1. He oiaio, he oiaio, ke olelo aku nei Au ia oukou, Owau ka Mea e olelo ana, oia hoi, ma ka leo o Kuu Uhane; oia hoi, ka Alepa a me ka Omega, ko oukou Haku a me ko oukou Akua;

2. E hoolohe mai, e oukou ka poe i haawi i ko oukou mau inoa e hele aku e hai i Kuu Euanelio, a e paipai i Kuu malawaina.

3. Aia hoi, ke olelo aku nei Au ia oukou, o Koʻu makemake ia e hele aku oukou a aole e kali, aole hoi e hoopalaleha, aka, e hana me ko oukou mau ikaika,

4. E hookiekie ana i ko oukou mau leo e like la me ke kani ana o kekahi pu, e hai ana i ka oiaio e like me ko na hoikeana a me na kauoha Aʻu i haawi aku ai ia oukou,

5. A pela iho la, ina e hooikaika a kupaa oukou e kaumaha auanei oukou me na pua palaoa he nui, a e hoolei ia me ka hanohano, a me ka nani, a me ka palaho ole, a me ke ola mau loa.

6. Nolaila, he oiaio, ke olelo aku nei Au i Kuu kauwa, ia Wiliama E. Makalelina, ke hoopau nei Au i ke komisina Aʻu i haawi aku ai ia ia e hele i na aina ma ka hikina,

7. A ke haawi aku nei Au ia ia he komisina hou a he kauoha hou, a iloko olaila Au, ka Haku, e ao ikaika nei ia ia no na ohumuhumu ana o kona naau;

8. A hana hewa iho la oia, eia no nae, ke kala aku nei Au ia ia, a ke i hou aku nei ia ia, e hele ae ma na aina o ka hema,

9. A e hele Kuu kauwa, o Luka Ioanekona, me ia a e hai aku i na mea Aʻu i kauoha aku ai ia laua,

10. E kahea ana i ka inoa o ka Haku no ka Uhane Kokua, ka Mea nana e ao ia laua i na mea a pau i kupono no laua,

11. E pule mau ana i maule ole ai laua, a ina e hana laua i keia, Owau pu no me laua a hiki aku i ka hopena.

12. Aia hoi, o keia ka makemake o ka Haku, kou Akua, e pili ana ia oukou. Pela io no. Amene.

13. A eia hou, he oiaio, penei wahi a ka Haku, e hele Kuu kauwa, o Oresona Haida, a me Kuu kauwa, o Samuela H. Kamika, i ko laua huakai hele ma na aina ma ka hikina, a e hai aku i na mea Aʻu i kauoha aku ai ia laua; a ina e hooikaika a kupaa laua, aia hoi, Owau pu no me laua a hiki aku i ka hopena.

14. A eia hou, he oiaio, ke olelo aku nei Au i Kuu kauwa, ia Laimana Ioanekona, a me Kuu kauwa, ia Oresona Parata, e hele no hoi laua ma ko laua huakai hele i na aina ma ka hikina; a aia hoi, Owau pu no me laua a hiki aku i ka hopena.

15. A eia hou, ke olelo aku nei Au i Kuu kauwa, ia Asa Dode, a me Kuu kauwa ia Kaveka Wilikona, e hele no hoi laua i ko laua huakai hele ma na aina ma ke komohana, a e hai i Kuu Euanelio, he oiaio, e like me Kaʻu i kauoha aku ai ia laua.

16. A o ka mea hooikaika a kupaa e lanakila auanei ma na mea a pau, a e hookiekie ia ae ma ka la hope.

17. A eia hou, ke olelo aku nei Au i Kuu kauwa ia Mekia N. Asale, a me Kuu kauwa, ia Bura Rige, e hele no hoi laua ma ko laua huakai hele i ka aina ma ka hema;

18. He oiaio, e hele lakou a pau i ko lakou huakai hele e like me Kaʻu i kauoha aku ai ia lakou, e hele ana mai kekahi hale a i kekahi hale, a mai kekahi taona a i kekahi taona, a mai kekahi kulanakauhale a i kekahi kulanakauhale;

19. A ma kela a me keia hale a oukou e komo ai, a hookipa mai lakou ia oukou, e waiho iho i ko oukou hoopomaikai maluna o kela hale;

20. A ma kela a me keia hale a oukou e komo ai, a hookipa ole mai lakou ia oukou, e hele koke aku oukou mai ia hale aku, a e lulu iho i ka lepo o ko oukou mau wawae i mea hoike kue ia lakou;

21. A e hoopiha ia oukou me ka olioli a me ka hauoli; a e hoomaopopo i keia, ma ka la o ka hookolokolo ana o oukou auanei na lunakanawai no ko ua hale la, a e hoahewa ia lakou;

22. A e aho no ka poe pegana i ka la hookolokolo mamua o ko ua hale la; nolaila, e kaei i ko oukou mau puhaka a e kupaa, a e lanakila auanei oukou ma na mea a pau, a e hookiekie ia ae ma ka la hope. Pela io no. Amene.

23. A eia hou, penei wahi a ka Haku ia oukou, e na Lunakahiko o Kuu Ekalesia, ka poe i haawi i ko oukou mau inoa i hoomaopopo ai oukou i Kona makemake e pili ana no oukou;

24. Aia hoi, ke olelo aku nei Au ia oukou, o ka hana ia o ka Ekalesia e kokua i ka malama ana i na ohana o ia poe, a pela no hoi, e malama i na ohana o ka poe i kahea ia a he pono e hoouna ia aku i ko ke ao nei e hai i ka Euanelio i ko ke ao nei;

25. No ia mea, ke haawi aku nei Au, ka Haku, ia oukou i keia kauoha, e loaa ia oukou i mau wahi no ko oukou mau ohana, ina e oluolu ko oukou mau hoahanau e hoohamama ae i ko lakou mau naau;

26. A o ka poe a pau o ia ano e hiki ke loaa na wahi no ko lakou mau ohana a me ka hoolakolako ana o ka Ekalesia no lakou, e hoohala ole i ka hele ana aku i ko ke ao nei, ina ma ka hikina, a i ole ma ke komohana, a i ole i ka akau, a i ole i ka hema;

27. E noi lakou a e loaa ia lakou, e kikeke a e wehe ia auanei no lakou, a e hoike ia mai mailuna mai, he oiaio, e ka Uhane Kokua, i kahi a lakou e hele ai.

28. A eia hou, he oiaio, ke olelo aku nei Au ia oukou, o kela a me keia kanaka i koi ia e hoolako i kona ohana ponoi, e hoolako no ia, a aole loa no hoi ia e nele i kona leialii, a e hana oia iloko o ka Ekalesia.

29. E hooikaika kela a me keia kanaka ma na mea a pau. A o ka mea palaualelo aole e loaa he wahi nona iloko o ka Ekalesia, ke ole oia e mihi a hooponopono i kona mau aoao.

30. No ia mea, e hele like Kuu kauwa o Simeona Kata, a me Kuu kauwa o Emera Hailaki, ma ka hana o ka Oihanakahuna;

31. A pela no hoi Kuu kauwa, o Ezera Tea, a me Kuu kauwa o Toma B. Maka;

32. A pela no hoi Kuu kauwa, o Hailama Kamika, a me Kuu kauwa, o Renola Kahuna;

33. A pela no hoi Kuu kauwa, o Daniela Kanetona, a me Kuu kauwa, o Simona Barunekona;

34. A pela no hoi Kuu kauwa, o Kiliveka Kamika, a me Kuu kauwa, o Gideona Kata;

35. A pela no hoi Kuu kauwa, o Rugela Emi, a me Kuu kauwa, o Setepano Baneta;

36. A pela no hoi me Kuu kauwa, o Mika B. Weletona, a pela no hoi me Kuu kauwa, o Edena Kamika. Pela io no. Amene.