1. E hoolohe mai oukou, e na Lunakahiko o Koʻu Ekalesia, a e haliu mai ka pepeiao i Kaʻu olelo, a e ao ia e Aʻu i Koʻu makemake e pili ana no oukou, a e pili ana no hoi i keia aina kahi Aʻu i hoouna aku ai ia oukou:

2. No ka mea, he oiaio, ke olelo aku nei Au ia oukou, pomaikai ka mea e malama ana i Kaʻu mau kauoha, ina ma ka wa e ola ana a i ole iloko o ka make; a o ka mea kupaa iloko o na popilikia, e oi aku ana ka uku o ia mea iloko o ke aupuni o ka lani.

3. Aole e hiki ia oukou ke ike me ko oukou mau maka maoli, i keia manawa, i ka mea i hoolala ia e ko oukou Akua e pili ana i kela mau mea e hiki mai ana ma keia hope aku, a me ka nani e hiki mai ana mahope o na popilikia he nui.

4. No ka mea, mahope o na popilikia he nui e hiki mai ai na pomaikai. No ia mea, e hiki mai ana ka la e hoolei ia ai oukou me ka nani nui; aole nae i hiki mai ka hora, aka, ua kokoke mai.

5. E hoomanao i keia, ka mea Aʻu e hai e aku nei ia oukou, i waiho ai oukou ia mea i ko oukou naau, a e apo aku i ka mea e hiki mai ana.

6. Aia hoi, he oiaio, ke olelo aku nei Au ia oukou, no keia kumu i hoouna aku ai Au ia oukou i hoolohe mai ai oukou, a i makaukau ai ko oukou mau naau e hai aku i na olelo hooiaio no na mea e hiki mai ana;

7. A i loaa ai no hoi ia oukou ka hoomaikai ia no ka hookumu ana i ke kahua, a no ka hooiaio ana no ka aina kahi e ku ai ka Ziona o ke Akua;

8. A i hoomakaukau ia ai no hoi kekahi ahaaina o na mea momona no ka poe ilihune, he oiaio, he ahaaina o na mea momona, o ka waina o ka okawaina i hoomaemae pono ia, i ike ai ka honua aole e haule ka na waha o na Kaula;

9. He oiaio, he ahaaina o ka hale o ka Haku, i hoomakaukau pono ia, a ilaila na lahuikanaka a pau e kono ia ai.

10. Ka mua, ka poe waiwai a me ka poe i ao ia, ka poe naauao a me ka poe hanohano;

11. A mahope iho o ia e hiki mai ai ka la o Koʻu mana: alaila o ka poe ilihune, ka poe oopa, a me ka poe makapo, a me ka poe kuli, e komo mai i ka ahaaina mare o ke Keikihipa, a e ai i ka ahaaina a ka Haku, i hoomakaukau ia no ka la nui e hiki mai ana.

12. Aia hoi, Owau, ka Haku, ka i olelo ia mea.

13. A i laha aku ai ka olelo hooiaio mai Ziona aku, he oiaio, mai ka waha o ke kulanakauhale o ka hooilina o ke Akua:

14. He oiaio, no keia kumu i hoouna ai Au ia oukou ia nei, a ua wae Au i Kuu kauwa ia Eluene Paterige, a koho aku nona i kana misiona ma keia aina;

15. Aka, ina e mihi ole oia i kona mau hewa, oia hoi, ka manaoio ole a me ka pouli o ka naau, e ao oia o haule auanei oia.

16. Aia hoi, ua haawi ia kana misiona ia ia, a aole e haawi hou ia.

17. A o ka mea e ku ana ma kona misiona ua koho ia i lunakanawai iloko o ka Iseraela, e like me ia i na la o ke au kahiko, e mahelehele i na aina o ka hooilina o ke Akua i Kana poe keiki.

18. A e hookolokolo i Kona poe kanaka ma ka olelo hoike a ka poe pono, a ma ke kokua ana o kona mau hoakuka, e ku like i na kanawai o ke aupuni i haawi ia mai ma o na Kaula la o ke Akua;

19. No ka mea, he oiaio, ke olelo aku nei Au ia oukou, e malama ia no Koʻu kanawai maluna o keia aina.

20. Mai manao kekahi kanaka he mea hoomalu oia, aka, na ke Akua e hoomalu mai i ka mea e hookolokolo ana, e like me ke kuhikuhi ana o Kona makemake ponoi, a i ole, ma kekahi olelo ana, o ka mea e ao ana, a i ole, e noho ana maluna o ka noho hookolokolo.

21. Mai uhai kekahi kanaka i na kanawai o ka aina, no ka mea, o ka mea e malama ana i na kanawai o ke Akua aole ona kumu e uhai ai i na kanawai o ka aina:

22. No ia mea, e noho malalo o na mana e noho mana ana, a nohoalii mai Oia; ka Mea nona ke kuleana e nohoalii ai, a hoopio i na enemi a pau malalo o Kona mau wawae.

23. Aia hoi, o na kanawai a oukou i loaa ai mai Koʻu lima aku oia na kanawai o ka Ekalesia, a ma keia ano oukou e hoike ai ia mau mea. Aia hoi, eia ka naauao.

24. A ano, oiai ua olelo aku Au e pili ana i Kaʻu kauwa ia Eluene Paterige, o keia aina ka aina ona e noho ai, a me na mea ana i koho ai i mau hoakuka nona. A me ka aina no hoi e noho ai o ka mea Aʻu i koho ai e malama i Kuu hale-hoahu;

25. No ia mea, e lawe mai lakou i ko lakou mau ohana i keia aina, e like me lakou e kuka ai mawaena o lakou iho a me Aʻu;

26. No ka mea, aia hoi, aole he mea pono Noʻu e kauoha ma na mea a pau, no ka mea, o ka mea i hookikina ia ma na mea a pau, he mea molowa ia a aole he kauwa naauao; no ia mea, aole e loaa ia ia kekahi uku.

27. He oiaio, ke olelo aku nei Au e hooikaika na kanaka iloko o ka hana maikai me ka hoihoi o ka naau e pono ai, a e hana i na mea he nui mamuli o ko lakou makemake ponoi, a e lawe mai i na pono he nui;

28. No ka mea, aia ka mana iloko o lakou, a ma ia mea lakou i lilo ai i mau agena no lakou iho. A ina e hana na kanaka i ka hana maikai, aole loa e nele lakou i ko lakou uku.

29. Aka, o ka mea e hana ole ana i kekahi mea a kauoha ia oia, a apo mai i kekahi kauoha me ka naau kanalua, a malama ia mea me ka molowa, ua hoahewa ia oia.

30. Owai la Au, ka Mea i hana i ke kanaka, wahi a ka Haku, e hoahewa ole ana i ka mea hoolohe ole i Kaʻu mau kauoha?

31. Owai la Au, wahi a ka Haku, ka Mea i olelo-paa aku, a aole nae i hooko?

32. Ke kauoha nei Au a hoolohe ole ke kanaka, ke hoopau nei Au a loaa ole ia lakou ka pomakai;

33. Alaila i iho la lakou iloko o ko lakou mau naau, aole keia ka hana a ka Haku, no ka mea, aole i hooko ia Kana mau olelo-paa. Aka, auwe ka poe o ia ano, no ka mea, ke hoohalua mai la ko lakou uku mailalo mai, a aole mailuna mai.

34. A ano, ke haawi aku nei Au ia oukou i kekahi mau kuhikuhi hou aku e pili ana i keia aina.

35. He mea naauao ia iloko Oʻu e lilo Kaʻu kauwa o Makini Hailaki i kumuhoohalike no ka Ekalesia, ma ka waiho ana i kana mau moni imua o ka Bihopa o ka Ekalesia.

36. A pela no hoi, he kanawai keia i kela a me keia kanaka e hele mai ana i keia aina e loaa kekahi hooilina; a e hana oia me kana mau moni e ku like me na kuhikuhi ana o ke kanawai.

37. A he naauao no hoi ia e kuai ia i mau aina ma Kuokoa [Independence] i wahi no ka hale-hoahu, a pela no hoi no ka hale pai palapala.

38. A he mau kuhikuhi hou ae e pili ana i Kuu kauwa ia Makini Hailaki, e haawi ia ia ia e ka Uhane, i loaa ai ia ia kona hooilina e like me kana i manao ai he maikai.

39. A e mihi oia i kona mau hewa, no ka mea, ke imi nei oia i ka mahalo o ko ke ao nei.

40. A e ku no hoi Kuu kauwa o Wiliama W. Pelepa ma ka oihana Aʻu i hoonoho aku ai ia ia, a e loaa kona hooilina ma ka aina;

41. A he mea pono no hoi nona e mihi, no ka mea, aole Au, ka Haku, i oluolu loa ia ia, no ka mea, ke imi nei oia e hookelakela, a aole i lawa kona haahaa imua Oʻu.

42. Aia hoi, o ka mea i mihi i kona mau hewa, ua kala ia oia, a aole Au, ka Haku, e hoomanao hou ia mau mea.

43. Ma o keia e ike ai oukou ina paha ua mihi ke kanaka i kona mau hewa. Aia hoi, e hoike ana oia ia mau hewa a e haalele loa ia lakou.

44. A ano, he oiaio, ke olelo nei Au, e pili ana i ke koena o na Lunakahiko o Kuu Ekalesia, aole i hiki mai ka manawa, no na makahiki he nui, no lakou e loaa ai ko lakou mau hooilina ma keia aina—ke ole lakou e makemake ia mea ma o ka pule la o ka manaoio—koe wale no e like me ia e koho ia ai no lakou e ka Haku.

45. No ka mea, aia hoi, na lakou e hoonee i na kanaka a akoakoa mai na welelau mai o ka honua;

46. No ia mea, e hoakoakoa pu oukou ia oukou iho, a o ka poe i wae ole ia e noho ma keia aina, e hai lakou i ka Euanelio ma na aina e pili kokoke mai ana, a mahope aku e hoi lakou i ko lakou mau home.

47. E haiolelo lakou ma ke alahele, a e hai i ka olelo hooia no ka oiaio ma na wahi a pau, a e kahea aku i ka poe waiwai, i ka poe kiekie a me ka poe haahaa, a me ka poe ilihune e mihi;

48. A e kukulu lakou i kekahi mau apana o ka Ekalesia, ina e mihi ana na kanaka o ka honua.

49. A e koho ia kekahi agena ma o ka leo la o ka Ekalesia, no ka apana o ka Ekalesia ma Ohaio, e ohi mai i na kala e kuai ai i na aina ma Ziona.

50. A ke haawi aku nei Au i Kuu kauwa, ia Sidane Rigedona, i kekahi kauoha e kakau oia i palapala hoakaka no ka aina o Ziona, a i olelo hoakaka o ka makemake o ke Akua, e like me ia e hoike ia aku ai e ka Uhane ia ia;

51. A i episetole a me kekahi pepa noi kala, e haawi ia i na apana a pau o ka Ekalesia i loaa ai na kala, e waiho ia iloko o na lima o ka Bihopa e kuai i mau aina i hooilina no na keiki a ke Akua, ma ona iho, a i ole, ma o ka agena la e like me kana i manao ai he pono, a i ole, e like me kana kuhikuhi ana.

52. No ka mea, aia hoi, he oiaio, ke olelo aku nei Au ia oukou, ke makemake nei ka Haku i na haumana, a me na keiki a kanaka e hoohamama i ko lakou mau naau, oia hoi, e kuai i keia aina holookoa, i ka hiki ana mai o ka manawa kupono.

53. Aia hoi, eia ka naauao. E hana lakou i keia o loaa ole ia lakou he hooilina, koe wale no ma o ka hookahe ana la i ke koko.

54. A eia hou, ina e loaa kekahi aina, e hoouna ia i mau kanaka hana o na ano a pau i keia aina, e hana no ka Poe Hoano o ke Akua.

55. E hana ia keia mau mea a pau me ka pololei; a e hoike ia na kuleana me na pomaikai o na aina ia manawa aku ia manawa aku, e ka Bihopa, a i ole, e ka agena o ka Ekalesia;

56. A aole e hana ia ka hana o ka houluulu ana me ka awiwi, aole hoi ma ka holo ana, aka, e hana ia e like me ke ao ana o na Lunakahiko o ka Ekalesia ma na huikuka, mamuli o ka naauao e loaa ana ia lakou ia manawa aku ia manawa aku.

57. A na Kuu kauwa o Sidane Rigedona e hoolaa a hoano i keia aina, a me kahi o ka halelaa, i ka Haku.

58. A e kahea i kekahi halawai huikuka, a mahope aku e hoi Kuu mau kauwa o Sidane Rigedona a me Iosepa Kamika, opio, a me Oliva Kaudare no hoi me laua, e hooko i ke koena o ka hana Aʻu i koho aku ai no lakou ma ko lakou aina ponoi iho, a o ke koena iho e like me ka hoomalu ana o na huikuka.

59. A mai hoi hou kekahi kanaka mai keia aina aku, ke ole oia e hoike aku, ma ke alahele, no ka mea ana i ike a i manaoio maoli ai.

60. A o ka mea i hooili ia maluna o Ziba Pikikona e lawe ia mai ona mai; a e ku oia he lala iloko o keia Ekalesia, a e hana me kona mau lima ponoi, me na hoahanau, a lawa pono kona ao ikaika ia ana no kona mau hewa a pau, no ka mea, aole oia i hoike ia mau mea, a ke manao nei oia e huna ia mau mea.

61. A o ke koena o na Lunakahiko o ka Ekalesia, e hele mai ana i keia aina, he poe kekahi o lakou i hoopomaikai nui ia a oi wale aku, e malama no hoi i huikuka maluna o keia aina.

62. A na Kuu kauwa o Eluene Paterige e alakai i ka huikuka e malama ia ana e lakou.

63. A e hoi hou no hoi lakou, me ka hai ana i ka Euanelio ma ke alahele, e hoike ana i na mea i hoike ia aku ia lakou;

64. No ka mea, he oiaio, e puka aku ka leo mai keia wahi aku i ko ke ao nei a pau e pono ai, a i na welelau o ka honua—e hai ia ka Euanelio i na kanaka a pau e pono ai, me na hoailona e hahai ana i ka poe e manaoio ana.

65. A aia hoi, ke hele mai la ke Keiki a ke Kanaka. Amene.