1. E hoolohe i ka leo o ka Haku kou Akua, oiai Au e olelo aku ana ia oe, e Ema Kamika, Kaʻu kaikamahine, no ka mea, he oiaio, Kaʻu e olelo aku nei ia oe, o ka poe a pau e hoolohe ana i Kuu Euanelio he mau keikikane a he mau kaikamahine lakou iloko o Kuu aupuni.

2. He Hoikeana Kaʻu e haawi aku nei ia oe e pili ana i Koʻu makemake, a ina e kupaa oe a hele ma na ala o ka maemae imua Oʻu, e malama no Au i kou ola, a e loaa ia oe he hooilina ma Ziona.

3. Aia hoi, ua kala ia kou mau hewa, a he wahine oe i wae ia, ka mea Aʻu i kahea ai.

4. Mai ohumu no na mea au i ike ole ai, no ka mea, ua aua ia ia mau mea mai ia oe mai a mai ko ke ao nei hoi, a he naauao ia iloko Oʻu i kekahi manawa e hiki mai ana.

5. A o ka hana o kau oihana no ka hooluolu ana no ia i Kaʻu kauwa, ia Iosepa Kamika, opio, kau kane, me na olelo oluolu iloko o ka uhane haahaa, iloko o kona mau popilikia.

6. A e hele pu oe me ia i ka wa o kona hele ana, a e lilo oe i mea kakau nana, oiai, aole mea e ae e kakau nana, i hiki ai Iaʻu ke hoouna i Kuu kauwa, ia Oliva Kaudare, ma kahi Aʻu e makemake ai.

7. A e hoolilo ia oe malalo o kona lima e hoakaka i na Palapala Hemolele, a e kauleo i ka Ekalesia, e like me ia e haawi ia aku ana ia oe e Koʻu Uhane;

8. No ka mea, e kau no ia i kona mau lima maluna ou, a e loaa ia oe ka Uhane Hemolele, a e hoolilo ia kou manawa ma ke kakau ana, a ma ka huli nui ana i ka ike.

9. A aole ou kumu e makau ai, no ka mea, na kau kane e malama ia oe iloko o ka Ekalesia; no ka mea, io lakou la kona kahea ia ana, i hiki ai na mea a pau ke hoike ia aku ia lakou, e like me ka mea Aʻu i makemake ai, mamuli o ko lakou manaoio.

10. A he oiaio, Kaʻu e olelo aku nei ia oe, e waiho aku oe i na mea o keia ao, a e imi no na mea o ke ao i oi ae ka maikai.

11. A e haawi ia aku no hoi ia oe e wae i na himeni hoano e like me ia e haawi ia aku ana ia oe, na mea hoi Aʻu i oluolu ai, e loaa ma Kuu Ekalesia;

12. No ka mea, ke hauoli nei Koʻu Uhane iloko o na mele o ka naau, he oiaio, o ke mele o ka poe pono he pule ia Iaʻu, a e pane ia aku auanei ia me ka pomaikai maluna o ko lakou mau poo.

13. No ia mea, e hapai ae i kou naau a e hauoli, a e puili i na berita au i hana ai.

14. E hoomau iloko o ka uhane o ka haahaa, a e ao o haaheo. E hauoli kou uhane iloko o kau kane a me ka nani e hiki mai ana maluna ona.

15. E malama mau i Kaʻu mau kauoha, a e loaa ia oe he lei o ka pono. A ke ole oe e hana i keia, aole e hiki ia oe ke hiki mai ma kahi Aʻu e noho nei.

16. A he oiaio, he oiaio, ke olelo aku nei Au ia oe, o keia Kaʻu leo i na mea a pau. Amene.