1. Aia hoi, ke olelo aku nei Au ia oe, e Oliva, i kekahi mau olelo kakaikahi. Aia hoi, ua pomaikai oe, a aole malalo o ka hoahewa ia. Aka, e ao o haaheo, o komo auanei oe iloko o ka hoowalewale ia mai.

2. E hoike i kau oihana i ka Ekalesia, a imua o ko ke ao nei no hoi, a e wehe ia kou naau e hai i ka oiaio mai keia wa aku a mau loa aku. Amene.

3. Aia hoi, ke olelo aku nei Au ia oe, e Hailama, i kekahi mau olelo kakaikahi: no ka mea, aole no hoi oe malalo o ka hoahewa ia, a o kou naau ua hamama, a o kou elelo ua wehe ia; a o kau oihana oia no ke kauleo ana, a me ka hooikaika mau ana i ka Ekalesia. No ia mea, o kau hana aia no ia i ka Ekalesia a mau loa, a o keia mamuli o kou ohana. Amene.

4. Aia hoi, ke olelo aku nei Au i kekahi mau olelo kakaikahi ia oe, e Samuela, no ka mea, aole no hoi oe malalo o ka hoahewa ia, a o kau oihana oia no ke kauleo ana a me ka hooikaika ana i ka Ekalesia, a aole nae oe i kahea ia i keia wa e hai aku imua o ko ke ao nei. Amene.

5. Aia hoi, ke olelo aku nei Au i kekahi mau olelo kakaikahi ia oe, e Iosepa, no ka mea, aole no hoi oe malalo o ka hoahewa ia, a o kau oihana hoi oia no ke kauleo ana, a me ka hooikaika ana i ka Ekalesia, a o keia kau hana mai keia manawa aku a mau loa. Amene.

6. Aia hoi, ke hoike nei Au ia oe, e Iosepa Naita, ma keia mau olelo, e hapai oe i kou kea e pono ai, a ma ia mea e pule oe me ka leo imua o ko ke ao nei e pono ai, e like me ia ma kahi malu, a iloko o kou ohana, a mawaena o kou mau hoaloha, a ma na wahi a pau.

7. A, aia noi, he hana pono nau e komo iloko o ka Ekalesia oiaio, a e haawi i kau olelo ma ke kauleo mau ana, i loaa ai ia oe ka uku o ka paahana. Amene.