1. E hoolohe mai Iaʻu, wahi a ka Haku kou Akua, a e olelo aku no Au i Kuu kauwa ia Eluene Paterige, a e haawi aku ia ia na kuhikuhi ana, no ka mea, he mea ia e pono ai e loaa ia ia na kuhikuhi ana i ke ano o ka hoonohonoho ana i keia poe kanaka;

2. No ka mea, he mea e pono ai e hoonohonoho ia lakou e ku i Kuu mau kanawai—ina ma kekahi ano e ae, e oki ia aku lakou;

3. No ia mea, e haawi Kaʻu kauwa o Eluene Paterige, a me ka poe ana i wae ai, ka poe hoi Aʻu i olioli loa ai, i keia poe kanaka i ko lakou mahele, e likealike ko kela a me keia kanaka, e like me ka nui o kona ohana, mamuli o kona lako a nele paha, a me kona mau hemahema a nele hoi.

4. A na Kaʻu kauwa o Eluene Paterige, ma ka wa ana e haawi aku ai i kekahi kanaka i kona hapa, e haawi pu i kekahi palapala e hookuleana ana ia ia i kona hapa, a e paa oia ia mea, oia hoi, o keia kuleana a me keia hooilina iloko o ka Ekalesia, a hiki i kana hana hewa ana a manao ia he kupono ole ma o ka leo la o ka Ekalesia, e noho iloko o ka Ekalesia, i ku like me na kanawai a me na berita o ka Ekalesia;

5. A ina e hana hewa oia a manao ia aohe kupono e noho iloko o ka Ekalesia, aole ona mana e koi i kela hapa ana i hoolaa aku ai i ka Bihopa no ka poe hune a me ka poe nele o Kuu Ekalesia; nolaila, aole oia e paa hou aku i ka haawina, aka, he kuleana wale no kona maluna o kela hapa i hoolilo ia aku ia ia ma ka palapala sila.

6. A pela na mea a pau e hana ia ai a paa, i ku i na kanawai o ka aina.

7. A o ka waiwai o keia poe kanaka e hookaawale ia no keia poe kanaka;

8. A o ke dala i waiho ia no keia poe kanaka, e koho ia i agena no keia poe kanaka, e lawe i ke dala e hoolako i ka ai a me na aahu, e like me ka nele o keia poe kanaka.

9. A e hana kela a me keia kanaka me ka hoopono a e likealike mawaena o keia poe kanaka, a e loaa likealike, i hookahi ai oukou, he oiaio, e like me Kaʻu i kauoha aku ai ia oukou.

10. A o ka waiwai o keia poe kanaka aole e lawe ia a haawi ia aku ia i ka poe o kekahi apana okoa aku o ka Ekalesia;

11. No ia mea, ina e loaa i kekahi apana o ka Ekalesia ke dala mai keia apana aku o ka Ekalesia, e uku hou mai lakou i keia apana o ka Ekalesia e like me ka lakou e ae-like ai;

12. A e hana ia keia ma o ka Bihopa la a agena paha e koho ia ana ma o ka leo la o ka Ekalesia.

13. A eia hou, e koho ka Bihopa i hale hoahu no keia Ekalesia, a o na waiwai a pau ma ke dala a me na mea ai, i oi aku mamua o ka lawa no ka nele o keia poe kanaka, e malama ia iloko o na lima o ka Bihopa.

14. A e hookoe no hoi oia nona iho, no kona mau hemahema ponoi, a no na hemahema o kona ohana, oiai e paa ana oia ma ka hana ana i keia hana.

15. A pela Au e haawi aku nei i keia poe kanaka i kekahi kuleana e hoonohonoho ia lakou iho e like me Kuu mau kanawai;

16. A ke hoolaa nei Au i keia aina no lakou no ka manawa pokole, a hiki i ka wa Aʻu, ka Haku, e hoolako ai no lakou ma kekahi ano okoa ae, a kauoha aku ia lakou e hele mai nei aku;

17. A o ka hora a me ka la aole i haawi ia ia lakou, no ia mea, e hana lakou maluna o keia aina, me he mea la, no kekahi mau makahiki, a e hoi hou mai no keia io lakou la no ko lakou pomaikai.

18. Aia hoi, e lilo keia i kumu hoohalike i Kaʻu kauwa ia Eluene Paterige, ma na wahi okoa ae, ma na apana a pau o ka Ekalesia.

19. A o ka mea e ike ia ana he kahu malama waiwai kupaa, a pololei, a naauao, e komo auanei ia iloko o ka hauoli o kona Haku, a e loaa ke ola mau loa.

20. He oiaio, ke olelo aku nei Au ia oe, Owau no o Iesu Kristo, ka Mea e hiki koke mai ana, ma kekahi hora au e manao ole ai. Pela io no. Amene.