1. Ka olelo a me ka makemake o ka Haku e pili ana i ka Huakai o Iseraela iloko o ka lakou mau kaahele ana i ke Komohana.

2. E hoonohonoho ia na kanaka a pau o ka Ekalesia o Iesu Kristo o ka Poe Hoano o na La Hope nei a me ka poe e kaahele pu ana me lakou, iloko o na puali, me kekahi berita a olelo-paa e malama i na kauoha a me na kanawai a pau a ka Haku ko kakou Akua.

3. E kukulu ia na puali me na kapena no na haneri, na kapena no na kanalima, a me na kapena no na umi, me kekahi Peresidena a me kona mau hoakuka elua ma ko lakou poo, malalo o ke kuhikuhi ana o na Aposetolo Umikumamalua;

4. A o keia ka kakou berita, e hele kakou iloko o na lawelawe-paa a pau o ka Haku.

5. E hoolako kela a me keia puali ia lakou iho me na paa holoholona huki kaa, na kaa, na mea ai, ka aahu, a me na mea e ae a pau e pono ai, e hiki ana ia lakou ke loaa no ka huakai hele;

6. Aia a hoonohonoho ia na puali, e hana aku lakou me ko lakou ikaika e hoomakaukau no ka poe e kakali iho ana.

7. E hooholo kela a me keia puali me ko lakou mau kapena a me na peresidena i ka nui o ka poe e hele ana i keia kupulau ae; alaila, e wae aku i heluna kupono o na kanaka kino ikaika a loea hoi, e lawe i na holoholona, na anoano, a me na mea hana mahiai, a e hele aku ma ke ano paionia e hoomakaukau no ke kanu ana i na mea kanu o ke kupulau.

8. E auamo like kela a me keia puali ma ka lawe ana i ka poe ilihune, na wahinekanemake, na keiki makua ole, a me na ohana o ka poe i komo iloko o ka pualikaua, i kulike me ka mea i loaa ia lakou mai ko lakou mau waiwai mai, i pii ole mai ai na uwe ana a na wahinekanemake a me na keiki makua ole iloko o na pepeiao o ka Haku e kue i keia poe kanaka.

9. E hoomakaukau kela a me keia puali i mau hale, a me na mahinaai, no ka hooulu ana i na mea ai, no ka poe e noho ana ihope i keia kau, a o keia ka makemake o ka Haku e pili ana i Kona poe kanaka.

10. E hoohana kela a me keia kanaka i kona mana a me kona waiwai a pau no ka lawe ana aku i keia poe kanaka i ka wahi a ka Haku e kukulu ai i Mahele-aina no Ziona;

11. A ina e hana oukou i keia me ka naau maemae, me ke kupaa loa, e hoopomaikai ia oukou; e hoopomaikai ia oukou iloko o ko oukou mau pu-a hipa, a iloko o ko oukou mau pu-a bipi, a iloko o ka oukou mau mahinaai, a iloko o ko oukou mau hale, a iloko o ko oukou mau ohana.

12. E kukulu ae Kaʻu mau kauwa o Ezera T. Benesona a me Eratusa Ka-no i kekahi puali;

13. E kukulu ae Kaʻu mau kauwa o Oresona Parata a me Wilifoda Wuderufa i kekahi puali.

14. A e kukulu ae no hoi Kaʻu mau kauwa o Amasa Laimana a me Keoki A. Kamika i kekahi puali;

15. A e koho i mau peresidena, a me na kapena no na haneri, a no na kanalima, a no na umi,

16. A e hele Kaʻu poe kauwa i koho ia a e hai aku i keia, Koʻu makemake, i ka Poe Hoano, i makaukau ai lakou e hele aku i kekahi aina o ka maluhia.

17. E hele ma ko oukou ala a hana e like me Kaʻu i olelo aku ai ia oukou, a mai makau i ko oukou poe enemi; no ka mea, aohe e loaa ana ia lakou ka mana e kaohi i Kaʻu hana.

18. E hoolapanai ia ana o Ziona iloko o Koʻu wa kupono,

19. A ina e imi kekahi kanaka e hookiekie ia ia iho, a aole e imi mai i Kaʻu ao ana, aole e loaa ia ia ka mana, a e hoike ia auanei kona lapuwale.

20. E imi oukou a e malama i na aelike-paa a pau a oukou kekahi me kekahi, a mai kuko i ka mea a kou hoahanau.

21. E malama ia oukou iho mai ka ino o ka hoopuka wale ana i ka inoa o ka Haku me ke kumu ole, no ka mea, Owau no ka Haku ko oukou Akua, oia hoi, ke Akua o ko oukou poe kupuna, ke Akua o Aberahama, a o Isaaka, a o Iakoba.

22. Owau no ka Mea Nana i alakai i na keiki a Iseraela mailoko aku o ka aina o Aigupita, a ua hohola ia aku Kuu lima ma na la hope e hoola i Kuu poe kanaka o Iseraela.

23. E hooki i ka paio ana kekahi me kekahi, e hooki i ka olelo ino ana kekahi no kekahi.

24. E hooki i ka ona ana, a e lilo ka oukou mau olelo i mea e hoonaauao ai kekahi i kekahi.

25. Ina e aie oe i kou hoalauna, e hoihoi aku oe i ka mea au i aie ai; a i hiki ole ia oe ke hookaa, alaila e hele pololei aku a hai i kou hoalauna, o hoohewa mai kela ia oe.

26. Ina e loaa ia oe ka mea i nalowale o kou hoalauna, e imi ikaika oe a hiki i kou hoihoi ana aku ia mea ia ia.

27. E hooikaika oe ma ka malama ana i ka mea i loaa ia oe, i lilo ai oe i kahu malama waiwai naauao; no ka mea, he haawina manawalea ia na ka Haku, kou Akua, a o oe Kona kahu malama waiwai.

28. Ina he hauoli oe, e hoonani aku i ka Haku me ke mele ana, me na mea kani, me ka hulahula ana, a me ka pule hoonani a hoomaikai hoi.

29. Ina he luuluu oe, e hea aku i ka Haku kou Akua me ka nonoi haahaa ana i hauoli ai kou uhane.

30. Mai makau i ko oukou poe enemi, no ka mea, eia lakou iloko o Koʻu mau lima, a e hana aku Au ia lakou e like me Koʻu makemake.

31. E hoao ia Koʻu poe kanaka ma na mea a pau e pono ai, i hoomakaukau ia ai lakou e hookipa mai i ka nani Aʻu e paa nei no lakou, oia hoi, ka nani o Ziona, a o ka mea e hoomanawanui ole i ka hoao ana, aole oia i kupono no Kuu aupuni.

32. O ka mea naaupo e imi oia i ka naauao ma ka hoohaahaa ana ia ia iho a me ke kahea ana i ka Haku, kona Akua, i wehe ia ai kona mau maka i ike ai oia, a hoohamama ia kona mau pepeiao i lohe ai oia,

33. No ka mea, ua hoouna ia Koʻu Uhane iloko o ke ao nei e hoonaauao i ka poe haahaa a mihi, a no ka hoahewa ana i ka poe hoomaloka.

34. Ua hoole mai ko oukou poe hoahanau ia oukou a me ka oukou olelo hoike, oia hoi, ka lahuikanaka nana oukou i kipaku aku;

35. A ano, ke hiki mai nei ka la o ko lakou popilikia, oia hoi, na la o ka luuluu, e like me ka wahine e haakohi ana; a e nui auanei ko lakou luuluu ana ke ole lakou e mihi koke; he oiaio, me ka awiwi loa;

36. No ka mea, ua pepehi lakou i na Kaula, a me ka poe i hoouna ia aku io lakou la, a ua hookahe lakou i ke koko hala ole, ka mea e kahea mai nei mai ka lepo mai e kue ana ia lakou:

37. Nolaila, mai kahaha no keia mau mea, no ka mea, aole oukou i maemae; aole e hiki ia oukou ke hoomanawanui i Koʻu nani i keia wa; aka, e ike ana oukou ia mea, ina e kupaa oukou ma ka malama ana i Kaʻu mau olelo a pau Aʻu i haawi aku ai ia oukou mai na la o Adamu a hiki ia Aberahama; mai ia Aberahama a hiki ia Mose; mai ia Mose a hiki ia Iesu a me Kona mau Aposetolo; a mai ia Iesu a me Kona mau Aposetolo a hiki ia Iosepa Kamika, ka mea Aʻu i hea aku ai ma o Koʻu poe anela la, Kaʻu poe kauwa lawelawe; a ma Koʻu leo ponoi mailoko mai o na lani, e hoopuka mai i Kaʻu hana,

38. A o ke kahua o ua hana la kana i hookumu ai, a ua kupaa, a lawe mai la Au ia ia Ioʻu nei.

39. He nui ka poe i pahaohao mamuli o kona make ana, aka he mea ia e pono ai e sila oia i kana hoike me kona koko, i hoomaikai ia ai oia a i hoohewa ia ai ka poe hewa.

40. Aole anei Au i hoopakele ia oukou mai ko oukou poe enemi mai, koe wale no ma ka mea Aʻu i waiho ai i hoike no Kuu inoa?

41. Nolaila, ano, e hoolohe mai oukou, e na kanaka o Kuu Ekalesia; a o oukou e na Lunakahiko, e hoolohe pu mai; ua loaa ia oukou Kuu aupuni.

42. E hooikaika ma ka malama ana i Kaʻu mau kauoha a pau, o hiki mai auanei ka hoopai maluna o oukou, a e haule pu ko oukou manaoio, a e lanakila mai ko oukou poe enemi maluna o oukou.—Nolaila, aole mea hou aku i keia wa. Amene, a Amene.