1. Penei wahi a ka Haku ko oukou Akua, oia hoi, o Iesu Kristo, ka Mea Nui a Mana Loa, ka Alepa a me ka Omega, ka hoomaka ana a me ka hopena, oia ka Mea hookahi no i nana aku maluna o ka laula a me ke akea o ka wa mau loa, a me na serapima lehulehu a pau o ka lani, mamua o ka hana ia ana o ke ao nei:

2. Ka Mea hookahi i ike i na mea a pau, no ka mea, eia no na mea a pau imua o Koʻu mau maka:

3. Owau ka Mea hookahi no i olelo aku, a hana ia iho la ke ao nei, a ua hiki mai na mea a pau ma Oʻu nei:

4. Owau ka Mea hookahi no i lawe mai i ka Ziona o Enoka iloko o Koʻu poli ponoi; a he oiaio, ke olelo aku nei Au, o ka poe a pau i manaoio mai ma Koʻu inoa, no ka mea, Owau no o Kristo, a ma Koʻu inoa ponoi, ma o ka mana la o ke koko Aʻu i ninini ai, i nonoi aku ai Au imua o ka Makua no lakou;

5. Aka, aia hoi, o ke koena o ka poe hewa Kaʻu i hoopaa ai me na kaulahao o ka pouli a hiki i ka hookolokolo ana o ka la nui, ka mea e hiki mai ana i ka hopena o ka honua;

6. Pela no hoi Au e hoopaa ai i ka poe hewa, ka poe e hoolohe ole ana i Koʻu leo, aka, e hoopaakiki ana i ko lakou mau naau, a auwe, auwe, auwe, ko lakou hoopai.

7. Aka hoi, he oiaio, he oiaio, ke olelo aku nei Au ia oukou, aia Koʻu mau maka maluna o oukou. Aia no Au iwaena o oukou a aole e hiki ia oukou ke ike Iaʻu;

8. Aka, e hiki koke mai ana ka la e ike ai oukou Iaʻu, a e hoomaopopo ai Owau no Ia; no ka mea, e uhae koke ia ana ka pale paku o ka pouli, a aole e ku ka mea i hoomaemae ole ia ma kela la:

9. No ia mea, e kaei i ko oukou mau puhaka a e noho makaukau. Aia hoi, no oukou ke aupuni, a aole e lanakila mai na enemi.

10. He oiaio, ke olelo aku nei Au ia oukou, ua maemae oukou, aka, aole nae i pau loa; a aole hoi kekahi poe okoa ae Aʻu i olioli loa ai,

11. No ka mea, ua hoohaumia ia na mea io a pau imua Oʻu; a ke lanakila nei na mana o ka po maluna o ka honua, mawaena o na keiki a kanaka, imua o ke alo o na lehulehu a pau o ka lani,

12. Ka mea hoi i hana a nohoalii ka meha, a ua ehaeha ka wa mau loa a pau, a ke kakali nei na anela i ke kauoha nui e ohi i ko ka honua, e hoiliili i ka opala i puhi ia ai ia mau mea; a aia hoi, ua hui na enemi.

13. A, ano, ke hoike aku nei Au ia oukou i kekahi mea pohihihi, he mea i huna ia iloko o na keena malu, ka mea e lawe mai ana i ko oukou anai ia ana iloko o ke au o ka manawa, a, aole nae oukou i ike ia mea;

14. Aka, ano, ke hai aku nei Au ia mea ia oukou, a ua pomaikai oukou, aole no ko oukou hewa, aole hoi no na naau manaoio ole o oukou; no ka mea, he oiaio, ua hewa kekahi o oukou imua Oʻu, aka, e ahonui ana Au i ko oukou nawaliwali.

15. Nolaila, e ikaika oukou mai keia manawa aku; mai makau, no ka mea, no oukou ke aupuni:

16. A no ko oukou hoola ia ana Au e haawi aku nei i kekahi kauoha ia oukou, no ka mea, ua lohe Au i ka oukou mau pule, a ua hoohalahala mai na ilihune imua Oʻu, a o ka poe waiwai Naʻu i hana, a o na io a pau Naʻu ia, a aole Au he mea nana i kowaho o na kanaka.

17. A Naʻu i hana i ka honua a waiwai, a aia hoi, oia Koʻu keehina wawae, no ia mea, e ku hou ana Au maluna ona;

18. A ke pahola aku nei Au a ae aku e haawi aku ia oukou i na waiwai oi aku, he oiaio, i ka aina i olelo mua ia, he aina e kahe ana ka waiu a me ka meli, maluna hoi ona aohe hoino ana i ka wa o ko ka Haku hiki ana aku:

19. A e haawi aku Au ia ia oukou i aina hooilina no oukou, ina e imi oukou ia me ko oukou mau naau a pau;

20. A o keia auanei Kaʻu berita me oukou, e loaa ia ia oukou i aina hooilina no oukou, a i hooilina no ka oukou mau keiki a mau loa, oiai ka honua e ku ana, a e noho hou no auanei oukou maluna ona iloko o ka manawa mau loa, aole loa e lilo hou aku.

21. Aka, he oiaio, ke olelo aku nei Au ia oukou, e hiki mai ana ka manawa aole ana o oukou alii, aole hoi luna hoomalu, no ka mea, Owau ana ko oukou Alii a e kiai no Au maluna o oukou.

22. No ia mea, e hoolohe i Koʻu leo a e hahai mai Iaʻu a e lilo auanei oukou i poe kanaka kuokoa, a aole o oukou mau kanawai, koe wale no o Kaʻu mau kanawai i Koʻu wa e hiki aku ai, no ka mea, Owau ko oukou Mea Kau-kanawai, a heaha la ka mea e hiki ke kaohi mai i Koʻu lima?

23. Aka, he oiaio, ke olelo aku nei Au ia oukou, e ao kekahi i kekahi e like me ka oihana Aʻu i hoonoho aku ai ia oukou,

24. A e manao kela kanaka keia kanaka i kona hoahanau e like me ia ia ia iho; a e hana i ka hana maemae a hemolele hoi imua Oʻu.

25. A eia hou, ke olelo aku nei Au ia oukou, e manao kela kanaka keia kanaka i kona hoahanau e like me ia ia ia iho;

26. No ka mea, owai la ke kanaka mawaena o oukou he umikumamalua ana mau keikikane a he mea hoopunahele ole i kekahi o lakou, a hookauwa mai lakou nana me ka hoolohe pono, a i aku oia i kekahi, e hoaahu ia oe me na lole nani a e noho oe maanei; a i kekahi, e hoaahu ia oe me na weluwelu a e noho oe ma o, a e nana aku maluna o kana mau keikikane a i iho la he kaulike au.

27. Aia hoi, o keia Kaʻu i haawi aku ai ia oukou ma ke ano he olelo nane, a he oiaio, ua like ia me Aʻu: Ke olelo nei Au ia oukou, e hookahi; a ina aole oukou i hookahi, aole oukou Noʻu.

28. A eia hou, ke olelo aku nei Au ia oukou, ke imi nei na enemi iloko o na keena malu i ko oukou mau ola.

29. Ke lohe nei oukou i na kaua ana ma na aina mamao, a ke olelo nei oukou e hiki koke mai ana he mau kaua nui ma na aina mamao, aka, aole nae oukou i ike i na naau o na kanaka iloko o ko oukou aina ponoi iho.

30. Ke hai aku nei Au ia oukou i keia mau mea mamuli o ka oukou mau pule; no ia mea, e hoahu ae i ka naauao ma ko oukou mau naau, o hoike mai ka ino o na kanaka i keia mau mea ia oukou ma o ko lakou mau ino la, ma ke ano e olelo mai ana iloko o ko oukou mau pepeiao me ka leo i oi aku ka nui mamua o ka mea e hoonaueue ana i ka honua; aka, ina ua makaukau oukou, aole oukou e makau.

31. A i pakele ai oukou mai ka mana o ka enemi, a e houluulu ia mai ai i Oʻu nei he poe kanaka pono, me ke kina ole a me ka hewa ole:

32. No ia mea, no keia kumu i haawi aku ai Au ia oukou i ke kauoha e hele oukou i Ohaio; a ilaila Au e haawi aku ai ia oukou i Koʻu kanawai; a ilaila e haawi ia ai ia oukou ka mana mailuna mai;

33. A e hele aku ka poe Aʻu e makemake ai, mai ia wahi aku mawaena o na lahuikanaka a pau, a e hai ia aku ia lakou ka lakou mea e hana ai; no ka mea, he hana nui Kaʻu e waiho nei ma kahi hoahu, no ka mea, e hoola ia o Iseraela, a e alakai no Au ia lakou ma kahi Aʻu e makemake ai, a aohe mana e kaohi i Koʻu lima.

34. A ano, ke haawi aku nei Au i ka Ekalesia ma keia mau wahi, i kekahi kauoha e koho ia kekahi poe kanaka mawaena o lakou, a e koho ia lakou ma o ka leo la o ka Ekalesia;

35. A e nana aku lakou i ka poe hune a me ka poe nele, a e lawelawe aku i mea e kokua ai ia lakou, i ole ai lakou e pilikia; a e hoouna ia lakou i kahi Aʻu i kauoha ai ia lakou;

36. A o keia ka lakou hana e hookele i na hana e pili ana i ka waiwai o keia Ekalesia.

37. A o ka poe i loaa he mau mahinaai i hiki ole ke kuai ia aku, e waiho ia ia mau mea, a i ole, e hoolimalima ia e like me ka mea a lakou e manao ai he pono.

38. E nana pono i malama pono ia ai na mea a pau; a i ka wa a na kanaka e hooili ia ai me ka mana mailuna mai a hoouna ia aku, e houluulu ia auanei keia mau mea a pau iloko o ka poli o ka Ekalesia.

39. A ina e imi oukou i na waiwai, oia hoi, ka mea a ka Makua i makemake ai e haawi aku ia oukou, e lilo oukou i poe waiwai loa mamua o na kanaka a pau, no ka mea, e loaa ana ia oukou na waiwai o ka wa mau loa; a he mea ia e pono ai o na waiwai o ka honua Naʻu ia e haawi aku; aka, e ao o haaheo, o like auanei oukou me ka poe Nepai o ka wa kahiko.

40. A eia hou, ke olelo aku nei Au ia oukou, ke haawi aku nei Au ia oukou i kekahi kauoha, oia hoi, o kela a me keia kanaka, ka Lunakahiko, ke Kahuna, ke Kumu, a me na lala no hoi, e hana aku me kona ikaika, me ka hana a kona mau lima, e hoomakaukau a e hooko i na mea Aʻu i kauoha aku ai.

41. A e lilo ka oukou mau haiolelo ana i leo ao, kela a me keia kanaka i kona hoalauna me ka oluolu a me ka haahaa.

42. A e hele oukou maiwaena aku o ka poe hewa. E hoola ia oukou iho. E maemae oukou, ka poe e hali ana i na ipu o ka Haku. Pela io no. Amene.