1. A olelo mai la ka Haku iaʻu, e Ioane, Kaʻu mea i aloha nui ia, heaha kau i makemake ai? No ka mea, ina e nonoi mai oe, e like me kau i makemake ai, e haawi ia aku no ia ia oe.

2. A olelo aku la au ia Ia, e ka Haku, e haawi mai iaʻu i ka mana maluna o ka make, i ola ai au a e lawe mai i na uhane i Ou la.

3. A olelo mai la ka Haku iaʻu, he oiaio, he oiaio, ke olelo aku nei Au ia oe, mamuli o kou makemake ana i keia e kali no oe a hiki i Koʻu hiki ana mai iloko o Koʻu nani, a e wanana imua o na lahui, na ohana, na olelo a me na kanaka.

4. A no keia kumu i olelo aku ai ka Haku ia Petero, Ina e makemake Au e kali oia a hiki mai Au, he mea aha ia ia oe? no ka mea, ua nonoi mai oia Iaʻu e hiki ai ia ia ke lawe mai i na uhane i Oʻu nei, aka o kou makemake e hiki ia oe ke hiki koke mai i Oʻu nei iloko o Koʻu aupuni.

5. Ke olelo nei Au ia oe, e Petero, he makemake maikai keia, aka ua makemake Kaʻu mea i aloha nui ia e hiki ia ia ke hana a oi aku, a i ole i hana i nui ae mawaena o na kanaka mamua o kana i hana ai mamua;

6. Ae, ua hoao oia i kekahi hana i nui ae, nolaila, e hoolilo Au ia ia me he ahi lapalapa la, a i anela lawelawe hoi: e lawelawe auanei oia no ka poe e lilo aku ana i mau hooilina o ke ola mau loa, ka poe e noho ana maluna o ka honua:

7. A e hoolilo aku Au ia oe e lawelawe nona a no kou hoahanau o Iakobo; a ia oukou ekolu Au e haawi aku ai i keia mana a me na ki o keia hana o ka Oihanakahuna a hiki i Koʻu hiki ana mai.

8. He oiaio, ke olelo aku nei Au ia olua, e loaa ia olua e like me ko olua mau makemake, no ka mea, ke hauoli nei olua iloko o ka mea a olua i makemake ai.