1. He mea ia e pono ai e noho oukou i keia manawa ma ko oukou wahi noho e like me ke kupono i ko oukou noho ana;

2. A ina he mau aina ko oukou, e haawi aku oukou i kekahi i na hoahanau no ka hikina mai;

3. A ina aole o oukou mau aina, e kuai lakou no keia manawa ma kela mau aina e pili kokoke mai ana e like me lakou e manao ai he pono, no ka mea, he mea maoli ia e pono ai e loaa ia lakou he mau wahi e noho ai no keia manwa:

4. He mea maoli ia e pono ai, e malama oukou i ke kala e like me ka hiki ia oukou, a e loaa ia oukou na mea a pau e like me ka hiki ia oukou ma ka pono, i hiki ai ia oukou ke kuai i kekahi aina ma kekahi wa aku, i aina hooilina, oia hoi, i kulanakauhale.

5. O ia wahi, aole e hoike ia i keia manawa, aka, mahope aku o ka hiki ana mai o ko oukou mau hoahanau mai ka hikina mai, e koho ia ana kekahi mau kanaka, a ia lakou e haawi ia aku ai e ike i ua wahi la, a i ole, e hoike ia ia ia lakou.

6. A e koho ia lakou e kuai i na aina, a e hoomaka i ka hookumu ana i ke kahua o ke kulanakauhale; a alaila oukou e hoomaka ai e hoouluulu ia me ko oukou mau ohana, o kela a me keia kanaka e like me ka nui o kona ohana, mamuli o kona lako a nele paha, a e like me ka mea i koho ia aku nona e ka papa Peresidena a me ka Bihopa o ka Ekalesia, i ku i na kanawai a me na kauoha a oukou i loaa ai, a e loaa aku ana ia oukou ma neia hope aku. Pela io no. Amene.