka poe hoi e manaoio ana iloko o na haawina a me na oihana a ke Akua ma o ka Uhane Hemolele la, ka mea e hoike nei no ka Makua a me ke Keiki;

28. O ia Makua, Keiki, a Uhane Hemolele nei, he hookahi Akua lakou, i mana loa a i mau loa, a hopena ole. Amene.

29. A ke ike nei makou e mihi na kanaka a pau e pono ai a e manaoio i ka inoa o Iesu Kristo, a e hoomana aku i ka Makua ma Kona inoa, a e hoomanawanui iloko o ka manaoio ma Kona inoa a hiki i ka hopena, ke ole ia, aole hiki ia lakou ke hoola ia iloko o ke aupuni o ke Akua.

30. A ke ike nei makou o ka hoapono ia ana ma o ka lokomaikai la o ko kakou Haku a Mea e Ola ai o Iesu Kristo, he pololei a he oiaio ia;

31. A ke ike nei no hoi makou, o ka hoomaemae ia ana ma o ka lokomaikai la o ko kakou Haku a Mea e Ola ai o Iesu Kristo, he pololei a he oiaio ia i na poe a pau e aloha a hookauwa aku na ke Akua me ko lakou mana, naau, a me ka ikaika a pau.

32. Aka, he mea hiki i ke kanaka ke haule mai ka lokomaikai ae a haalele i ke Akua ola;

33. Nolaila, e malama pono ka Ekalesia a e pule mau, o haule auanei lakou iloko o ka hoowalewale ia;

34. He oiaio, o ka poe i hoomaemae ia e malama pono no hoi lakou.

35. A ke ike nei makou he oiaio keia mau mea a ua kulike me na hoikeana a Ioane, aole e pakui aku ana, aole hoi e lawe mai ana mailoko mai o ka wanana o kana buke, ka Palapala Hemolele, a i ole, na hoikeana a ke Akua, na mea e hiki mai ana ma keia hope aku ma o ka haawina la a me ka mana o ka Uhane Hemolele, ka leo o ke Akua, a i ole, ka lawelawe ana o na anela.

36. A o ka Haku ke Akua ka i olelo mai ia mea; a e haawi ia aku ka hanohano, ka mana, a me ka nani i Kona inoa hemolele, i keia wa a i ka wa pau ole. Amene.

37. A eia hou, ma ke ano he kauoha i ka Ekalesia e pili ana i ke ano o ka bapetizo ana.—O ka poe a pau e hoohaahaa ana ia lakou iho imua o ke Akua, a makemake e bapetizo ia a hele mai me na naau pepe a me na uhane mihi, a hoike aku imua o ka Ekalesia ua mihi io lakou i ko lakou mau hewa a pau, a ua ae aku e lawe maluna iho o lakou i ka inoa o Iesu Kristo, me ka manao paa e hookauwa aku Nana a hiki i ka hopena a hoike oiaio mai ma o ka lakou mau hana la ua loaa ia lakou ka uhane o Kristo no ke kala ia ana o ko lakou mau hewa, e hookipa ia no lakou ma o ka bapetizo ia ana la iloko o Kona Ekalesia.

38. Ka hana a na Lunakahiko, na Kahuna, na Kumu, na Diakona, a me na Lala o ka Ekalesia o Kristo.—O ka Aposetolo he Lunakahiko no ia, a o kana oihana oia no ka bapetizo aku,

39. A e hoolilo aku i mau Lunakahiko e ae, i mau Kahuna, i mau Kumu, a i mau Diakona,

40. A e lawelawe i ka berena a me ka waina—na hoailona o ka io a me ke koko o Kristo;

41. A e hoopaa i ka poe i bapetizo ia iloko o ka Ekalesia, ma ke kau ana o na lima no ka bapetizo ana me ke ahi a me ka Uhane Hemolele, e like me ko ka Palapala Hemolele;

42. A e ao aku, hoakaka, kauleo, bapetizo, a kiai maluna o ka Ekalesia;

43. A e hoopaa i ka Ekalesia ma ke kau ana o na lima a me ka haawi ana i ka Uhane Hemolele,

44. A e alakai i na halawai a pau.

45. Na na Lunakahiko e alakai i na halawai me lakou i alakai ia ai e ka Uhane Hemolele, e like me na kauoha a me na hoike ana a ke Akua.

46. O ka hana a ke Kahuna e haiolelo, e ao aku, e hoakaka, e kauleo, a e bapetizo, a e lawelawe i ka ahaaina a ka Haku,

47. A e komo i ka hale o kela a me keia lala, a kauleo aku ia lakou e pule me ka leo a ma kahi malu, a e hana i na mea a pau e pono ai ka ohana;

48. A ua hiki no hoi ia ia ke hoolilo i mau Kahuna e ae, i mau Kumu, a i mau Diakona.

49. A nana no e alakai i na halawai i ka wa aole kekahi Lunakahiko malaila;

50. Aka, i ka wa o kekahi Lunakahiko malaila, o kana wale no e haiolelo, ao aku, hoakaka, kauleo, a bapetizo,

51. A e komo i ka hale o kela a me keia lala, e kauleo ana ia lakou e pule me ka leo a ma kahi malu, a e hana i na mea a pau e pono ai ka ohana.

52. Ma keia mau hana a pau e kokua ke Kahuna i ka Lunakahiko, ina he mea ia e pono ai.

53. O ka hana a ke Kumu e kiai mau maluna o ka Ekalesia, a e launa pu a hooikaika ia lakou,

54. A e nana pono i hewa ole kekahi mawaena o ka Ekalesia—aole hoi huhu kekahi me kekahi—aole hoi hoopunipuni ana, aole hoi akiaki ana, aole hoi olelo ino ana;

55. A e nana pono i halawai pinepine ai ka Ekalesia, a e nana pono hoi i hana ai na lala apau i ka lakou hana;

56. A nana no e alakai i na halawai ke ole kekahi Lunakahiko a Kahuna paha malaila—

57. A e kokua mau ia oia ma kana mau hana a pau iloko o ka Ekalesia, e na Diakona, ina he mea ia e pono ai;

58. Aka, aole he mana ko na Kumu, aole hoi ko na Diakona e bapetizo aku, e lawelawe i ka ahaaina a ka Haku, aole hoi e kau lima:

59. Na lakou nae e ao aku, hooakaka, kauleo, a hoonaauao, a e kono aku i ka poe a pau e hele mai io Kristo la.

60. E hoolilo ia kela a me keia Lunakahiko, Kahuna, Kumu, a Diakona hoi, e ku i na haawina a me na oihana a ke Akua nona; a e hoolilo ia oia ma o ka mana la o ka Uhane Hemolele iloko o ka mea nana oia e hoolilo aku.

61. E halawai kela a me keia Lunakahiko o keia Ekalesia o Kristo iloko o kekahi huikuka i hookahi manawa iloko o ekolu mahina, a i ole, ma kela manawa a me keia manawa a ia mau huikuka e kuhikuhi a koho ai;

62. A na ia mau huikuka e hana i kela a me keia hana pili Ekalesia e pono ke hana ia ma ia manawa.

63. E loaa i na Lunakahiko ko lakou mau laikini mai kekahi mau Lunakahiko e ae mai, ma o ka apono ana la o ka apana o ka Ekalesia kahi a lakou i noho paa ai, a i ole, mai na huikuka mai.

64. Ua hiki i kela a me keia Kahuna, Kumu, a Diakona, i hoolilo ia e kekahi Kahuna, ke loaa he palapala hooia mai ia ia mai ma ia manawa, a na ia palapala hooia, ke haawi ia aku i kekahi Lunakahiko, e hookuleana ia ia e loaa kekahi laikini, a na ia mea e hoomana ia ia e lawelawe i na hana o kana oihana, a i ole, ua hiki ia ia ke loaa ia mea mai kekahi huikuka mai.

65. Aole kekahi kanaka e hoolilo ia i kekahi oihana iloko o keia Ekalesia, ma kahi o kekahi apana ona i kukulu pono ia ai, me ka apono ole ana o ia apana o ka Ekalesia;

66. Aka, ua hiki i na Lunakahiko e noho hoomalu ana, na Bihopa kaahele, na Hoakuka Kiekie, na Kahuna Kiekie, a me na Lunakahiko, ke loaa ke kuleana e hoolilo aku, ma kahi aole he apana o ka Ekalesia i hiki ke kahea ia kekahi apono ana.

67. E hoolilo ia kela a me keia Peresidena o ka Oihana Kahuna Kiekie (a i ole ka Lunakahiko e hoomalu ana), Bihopa, Hoakuka Kiekie, a me Kahuna Kiekie, ma o ke kuhikuhi ana la a kekahi Ahakuka Kiekie, a i ole, kekahi huikuka o ka Ekalesia holookoa.

68. Ka hana a na lala mahope iho o ko lakou hookomo ia ana mai ma o ka bapetizo ia ana la.—E loaa i na Lunakahiko, a i ole, na Kahuna ka manawa i kupono e wehewehe ai i na mea a pau e pili ana i ka Ekalesia o Kristo i ko lakou hoomaopopo ana, mamua o ko lakou ai ana i ka Ahaaina a ka Haku a me ka hoopaa ia ana ma o ke kau ana la o na lima o na Lunakahiko, i hana ia ai na mea a pau me ka pololei.

69. A e hoike aku na lala imua o ka Ekalesia, a imua no hoi o na Lunakahiko, ma o ka hele ana a me ke kamailio ana ma ke ano o ke Akua, ua kupono lakou no ia mea, i loaa mai ai na hana a me ka manaoio i kulike i ko ka Palapala Hemolele—e hele ana me ka hemolele imua o ka Haku.

70. Na kela a me keia lala o ka Ekalesia o Kristo i loaa keiki, e lawe mai ia lakou i na Lunakahiko imua o ka Ekalesia, a na lakou nei e kau aku i ko lakou mau lima maluna iho o lakou iloko o ka inoa o Iesu Kristo, a hoopomaikai ia lakou ma Kona inoa.

71. Aole kekahi mea e hiki ke hookomo ia mai iloko o ka Ekalesia o Kristo, aia wale no a hiki aku ia i na makahiki o ka hoomaopopo ana i ka pono mawaena o ka hewa imua o ke Akua, a hiki hoi ke mihi.

72. Penei e lawelawe ia ai ka bapetizo ana i ka poe a pau e mihi ana:—

73. O ka mea i kahea ia e ke Akua, a i loaa hoi ka mana mai ia Iesu Kristo mai e bapetizo, e iho pu no ia iloko o ka wai me ka mea i hele mai e bapetizo ia, a e olelo aku, me ke kahea ana ia ia ma kona inoa—Mamuli o ka mana i haawi ia mai iaʻu e Iesu Kristo, ke bapetizo aku nei au ia oe iloko o ka inoa o ka Makua, a o ke Keiki, a o ka Uhane Hemolele. Amene.

74. Alaila e hookomo iho oia ia ia iloko o ka wai, a e puka hou mai mailoko mai o ka wai.

75. He mea pono i ka Ekalesia ke halawai pinepine e ai i ka berena a e inu i ka waina me ka hoomanao ana i ka Haku ia Iesu;

76. A na ka Lunakahiko, a i ole, ke Kahuna e lawelawe ia mea; a mamuli o keia ano oia e lawelawe aku ai ia mea: E kukuli iho oia me ka Ekalesia a kahea aku i ka Makua me ka pule haahaa, i ka i ana—

77. E ke Akua, ka Makua Mau Loa, ke noi aku nei makou ia Oe ma ka inoa o Kau Keiki, o Iesu Kristo, e hoopomaikai a e hoolaa mai i keia berena i na uhane o ka poe a pau e ai ana ia mea, i ai ai lakou ma ka hoomanao i ke kino o Kau Keiki, a e hoike aku ia Oe, e ke Akua, ka Makua Mau Loa, e ae ana lakou e lawe maluna iho o lakou i ka inoa o Kau Keiki, a e hoomanao mau ia Ia, a e malama i Kana mau kauoha Ana i haawi mai ai ia lakou, i loaa mau ai ia lakou Kona Uhane e noho pu me lakou. Amene.

78. Ke ano o ka lawelawe ana i ka waina. E lalau aku no hoi oia i ke kiaha, a e i aku—

79. E ke Akua, ka Makua Mau Loa, ke noi aku nei makou ia Oe, ma ka inoa o Kau Keiki, o Iesu Kristo, e hoopomaikai a e hoolaa mai i keia waina i na uhane o ka poe a pau e inu ana ia mea, i hana ai lakou ia mea me ka hoomanao i ke koko o Kau Keiki i hookahe ia ai no lakou; i hoike aku ai lakou ia Oe, e ke Akua, ka Makua Mau Loa, e hoomanao mau ana lakou ia Ia, i loaa ai ia lakou Kona Uhane e noho pu me lakou. Amene.

80. O kekahi lala o ka Ekalesia e hana hewa ana, a i ole, i loaa iloko o kekahi hewa, e hooponopono ia aku no ia e like me ke kuhikuhi ana a na Palapala Hemolele.

81. He hana ia na kela a me keia apana o ka Ekalesia o Kristo, e hoouna aku i hookahi a oi aku paha o ko lakou mau Kumu e hele a noho ma kela a me keia huikuka e malama ia e na Lunakahiko o ka Ekalesia,

82. Me kekahi papa-inoa o kela a me keia lala i hoohui ia lakou iho me ka Ekalesia mahope mai o ka huikuka hope iho nei, a i ole, e hoouna aku ma ka lima o kekahi Kahuna, i malama ia ai he papa-inoa pololei o na inoa a pau o ka Ekalesia holookoa iloko o kekahi buke e kekahi o na Lunakahiko, ka mea hoi a na Lunakahiko e ae e koho ai ia manawa aku ia manawa aku;

83. A pela pu hoi, ina ua oki ia kekahi mai ka Ekalesia aku, i holoi ia ai ko lakou mau inoa mailoko ae o ka buke mookuauhau nui o ka Ekalesia.

84. O na lala a pau e nee aku ana mai ka apana o ka Ekalesia kahi a lakou e noho ana, ina e hele ana i kekahi apana o ka Ekalesia kahi a lakou i ike ole ia, ua hiki ke lawe i palapala e hooia ana he poe lala io lakou me ka nohona i aponoia, a e kakau-inoa ia ia palapala hooia e kekahi Lunakahiko a Kahuna paha, ina ua kamaaina ka lala e loaa ana ua palapala la me ua Lunakahiko la a Kahuna paha; i ole ia, ua hiki ke kakau-inoa ia ia mea e na Kumu, a i ole, na Diakona o ka Ekalesia.