1. E hoolohe mai Iaʻu, wahi a ka Haku ko oukou Akua: No ka pono o Kuu kauwa o Oliva Kaudare, aole ia he mea naauao iloko Oʻu e hilinai ia oia me na kauoha a me na kala nana e lawe aku ai i ka aina o Ziona, ke ole e hele pu kekahi mea me ia he mea hoi i kuio a kupaa;

2. No ia mea, ke makemake nei Au, ka Haku, i Kaʻu kauwa ia Ioane Witima, e hele pu me Kaʻu kauwa o Oliva Kaudare;

3. A e hoomau no hoi oia ma ke kakau ana a me ka hoopaa ana i mooolelo o na mea nui a pau ana e ike a hoomaopopo ai e pili ana i Kuu Ekalesia:

4. A e loaa no hoi ia ia na ao ana a me na kokua ana mai Kuu kauwa o Oliva Kaudare a me kekahi poe e ae.

5. A e hoouna mai Kaʻu mau kauwa no hoi ma o a maanei o ka honua, i na palapala hoike o ko lakou oihana kahu malama waiwai i ka aina o Ziona;

6. No ka mea, e lilo ka aina o Ziona i kikowaena a he wahi e waiho ai a e hana ai i keia mau mea a pau;

7. Eia no nae, e kaahele Kuu kauwa o Ioane Witima, ma na manawa he nui, mai kekahi wahi a i kekahi wahi, a mai kekahi apana o ka Ekalesia a i kekahi apana o ka Ekalesia, i loaa ai ia ia ka ike me ka maalahi;

8. E haiolelo ana a e hoakaka ana, e kakau ana, e kope ana, e wae ana, a e loaa ana o na mea a pau no ka pono o ka Ekalesia, a no ka hanauna hou e ulu ae ana auanei maluna o ka aina o Ziona, e noho paa ai maluna ona mai ia hanauna aku a ia hanauna aku, no ka wa mau loa a mau loa. Amene.