1. E hoolohe, e na kanaka e kaena ana i Koʻu inoa, wahi a ka Haku ko oukou Akua, no ka mea, aia hoi, ua hoaa ia Koʻu inaina e kue i ka poe kipikipi, a e ike auanei lakou i Koʻu lima a me Koʻu ukiuki, i ka la o ka hoopai ana a me ka inaina maluna o na lahuikanaka.

2. A o ka mea aole e kaikai ana i kona kea a hahai mai Iaʻu a malama i Kaʻu mau kauoha, aole ia e hoola ia.

3. Aia hoi, ke kauoha nei Au, ka Haku, a o ka mea e hoolohe ole ana e oki ia aku auanei oia ma Koʻu manawa kupono, mahope iho o Koʻu kauoha ana, a me ka uhaki ia ana o ke kauoha;

4. No ia mea, Naʻu, na ka Haku, e kauoha a e hoopau ia mea, e like me Kaʻu i manao ai he pono; a o ua mau mea nei a pau e hooko ia maluna o na poo o ka poe kipi, wahi a ka Haku;

5. No ia mea, ke hoopau nei Au i ke kauoha i haawi ia i Kaʻu mau kauwa o Toma B. Maka a me Ezera Tea, a haawi i kekahi kauoha hou i Kaʻu kauwa, ia Toma, e hele koke aku oia i kona huakai hele, i ka aina o Misouri, a o Kaʻu kauwa o Sila J. Giripine, e hele pu no hoi me ia;

6. No ka mea, aia hoi, ke hoopau nei Au i ke kauoha i haawi ia i Kaʻu mau kauwa ia Sila J. Giripine, a me Nuela Naita, mamuli o ka ai-oolea o Koʻu poe kanaka ma Tomekona, a no ko lakou kipi ana.

7. No ia mea, e noho Kuu kauwa o Nuela Naita me lakou, a e like me ka nui e makemake ana e hele e hele no, oia hoi, ka poe mihi imua Oʻu, a e alakai ia e ia i ka aina Aʻu i koho aku ai.

8. A eia hou, he oiaio, ke olelo aku nei Au ia oukou, e mihi Kaʻu kauwa o Ezera Tea no kona haaheo e pono ai, a no kona alunu, a e hoolohe i ke kauoha mua Aʻu i haawi aku ai ia ia e pili ana i kahi ana e noho nei;

9. A ina e hana oia i keia, oiai aohe he mau mahelehele ana e hana ia ana maluna o ka aina, e mau no kona koho ia ana e hele i ka aina o Misouri;

10. A i ole ia, e loaa ia ia ke dala ana i uku ai, a e haalele ia wahi, a e oki ia mailoko aku o Kuu Ekalesia, wahi a ka Haku ke Akua o na lehulehu;

11. A oiai e lilo aku ka lani a me ka honua, aole e lilo aku keia mau olelo, aka, e hooko ia no.

12. A ina he pono no Kuu kauwa o Iosepa Kamika, opio, e uku i ke dala, aia hoi, Naʻu, na ka Haku, e uku hou aku ia ia ma ka aina o Misouri, i uku hou ia aku ai ka poe nana mai kana, e like me ka mea a lakou e hana ai;

13. No ka mea, e like me ka mea a lakou e hana ai, pela no e loaa ai ia lakou, he oiaio, o na aina no ko lakou hooilina.

14. Aia hoi, penei wahi a ka Haku i Koʻu poe kanaka, he nui na mea a oukou e hana ai a e mihi ai; no ka mea, aia hoi, ua pii mai ko oukou mau hewa Ioʻu nei, a aole i kala ia, no ka mea, ke imi nei oukou e ao e like me ko oukou mau aoao ponoi iho.

15. A aole na ko oukou mau naau. A aole o oukou i hoolohe i ka oiaio, aka, ua lealea iloko o ka pono ole.

16. Auwe oukou, e na kanaka waiwai, ka poe e haawi ole ana i ko oukou waiwai i ka poe ilihune, no ka mea, e aai ko oukou mau waiwai i ko oukou mau uhane; a o keia ko oukou kumakena ana ma ka la hoopai, a me ka hookolokolo ana, a me ka ukiuki—Ua hala ka wa ohi, ua pau ke kau mehana, a aole i hoola ia kuu uhane!

17. Auwe oukou e na kanaka ilihune, no oukou na naau i hoehaeha ole ia, no oukou na uhane i mihi ole, a no oukou na opu i maona ole, a no oukou na lima i kaohi ole ia mai ka lalau ana aku i na waiwai o na kanaka e ae, no oukou na maka i piha me ka makee, ka poe e hana ole ana me ko oukou mau lima ponoi!

18. Aka, pomaikai ka poe ilihune i maemae ma ka naau, no lakou na naau i hoehaeha ia, a no lakou na uhane mihi, no ka mea, e ike auanei lakou i ke aupuni o ke Akua e hele mai ana me ka mana a me ka nani nui no ko lakou hoopakele ia ana; no ka mea, no lakou auanei ka momona o ka honua.

19. No ka mea, aia hoi, e hele mai ana ka Haku, a o Kana uku aia ia me Ia, a e uku mai no Ia i kela a me keia kanaka, a e olioli auanei ka poe ilihune;

20. A e lilo ka honua i ka lakou poe hanauna, mai ia hanauna aku a ia hanauna aku, a mau loa aku. A ano, ke hoopau nei Au i Kaʻu olelo ana aku ia oukou. Pela io no. Amene.