1. He oiaio, penei wahi a ka Haku i Kaʻu kauwa ia Wiliama Mareko, a pela no hoi i Kaʻu kauwa, ia N. K. Witine, e hooponopono koke ae laua i ko laua oihana kalepa a e hele mai i ka aina o Ketalana aku, mamua o Koʻu, ko ka Haku, hoouna hou ana aku i ka hau maluna o ka aina;

2. E ala ae laua, a e ku, a e hele mai, a mai kakali, no ka mea, ke kauoha nei Au, ka Haku, ia mea;

3. Nolaila, ina e kakali laua aole ia he pono ia laua.

4. E mihi laua i ko laua mau hewa a pau, a me ko laua mau makemake kuko, imua Oʻu, wahi a ka Haku, no ka mea, heaha ia mea he waiwai Iaʻu, wahi a ka Haku?

5. A e hoolilo ia na waiwai o Ketalana no ka uku ana i na aie, wahi a ka Haku. E kuu aku ia mau mea, wahi a ka Haku, a o ka mea e koe iho ana, e waiho ia ia iloko o kou mau lima, wahi a ka Haku;

6. No ka mea, aole anei Noʻu na manu o ka lewa, a pela no hoi na ia o ke kai, a me na holoholona o na mauna? Aole anei Naʻu ka honua i hana? Aole anei i paa Iaʻu na hopena o na puali kaua a pau o na lahuikanaka o ka honua?

7. Nolaila, aole anei Au e kena ana i na wahi oneanea a opuu a hoomohala mai lakou i na pua, a e hoohua mai a nui, wahi a ka Haku?

8. Aole anei he mau wahi i lawa maluna o na mauna o Adamu-onadai-Amana, a maluna hoi o na kula o Olaha Sineha, a i ole, ka aina kahi i noho ai o Adamu, i kuko ole ai oe i ka mea he wahi kulu wale no, a aole e nana ole i na mea oi aku o ke koikoi?

9. Nolaila, e hele mai ianei i ka aina o Kuu poe kanaka, oia hoi, i Ziona.

10. E malama pono Kuu kauwa, o Wiliama Mareko, i na mea uuku, a e lilo oia i luna maluna o na mea he nui. E noho hoomalu oia iwaena o Kuu poe kanaka iloko o ke kulanakauhale o Komohana Mamao, a e hoopomaikai ia oia me na pomaikai o Kuu poe kanaka.

11. E hilahila Kuu kauwa, o N. K. Witine, i ka hui Nikolatine a me ka lakou mau hana huna hoopailua a pau, a me kona ano haiki ma ka uhane imua Oʻu, wahi a ka Haku, a e pii mai i ka aina o Adamu-onadai-Amana, a e lilo i Bihopa no Kuu poe kanaka, wahi a ka Haku, aole ma ka inoa, aka, ma ka hana maoli no, wahi a ka Haku.

12. A eia hou, ke olelo nei Au ia oe, ke hoomanao nei Au i Kuu kauwa, ia Oliva Karenega, aia hoi, he oiaio, ke olelo aku nei Au ia ia, e malama ia ana kona inoa me ka hoomanao laahia ia ana mai ia hanauna aku ia hanauna aku, no ka wa mau loa a mau loa, wahi a ka Haku.

13. Nolaila, e paio ikaika oia no ka hoolapanai ia ana o ka Papa Peresidena o Kuu Ekalesia, wahi a ka Haku, a i kona wa e haule ai, e ala hou ae no ia, no ka mea, e oi aku ana ka laahia o kona mohai Iaʻu nei, mamua o kona hoomahuahua ana, wahi a ka Haku;

14. Nolaila, e pii koke mai oia ianei, i ka aina o Ziona, a i ka wa kupono e lilo oia i mea kalepa ma Koʻu inoa, no ka pomaikai o Koʻu poe kanaka, wahi a ka Haku;

15. Nolaila, mai hoowahawaha kekahi kanaka i Kuu kauwa, ia Oliva Karenega, aka, e kau mai na hoopomaikai ana o Kuu poe kanaka maluna ona no ka wa mau loa a mau loa.

16. A eia hou, he oiaio, ke olelo aku nei Au ia oukou, e hoomanao Kuu mau kauwa a pau ma ka aina o Ketalana i ka Haku, ko lakou Akua, a me Koʻu hale pu no hoi, e malama a e hoomau ia mea i hemolele, a e hookahuli i na poe hoopukapuka dala ma Koʻu manawa kupono, wahi a ka Haku. Pela io no. Amene.