1. Aia hoi, pomaikai, wahi a ka Haku, ka poe i hele mai i keia aina me ka maka kaukahi i Koʻu nani, e like me Kaʻu mau kauoha;

2. No ka mea, o ka poe e ola ana e lilo ka honua ia lakou, a o ka poe e make ana e maha ana lakou mai ka lakou mau hana a pau, a e hahai ka lakou mau hana ia lakou, a e loaa ia lakou he lei-alii ma na hale o Koʻu Makua, Aʻu i hoomakaukau ai no lakou;

3. He oiaio, pomaikai ka poe no lakou na wawae e ku ana maluna o ka aina o Ziona, ka poe i hoolohe i Kuu Euanelio, no ka mea, e loaa ia lakou ka uku no lakou, na mea maikai o ka honua; a e hoohua mai no ia iloko o kona ikaika;

4. A e hoolei ia no hoi lakou me na pomaikai mailuna mai, he oiaio, a me na kauoha aole he kakaikahi; a me na hoikeana ma ko lakou manawa: ka poe kupaa a hooikaika imua Oʻu.

5. No ia mea, ke haawi aku nei Au ia lakou i kekahi kauoha, e i ana penei: E aloha aku oe i ka Haku kou Akua me kou naau a pau, a me kou mana, noonoo, a me ka ikaika a pau; a ma ka inoa o Iesu Kristo e hookauwa aku oe Nana.

6. E aloha aku oe i kou hoalauna e like me oe ia oe iho. Mai aihue oe; aole hoi e moekolohe, aole hoi e pepehi kanaka, aole hoi e hana i kekahi mea e like me ia.

7. E mahalo aku oe i ka Haku kou Akua ma na mea a pau.

8. E kaumaha aku oe i mohai i ka Haku kou Akua ma ka pono, oia hoi, ka naau pepe a me ka uhane mihi.

9. A i hiki ai ia oe ke malama pono ia oe iho me ka hoohaumia ole ia mai ko ke ao nei, e hele oe i ka halepule a e alana i kau mau ahaaina a ka Haku ma Kuu la hoano;

10. No ka mea, he oiaio, he la keia i wae ia nou e hoomaha ai mai kau mau hana mai, a e haawi aku i kau mau hoomaikai ana i ka Mea Kiekie Loa;

11. A eia no nae, e haawi ia kau mau ae-like laa ma ka pono i na la a pau a ma na manawa a pau;

12. Aka, e hoomanao e haawi aku oe ma keia la, ka la o ka Haku, i kau mau mohai a me kau mau ahaaina i ka Mea Kiekie Loa, e hoike ana i kou mau hewa i kou mau hoahanau, a imua o ka Haku.

13. A ma keia la aole oe e hana i kekahi mea okoa ae, koe wale no e hoomakaukau ia kau mau mea ai me ka naau kaukahi, i hemolele ai kou hookeai ana, a i ole, ma kekahi olelo ana, i piha ai kou hauoli.

14. He oiaio, o keia ka hookeai ana a me ka pule; a i ole, ma kekahi olelo ana, ka hauoli ana a me ka pule.

15. A e like me ka oukou hana ana i keia mau mea me ka mahalo, me ka naau a me ka helehelena hauoli; aole me na akaaka nui ana, no ka mea, he hewa keia, aka, me ka naau hauoli a me na helehelena hoihoi;

16. He oiaio, ke olelo nei Au, ina e hana oukou i keia, no oukou ka piha o ka honua: na holoholona o ke kula a me na manu o ka lewa, a o na mea e pii ana maluna o na laau, a e hele ana maluna o ka honua;

17. He oiaio, a o na nahelehele, a o na mea maikai e puka mai ana mai ka honua mai, ina paha he mea ai, a i ole, he mea aahu, a i ole no na hale, a i ole, no na hale papaa, a i ole, no na ulu laau hua ai, a i ole, no na kihapai, a i ole, no na malawaina;

18. He oiaio, o na mea a pau e puka mai ana mai ka honua mai, iloko o kona kau iho, ua hana ia no ka pono a me ka pomaikai o ke kanaka, no ka hooluolu ana i ka maka a no ka hoohauoli ana i ka naau;

19. He oiaio, i mea ai a i mea aahu, no ka hoao ma ka ai ana a no ka honi ana, no ka hooikaika ana i ke kino a e hoolana i ka uhane.

20. A he mea oluolu ia i ke Akua, Kona haawi ana i keia mau mea a pau i kanaka; no ka mea, no keia kumu i hana ia ai ia mau mea, e hoohana ia nae me ka noonoo naauao, aole me ka hu mawaho o ka palena kupono, aole hoi me ka hao wale:

21. A aole he mea a ke kanaka e hoonaukiuki ai i ke Akua, aole hoi i hoaa ia Kona inaina e kue i kekahi, koe wale no i ka poe e haawi ole ana i ka hoomaikai i Kona lima iloko o na mea a pau, a hoolohe ole i Kana mau kauoha.

22. Aia hoi, ua ku keia i ke kanawai a me ka na Kaula; no ia mea, mai hoouluhua hou mai Iaʻu e pili ana i keia mea.

23. Aka, e hoomaopopo o ka mea e hana ana i na hana o ka pono e loaa auanei kona uku, he oiaio, o ka maluhia ma keia ao a o ke ola mau loa i ke ao e hiki mai ana.

24. Owau, o ka Haku, ka i olelo aku ia mea, a ke hooia nei ka Uhane. Amene.