1. He oiaio, Kaʻu e olelo aku nei ia oukou, e Kuu mau hoaloha, ke olelo aku nei Au ia oukou me Kuu leo, oia hoi, ka leo o Kuu Uhane, i hoike aku ai Au i Kuu makemake e pili ana i ko oukou mau hoahanau ma ka aina o Ziona, he nui wale o lakou i haahaa maoli, a e imi ikaika nei e ike i ka naauao, a e loaa ka oiaio.

2. He oiaio, he oiaio, Kaʻu e olelo aku nei ia oukou pomaikai ka poe o ia ano, no ka mea, e loaa ia lakou, no ka mea, ke hoike aku nei Au, ka Haku, i ke aloha i ka poe akahai a pau, a maluna o ka poe a pau Aʻu i makemake ai, i hoapono ia ai Au i ka wa Aʻu e lawe mai ai ia lakou i ka hookolokolo ana.

3. Aia hoi, ke olelo aku nei Au ia oukou, e pili ana i ke kula ma Ziona, he oluolu loa Au, ka Haku, no ka loaa ana he kula ma Ziona, a pela pu me Kuu kauwa me Pale P. Parata, no ka mea, ke kupaa nei oia iloko Oʻu;

4. A e like me kona hoomau ana e kupaa iloko Oʻu, pela oia e hoomau ai i ka hoomalu ana maluna o ke kula ma ka aina o Ziona, a hiki i Koʻu haawi ana aku ia ia i mau kauoha hou ae;

5. A e hoopomaikai no Au ia ia me na hoopomaikai he lehulehu, ma ka wehewehe ana i na Palapala Hemolele a pau a me na mea pohihihi no ka hoonaauao ana i ke kula, a me ka Ekalesia ma Ziona;

6. A i ke koena aku o ke kula, ua oluolu Au ka Haku e hoike aku i ke aloha, aka nae, aia kekahi poe e ao ikaika ia e pono ai, a e hoike ia ae ka lakou mau hana.

7. Ua waiho ia ke koi ma ke kumu o na laau, a o kela a me keia laau e hoohua ole mai ana i ka hua maikai, e kua ia no ia i lalo a hoolei ia iloko o ke ahi: Owau, ka Haku, ka i olelo ia mea.

8. He oiaio, ke olelo aku nei Au ia oukou, o ka poe a pau mawaena o lakou i maopopo he naau hoopono ko lakou, a haahaa hoi, a mihi ko lakou mau uhane, a makemake e hooko i ka lakou berita ma o ka mohai la; he oiaio, ma kela a me keia mohai Aʻu, a ka Haku, e kauoha ai, ua apono ia ia mau mea a pau e Aʻu.

9. No ka mea, Naʻu, na ka Haku, e kena a hoohua mai lakou me he laau hua nui la i kanu ia iloko o kekahi aina maikai, ma kapa o kekahi muliwai maemae, e hoohua mai ana i na hua makamae he nui.

10. He oiaio, ke olelo aku nei Au ia oukou, o Koʻu makemake ia e kukulu ia i hale Noʻu ma ka aina o Ziona, e like me ke ano Aʻu i haawi aku ai ia oukou;

11. He oiaio, e kukulu koke ia ia ma o ka waiwai hapaumi la o Kuu poe kanaka:

12. Aia hoi, o keia ka waiwai hapaumi a me ka mohai Aʻu, a ka Haku, i koi ai ma ko lakou mau lima, i kukulu ia ai i hale Noʻu no ka hoola ia ana o Ziona.

13. I wahi hoomaikai no ka Poe Hoano a pau, a i wahi e ao ai i ka poe a pau i kahea ia no ka hana iloko o ka Oihanakahuna ma ko lakou mau hana like ole a pau i kahea ia ai, a mau oihana hoi,

14. I hoohemolele ia ai lakou i ka hoomaopopo ana i ka lakou hana ma ka Oihanakahuna—ma ka manao, ma ke kumupaa, a ma ka loina—ma na mea a pau e pili ana i ke aupuni o ke Akua ma ka honua, o na ki o ia aupuni ka i hooili ia maluna o oukou.

15. A, ina e kukulu Kuu poe kanaka i hale Noʻu ma ka inoa o ka Haku, a ae ole aku i kekahi mea haumia e komo iloko ona, i ole e hoohaumia ia, e kau no Koʻu nani maluna iho olaila;

16. He oiaio, Owau pu no malaila, no ka mea, e komo aku ana Au iloko ona a o ka poe a pau i maemae ma ka naau e komo ana iloko ona, e ike no lakou i ke Akua;

17. Aka, ina e hoohaumia ia ia aole Au e komo ana iloko olaila, a aole no hoi Koʻu nani malaila, no ka mea, aole Au e komo ana iloko o na luakini hemolele ole.

18. A, ano, aia hoi, ina e hana o Ziona i keia mau mea e holomua no ia, a hoakea ia ia iho a lilo i mea nani loa, nui loa, a weliweli loa hoi.

19. A e hoomaikai na lahuikanaka o ka honua ia ia, a e olelo aku, He oiaio, o Ziona ke kulanakauhale o ko kakou Akua, a he oiaio, aole e hiki ia Ziona ke haule, aole hoi e hoonee ia mai kona wahi aku, no ka mea, aia ke Akua malaila, a aia ka lima o ka Haku malaila.

20. A ua hoohiki Oia ma ka mana o Kona ikaika, e lilo i hoola nona a i hale-kiai kiekie nona;

21. Nolaila, he oiaio, wahi a ka Haku, e hauoli o Ziona, no ka mea, o keia o Ziona—KA POE MAEMAE MA KA NAAU; nolaila, e hauoli o Ziona, oiai ka poe hana hewa a pau e kanikau ana;

22. No ka mea, aia hoi, e hiki koke mai no ka hoopai ana maluna o ka poe aia me he puahiohio la, a owai ke pakele ia mea?

23. E pahola ka ka Haku hahau ana ma ka po a ma ke ao, a e hoopilikia ka lono o ia mea i na kanaka a pau, aka nae, aole ia e hoopau ia a hiki mai ka Haku;

24. No ka mea, ua hoaa ia ka inaina o ka Haku no ka lakou mau hana hoopailua, a me ka lakou mau hana hewa a pau;

25. Eia nae, e pakele auanei o Ziona, ke makaala oia e hana i na mea a pau Aʻu i kauoha aku ai ia ia,

26. Aka, ina aole oia e makaala e hana i kela me keia mea Aʻu i kauoha aku ai ia ia, e hoopai no Au ia ia mamuli o ke ano o kana mau hana a pau, me na popilikia eha, me na mai lele, me na mai ahulau, me ka pahikaua, me ka inaina, me ke ahi e hoopau ana;

27. Aka nae, e heluhelu ia keia iloko o kona mau pepeiao i hookahi manawa wale no, ua apono Au, ka Haku, i kona mohai, a, ina e hana hewa hou ole oia, aole kekahi o keia mau mea e kau mai maluna ona,

28. A e hoopomaikai no Au ia ia me na pomaikai, a hoonui aku a lehulehu na pomaikai maluna ona, a maluna o kana mau hanauna no ka wa mau loa a mau loa, wahi a ka Haku, ko oukou Akua. Amene.