1. Aia hoi, ke olelo aku nei Au ia oe, e Davida, ua makau oe i ke kanaka a aole i paulele mai maluna Oʻu i ikaika nou, ka mea pono hoi nau e hana:

2. Aka, ua oi aku kou noonoo maluna o na mea o ka honua mamua o na mea Oʻu, kou Mea Nana i hana, a me ka hana o ka Oihanakahuna ou i kahea ia ai; a aole oe i hoolohe aku i Kuu Uhane, a me ka poe i hoonoho ia maluna ou, aka, ua hoohuli ia e ka poe Aʻu i kauoha ole ai:

3. No ia mea, ua waiho ia oe e ninau nou iho, ma Oʻu nei a e noonoo maluna o na mea au i loaa ai.

4. A o kou wahi e noho ai ma ka hale ia o kou makuakane, a hiki i Koʻu haawi ana aku ia oe i mau kauoha hou aku. A e malama oe i ka hana ma ka Oihanakahuna iloko o ka Ekalesia, a imua o ko ke ao nei, a ma na wahi e kokoke mai ana. Amene.

5. Aia hoi, ke olelo aku nei Au ia oe, e Petero, e hele oe ma kau huakai me kou hoahanau o Oliva, no ka mea, ua hiki mai ka manawa i kupono Iaʻu e wehe ae ai oe i kou waha e hai aku i Kuu Euanelio; nolaila, mai makau oe, aka, e hoolohe mai i na olelo a me na ao ana a kou hoahanau, ana e haawi mai ai ia oe.

6. A e auamo like oe i kona mau popilikia a pau, e hapai mau ana i kou naau iluna Iaʻu ma ka pule, a me ka manaoio, no kona a me kou hoopakele ia ana; no ka mea, ua haawi aku Au ia ia i ka mana e kukulu i Kuu Ekalesia mawaena o ka poe Lamana:

7. A aole he mea Aʻu i koho ai e lilo i hoakuka nona maluna iho ona iloko o ka Ekalesia ma na mea e pili ana i na hana Ekalesia, koe wale no o kona hoahanau, o Iosepa Kamika, opio.

8. No ia mea, e hoolohe mai i keia mau mea a e hooikaika i ka malama ana i Kaʻu mau kauoha, a e hoopomaikai ia auanei oe me ke ola mau loa. Amene.

9. Aia hoi, ke olelo aku nei Au ia oe, e Kaʻu kauwa, e Ioane, e hoomaka oe mai keia manawa aku e hai i Kuu Euanelio me he leo la o ka pu.

10. A o kau hana ma kahi auanei ia o kou hoahanau o Pilipi Boro, a ma na wahi hoi e pili kokoke ana ilaila; he oiaio, ma na wahi ou e ae ia ai e lohe ia a hiki i Koʻu kauoha ana ia oe e hele mai ia wahi aku.

11. A o kau hana a pau ma Ziona no auanei ia, me kou uhane a pau, mai keia wa aku; he oiaio, e oaka mau oe i kou waha no Kaʻu hana, e makau ole ana i ka mea i hiki i kanaka ke hana, no ka mea, Owau pu me oe. Amene.